1 Wakorinto 14

Misemo migeni na ufumbuaji.

¹Ukimbilieni upendo! Jikazeni, myapate ya Kiroho, kupita mengine, mweze kufumbua![#1 Kor. 12:10,31.]

²Kwani mwenye misemo migeni hasemi na watu, ila husema na Mungu. Kwani hapana amsikiaye, ila husema rohoni yasiyojulikana.[#Tume. 2:4.]

³Lakini mwenye kufumbua husema na watu akiwajenga na kuwaonya na kuwatuliza mioyo.

⁴Mwenye misemo migeni hujijenga mwenyewe tu; lakini mwenye kufumbua huwajenga wateule.

⁵Nataka, ninyi nyote mseme misemo migeni, lakini kupita hapo nataka, mfumbue. Kwani mwenye kufumbua ni mkubwa kuliko mwenye misemo migeni, isipokuwa aifumbue, wateule wakapata kujengwa.[#1 Kor. 12:10; 14:27-29; 4 Mose 11:29.]

⁶Lakini sasa, ndugu, kama ningekuja kwenu na kusema misemo migeni, ningewafaa nini, nisiposema nanyi nikiifunua au nikiitambulisha au nikiifumbua au nikiifundisha?[#1 Kor. 12:8.]

⁷Hivyo vingekuwa kama vyombo vinavyojililia tu pasipo roho, ikiwa zomari au zeze; milio isipotambulikana, yatajulikanaje yanayopigwa kwa zomari au kwa zeze?

⁸Tena ngoma isipolia na kusikilika, yuko nani atakayejitengeneza kwenda penye kondo?

⁹Vivyo hivyo nanyi mnaposema misemo migeni isiyojulikana, yale maneno yenu yatatambulikanaje? Kwani mtakuwa kama wanaojisemea tu na kupigia upepo.

¹⁰Misemo humu ulimwenguni ni mingi mno, lakini hakuna hata mmoja usiotambulika.

¹¹Nisipoijua maana ya msemo, nitakuwa kama mjinga kwake yeye anayeusema, naye asemaye atakuwa mjinga kwangu mimi.

¹²Nanyi hivyo, mjikazavyo kuyapata ya Kiroho, yatafuteni yaleyale yanayowajenga wateule, myaenee![#1 Kor. 14:1-4.]

¹³Kwa hiyo mwenye misemo migeni aombe, apate hata kuifumbua![#1 Kor. 12:10.]

¹⁴Kwani nikiomba kwa ile misemo migeni, roho yangu huomba, lakini mawazo yangu hayamo.

¹⁵Basi, yafaayo ndiyo nini? Niombe rohoni, tena niombe na kuwaza; niimbe rohoni, tena niimbe na kuwaza.[#Ef. 5:19.]

¹⁶Maana ukimtukuza Mungu rohoni, kama yuko asiyeyajua matukuzo yako, atawezaje kuyaitikia na kusema Amin? Maana hajui, unayoyasema.

¹⁷Kweli wewe unatukuza vizuri, lakini mwingine hajengwi.

¹⁸Namtukuza Mungu, ya kuwa naisema ile misemo migeni kuwapita ninyi nyote.

¹⁹Lakini kwenye wateule kusema maneno matano tu na kuyawaza, kwamba niwafundishe hata wengine, kwanipendeza kuliko kusema maneno elfu kumi kwa hiyo misemo migeni.

²⁰Ndugu, mawazo yenu yasiwe ya kitoto, ila uovu tu mfanane na vitoto vichanga! Lakini mawazo yenu sharti yawe ya watu wazima![#Ef. 4:14; Fil. 3:12,15.]

²¹Katika Maonyo imeandikwa:

Ukoo huu nitasema nao misemo migeni kwa midomo migeni,

lakini hata hivyo hawatanisikia; ndivyo, asemavyo Bwana.

²²Kwa hiyo ile misemo migeni ni kielekezo, lakini si kwao wamtegemeao Bwana, ila kwao wakataao kumtegemea; lakini ufumbuaji nao ni kielekezo, lakini si kwao wakataao kumtegemea, ila kwao wamtegemeao.

²³Kama wateule wote wanakusanyika pamoja, wote wakasema misemo migeni, tena pakiingia watu waliopumbaa au wasiomtegemea Bwana, je? Hawatasema: Mna wazimu?

²⁴Lakini kama wote wanafumbua, tena pakiingia asiyemtegemea Bwana au aliyepumbaa ataonywa nao wote na kuumbuliwa nao wote.

²⁵Hapo yaliyofichika moyoni mwake yanapofunuliwa, ndipo, atakapoanguka kifudifudi na kumtambikia Mungu na kuungama: Kweli Mungu yumo mwenu![#Yoh. 16:8.]

Misemo na mafumbuo.

²⁶Ndugu, yafaayo ndiyo nini? Mnapokusanyika, kila mtu kama yuko na wimbo au fundisho au ufunuo au misemo migeni au mafumbuo yao, yote pia sharti yaje kujenga.[#1 Kor. 11:18,20; 12:8-10; Ef. 4:12.]

²⁷Mtu akisema misemo migeni, basi, wawe kama wawili au watatu tu, wasipite hapo, nao waseme mmoja mmoja, kisha mmoja aifumbue.

²⁸Lakini kama hayuko mwenye kufumbua, basi, wanyamaze penye wateule, ila waseme mioyoni na Mungu.

²⁹Lakini wafumbuaji waseme wawili au watatu, nao wengine wasikilize tu, wayatambue.[#Tume. 17:11; 1 Tes. 5:21.]

³⁰Lakini kama mwingine anayekaa anafunuliwa neno, wa kwanza na anyamaze.

³¹Kwani mwaweza wote kila mmoja kufumbua, wote wapate kujifunza, wao wote waonyeke.

³²Nazo roho za wafumbuaji huwatii wafumbuaji.

³³Kwani Mungu si Mungu wa uvurugo, ila ni Mungu wa utulivu.

Wanawake wanyamaze penye wateule.

³⁴Kama ilivyo kwa wateule wote waliotakata, wanawake wanyamaze penye wateule! Kwani wao haiwapasi kusema, ila watii, kama Maonyo yanavyosema.[#1 Kor. 11:3; 1 Mose 3:16; Ef. 5:22; 1 Tim. 2:12; Tit. 2:5.]

³⁵Lakini wanapotaka kujifunza neno, na wawaulize waume wao nyumbani! Kwani haifai kabisa, mwanamke akisema penye wateule.

³⁶Au je? Neno la Mungu limetoka kwenu, au limewafikia ninyi peke yenu tu?

³⁷Mtu akijiwazia kuwa mfumbuaji au mwenye Roho na ayatambue, ninayowaandikia, ya kuwa yameagizwa na Bwana![#1 Yoh. 4:6.]

³⁸Lakini mtu asipoyajua, basi, na akae pasipo kuyajua!

³⁹Kwa hiyo, ndugu zangu, jikazeni mpate kufumbua, nako kule kusema misemo migeni msikukataze!

⁴⁰Lakini myafanye yote, kama ipasavyo, yaendelee vizuri![#Kol. 2:5.]