1 Wakorinto 12

Vipaji vya Roho.

¹*Lakini ndugu, sitaki, ninyi mkose kuyajua mambo ya Kiroho.

²Mnajua: Mlikuwa wamizimu, napo po pote, mlipoongozwa, mlipenda kuyafuata matambiko ya vinyago visivyosema.[#Hab. 2:18-19.]

³Kwa hiyo nawatambulisha, ya kuwa hakuna mwenye Roho ya Mungu anayeweza kusema: Yesu na awe ameapizwa! Tena hakuna anayeweza kusema: BWANA NI YESU! asipokuwa na Roho takatifu.[#Mar. 9:39; 1 Yoh. 4:2-3.]

⁴Kweli yako mapitano ya magawio, lakini Roho ni yule mmoja.[#Rom. 12:6; Ef. 4:4-7.]

⁵Tena yako mapitano ya utumishi, lakini Bwana ni yule mmoja.[#1 Kor. 12:28; Ef. 4:11.]

⁶Tena yako mapitano ya nguvu, lakini Mungu anayevitia vyote nguvu kwa watu wote ni yule mmoja.

⁷Lakini kila mtu hufunuliwa kipaji chake cha Roho, kwa kwamba wote wakionee upato.[#1 Kor. 14:26.]

⁸Kwani mmoja hupewa na Roho kusema ya werevu wa kweli, mwingine kusema ya utambuzi unaopatana na Roho yule yule.

⁹Mwingine hupewa kumtegemea Mungu kwa nguvu ya Roho yuleyule, mwingine hupewa magawio ya kuponya wagonjwa kwa nguvu ya Roho yule mmoja.

¹⁰Mwingine hupewa kutenda ya nguvu, mwingine ufumbuaji, mwingine kuyapambanua ya Kiroho, mwingine misemo migeni, mwingine kuieleza ile misemo.[#1 Kor. 14:5; Tume. 2:4.]

¹¹Lakini haya yote huyatenda Roho yule mmoja akimgawia kila mmoja, kama anavyopenda.*[#1 Kor. 7:7; Rom. 12:3; Ef. 4:7.]

Mwili na viungo.

¹²Kwani ni kama vya mwili: ulio mmoja unavyo viungo vingi; tena viungo vyote vya mwili, ingawa ni vingi, ni mwili mmoja tu; vivyo hivyo naye Kristo.[#1 Kor. 10:17; 12:27.]

¹³Kwani kwa nguvu ya ile Roho moja tumebatiziwa sisi sote kuwa mwili mmoja, tukiwa Wayuda au Wagriki, tukiwa watumwa au waungwana; nasi sote tulinyweshwa Roho moja.[#Gal. 3:28.]

¹⁴Kwani nao mwili sio kiungo kimoja, ila vingi.[#1 Kor. 12:20.]

¹⁵Mguu ukisema: Kwa sababu si mkono, mimi si wa mwili, je? Kwa hiyo sio wa mwili?

¹⁶Nalo sikio likisema: Kwa sababu si jicho, mimi si la mwili je? Kwa hiyo silo la mwili?

¹⁷Mwili wote kama ungekuwa jicho, tungesikiaje? Kama wote ungekuwa sikio, tungenusaje?

¹⁸Lakini Mungu ameviweka viungo mwilini kila kimoja hapo, alipokitaka.

¹⁹Lakini vyote kama vingekuwa kiungo kimoja, mwili ungepatikana wapi?

²⁰Sasa viungo ni vingi, lakini mwili ni mmoja.[#1 Kor. 12:14.]

²¹Jicho haliwezi kuuambia mkono: Sikutumii; wala kichwa hakiwezi kuiambia miguu: Siwatumii ninyi.

²²Lakini ni hivyo: vile viungo vya mwili, tunavyoviwazia kuwa vinyonge, hatumika kuliko vingine.

²³Navyo, tunavyoviwazia kuwa vyenye soni, hupata heshima kuliko vingine; navyo visivyo vizuri hupambwa kuliko vingine.

²⁴Maana vile vilivyo vizuri machoni petu havipambwi. Lakini Mungu ameuunganisha mwili, nacho kilichopunguka uzuri akakipatia heshima kuliko vingine.

²⁵Maana mwilini msiwe na migawanyiko, ila viungo vipatane kutunzana kila kiungo na mwenziwe.

²⁶Napo kiungo kimoja kinapoumia, basi, viungo vyote huumia pamoja nacho; napo kiungo kimoja kinapotukuzwa, basi, viungo vyote hufurahi pamoja nacho.

²⁷Lakini ninyi m mwili wake Kristo, tena m viungo kila mmoja mahali pake.[#Rom. 12:5; Ef. 5:30.]

Mungu aliowawekea wateule.

²⁸Wako, Mungu aliowawekea wateule: kwanza mitume, wa pili wafumbuaji, wa tatu wafunzi, kisha wenye nguvu, kisha wenye magawio ya kuponya wagonjwa nao watumikizi nao wenye kuongoza nao wenye misemo migeni.[#Ef. 4:11-12.]

²⁹Wote ni mitume? Wote ni wafumbuaji? Wote ni wafunzi? Wote ni wenye nguvu?

³⁰Wote huponya wagonjwa? Wote husema misemo migeni? Wote hufumbua?

³¹Jikazeni, mpate magawio yapitayo hayo! Nami nitawaonyesha njia iliyo nzuri kuzipita zote.[#1 Kor. 14:1.]