1 Mambo 24

Mafungu 24 ya watambikaji.

¹Mafungu yao wana wa Haroni ni haya: wana wa Haroni walikuwa Nadabu na Abihu, Elazari na Itamari.[#1 Mambo 6:3; 23:6.]

²Nadabu na Abihu wakafa, baba yao akingalo yupo, nao hawakuwa na wana; kwa hiyo Elazari na Itamari wakaupata utambikaji.[#3 Mose 10:1-2,12.]

³Dawidi akapatana na Sadoki aliyekuwa wa wana wa Elazari na Ahimeleki aliyekuwa wa wana wa Itamari, akawagawanya, kama walivyokuwa na ukuu katika utumishi wao.[#2 Mambo 8:14.]

⁴Hapo ikatokea, ya kuwa wana wa Elazari walikuwa wenye wakuu wengi zaidi kuliko wana wa Itamari; kwa hiyo walipowagawanya, wakatokea kwa wana wa Elazari wakuu wa milango kumi na sita, lakini kwa wana wa Itamari wakuu wa milango wanane tu.

⁵Lakini wao kwa wao wakawagawanya kwa kuwapigia kura, kwani walikuwako watambikaji wakuu wa Patakatifu na watambikaji wakuu wa Mungu kwao wana wa Elazari nako kwao wana wa Itamari.

⁶Naye Semaya, mwana wa Netaneli, aliyekuwa mwandishi wao Walawi akawaandika, mfalme na wakuu wake na mtambikaji Sadoki na Ahimeleki, mwana wa Abiatari, na wakuu wa milango ya watambikaji na Walawi wakitazama, ikawa hivi: mlango mmoja wa Elazari ukichukuliwa kwa kura, ukachukuliwa nao wa pili, kisha ukachukuliwa nao mmoja wa Itamari.[#1 Mambo 18:16.]

⁷Kura ya kwanza ikamwangukia Yoyaribu, ya 2 Yedaya,

⁸ya 3 Harimu, ya 4 Seorimu,

⁹ya 5 Malkia, ya 6 Miyamini,

¹⁰ya 7 Hakosi, ya 8 Abia,[#Luk. 1:5.]

¹¹ya 9 Yesua, ya 10 Sekania,

¹²ya 11 Eliasibu, ya 12 Yakimu,

¹³ya 13 Hupa, ya 14 Yesebabu,

¹⁴ya 15 Bilga, ya 16 Imeri,

¹⁵ya 17 Heziri, ya 18 Hapisesi,

¹⁶ya 19 Petaya, ya 20 Ezekieli,

¹⁷ya 21 Yakini, ya 22 Gamuli,

¹⁸ya 23 Delaya, ya 24 Mazia.

¹⁹Huu ulikuwa ukuu wao katika utumishi wao wa kuingia nyumbani mwa Bwana kwa matengenezo yao, aliyoyatoa baba yao Haroni, kama Bwana Mungu wa Isiraeli alivyomwagiza.

Wakuu wa Walawi.

²⁰Wale wana wengine wa Lawi ni hawa: Kwa wana wa Amuramu: Subaeli, kwa wana wa Subaeli: Yehedia.

²¹Kwake Rehabia: wana wa Rehabia mkuu wao alikuwa Isia.[#1 Mambo 23:17-23; 26:25.]

²²Kwao wa Isihari: Selomoti, kwa wana wa Selomoti: Yahati.

²³Nao wana wa Heburoni walikuwa Yeria, wa pili Amaria, wa tatu Yahazieli, wa nne Yekamamu.

²⁴Wana wa Uzieli ni Mika, kwa wana wa Mika: Samiri.

²⁵Ndugu ya Mika alikuwa Isia, kwa wana wa Isia alikuwa Zakaria.

²⁶Wana wa Merari walikuwa: Mahali na Musi na wana wa Mwanawe Yazia.

²⁷Wana wa Merari waliokuwa wa mwanawe Yazia ndio Sohamu na Zakuri na Iburi.

²⁸Wa Mahali alikuwa Elazari asiyekuwa na wana.

²⁹Wa Kisi ndio wana wa Kisi: Yerameli.

³⁰Wana wa Musi walikuwa Mahali na Ederi na Yerimoti. Hawa ndio wana wa Lawi kwa milango yao.

³¹Wao nao waliwapigia kura sawasawa kama ndugu zao wana wa Haroni, mfalme Dawidi na Sadoki na Ahimeleki na wakuu wa milango ya watambikaji na Walawi wakitazama; aliyekuwa mkuu wa mlango alipigiwa kura sawasawa kama ndugu yake mdogo.[#1 Mambo 25:8.]