1 Mambo 21

Dawidi anapatilizwa kwa kuwahesabu watu.

¹Satani akawainukia Waisiraeli akimponza Dawidi, awahesabu Waisiraeli.

²Dawidi akamwambia Yoabu na wakuu wa watu: Nendeni, mwahesabu Waisiraeli toka Beri-Seba hata Dani! Kisha nileteeni habari, nipate kuzijua hesabu zao.

³Yoabu akamjibu: Bwana na aendelee kuwaongeza watu wake vivyo hivyo mara mia! Bwana wangu mfalme, kumbe wao wote sio watumishi wa bwana wangu? Hayo bwana wangu anayatakia nini? Kuwakosesha Waisiraeli hivyo ni kwa nini?[#2 Mose 30:12.]

⁴Lakini neno la mfalme likapata nguvu, asimsikie Yoabu; ndipo, Yoabu alipotoka, akaenda po pote kwao Waisiraeli, kisha akaja Yerusalemu.

⁵Hapo Yoabu akampasha Dawidi habari za jumla ya watu waliohesabiwa, wakawa Waisiraeli wote watu milioni moja na 100000 wenye kushika panga, nao Wayuda walikuwa watu 470000 wenye kushika panga.

⁶Walawi na Wabenyamini hakuwahesabu, kwani hilo neno la mfalme lilikuwa limemchukiza Yoabu.

⁷Neno hili likawa baya machoni pake Mungu, kwa hiyo akawapiga Waisiraeli.[#1 Mambo 27:24.]

⁸Ndipo, Dawidi alipomwambia Mungu: Nimekosa sana kwa kulifanya neno hilo; sasa umwondolee mtumishi wako hizo manza, alizozikora! Kwani nimefanya kisichopasa kabisa.

⁹Lakini Bwana akamwambia Gadi aliyekuwa mchunguzaji wake Dawidi kwamba:

¹⁰Nenda kumwambia Dawidi kwamba: Hivi ndivyo, Bwana anavyosema: Mimi ninakuwekea mambo matatu, ndimo uchague moja lao, nikufanyizie.

¹¹Gadi akaja kwa Dawidi, akamwambia: Hivi ndivyo, Bwana anavyosema: Jipatie ulitakalo!

¹²Unataka miaka mitatu ya njaa? au unataka kukimbizwa miezi mitatu machoni pao wakusongao, panga za adui zako zikikupata? au unataka, upanga wa Bwana na ugonjwa mbaya uuao upite katika nchi hii, malaika wa Bwana akifanya maovu katika mipaka yote ya Waisiraeli? Sasa tafuta, uone nitakayomjibu aliyenituma!

¹³Dawidi akamwambia Gadi: Nimesongeka sana, lakini na nijitupe mkononi mwake Bwana, kwani huruma zake ni nyingi mno nisijitupe mikononi mwa watu.

¹⁴Ndipo, Bwana alipowauguza Waisiraeli ugonjwa mbaya uuao, wakafa kwa Waisiraeli watu 70000.

¹⁵Mungu akamtuma malaika wake namo Yerusalemu, afanye humo namo maovu yake; lakini Bwana alipoyaona hayo maovu, aliyoyafanya, akageuza moyo kwa ajili ya huo ubaya, akamwambia yule malaika aliyeangamiza: Sasa inatosha, ulegeze mkono wako! Naye yule malaika wa Bwana alikuwa akisimama penye kupuria ngano pa Myebusi Ornani.

¹⁶Dawidi alipoyainua macho yake, akamwona malaika wa Bwana, akisimama kati ya nchi na ya mbingu, nao upanga uliochomolewa ulikuwa mkononi mwake kuuelekea Yerusalemu; ndipo, Dawidi na wazee waliokuwa wamevaa magunia walipoanguka kifudifudi,

¹⁷Dawidi akamwambia Mungu: Kumbe si mimi niliyeagiza kuwahesabu watu? Mimi ndiye niliyekosa na kufanya mabaya sana. Lakini hawa kondoo wamefanya nini? Bwana Mungu wangu, mkono wako na unipige mimi na mlango wa baba yangu! Lakini hawa walio ukoo wako usiwaue!

Dawidi anamtambikia Bwana penye kupuria ngano pa Ornani.

¹⁸Ndipo, malaika wa Bwana alipomwambia Gadi, amwambie Dawidi, Dawidi apande kutengeneza pa kumtambikia Bwana papo hapo penye kupuria ngano pa Myebusi Ornani.

¹⁹Kwa hilo neno, Gadi alilolisema katika Jina la Bwana, Dawidi akapanda.

²⁰Ornani alipogeuka akamwona malaika; nao wanawe wanne waliokuwa naye walikuwa wamejificha, naye Ornani mwenyewe alikuwa akipura ngano.

²¹Dawidi alipokuja kwake Ornani, huyu Ornani alikuwa akitazama; alipomwona Dawidi, akatoka hapo pa kupuria ngano, akamwangukia Dawidi usoni hapo chini.

²²Dawidi akamwambia Ornani: Nipe mahali hapa pa kupuria ngano, nipajenge pa kumtambikia Bwana! Nitakulipa fedha zote zipapasazo, nipe tu mahali hapa, huku kuuawa kwa watu kukomeshwe![#4 Mose 25:8.]

²³Ornani akamwambia Dawidi: Jichukulie tu! Bwana wangu mfalme na afanye, anayoyaona kuwa mema. Tazama, nakupa hawa ng'ombe kuwa ng'ombe za tambiko za kuteketezwa nzima, nayo haya magari nakupa kuwa kuni, nazo hizi ngano zote nakupa kuwa vilaji vya tambiko.

²⁴Mfalme Dawidi akamwambia ornani: Sivyo, kwani nitanunua kabisa na kulipa fedha zote zipapasazo, kwani sitazichukua mali zako za kumtolea Bwana ng'ombe za tambiko za kuteketezwa nzima, nisizozilipa.

²⁵Dawidi akampa Ornani kwa kupanunua mahali pale vipande vya dhahabu 600 vilivyokuwa kama shilingi 45000.

²⁶Kisha Dawidi akamjengea Bwana hapo mahali pa kumtambikia, akamtolea ng'ombe za tambiko za kuteketezwa nzima na vipaji vya tambiko vya kumshukuru, akamwita Bwana na kumwomba, naye akamwitikia akitoa moto mbinguni, upaangukie hapo pa kumtambikia kwa kumtolea ng'ombe za kuteketezwa nzima.[#1 Fal. 18:24.]

²⁷Ndipo, Bwana aliposema na yule malaika, naye akaurudisha upanga wake alani mwake.

²⁸Kwa kuwa Dawidi aliona wakati huo, ya kuwa Bwana amemwitikia hapo pa kupuria ngano pa Myebusi Ornani, huja kutambikia hapo.

²⁹Nalo kao la Bwana, Mose alilolitengeneza nyikani, pamoja na meza ya kumteketezea Bwana ng'ombe za tambiko siku zile lilikuwa kilimani kwa Gibeoni.[#1 Mambo 16:39.]

³⁰Lakini Dawidi hakuweza kwenda huko kumtafuta Mungu, kwa kuwa alikuwa ametishwa na upanga wa yule malaika wa Bwana.[#1 Mambo 21:16.]