1 Wakorinto 3

Maziwa na chakula.

¹Nami ndugu, sikuweza kusema nanyi, kama m wenye Roho, m wenye miili tu, m vitoto vichanga katika mambo ya Kristo; kwa hivyo nimesema nanyi kitoto.[#Yoh. 16:12.]

²Nimewanyonyesha maziwa, sikuwalisha vyakula vigumu, maana hamjaviweza bado. Lakini hata sasa hamviwezi bado,[#Ebr. 5:12-13; 1 Petr. 2:2.]

³kwa sababu mngali bado wenye miili tu. Maana ukiwako kwenu wivu na ugomvi, basi, ninyi ham wenye miili tu? Huu mwenendo wenu sio wa kimtu?[#1 Kor. 1:10-11; 11:18.]

⁴Maana mmoja akisema: Mimi wa Paulo, na mwingine: Mimi wa Apolo, basi, ninyi ham wa kimtu?[#1 Kor. 1:12.]

Kupanda na kunywesha.

⁵Apolo ni nani? Paulo ni nani? Tu watumishi waliowafundisha kumtegemea Bwana, kila mmoja wetu, kama Bwana alivyompa:[#Tume. 18:24,27.]

⁶mimi nilipanda, Apolo akanywesha, lakini Mungu ndiye aliyeotesha.[#Tume. 18:1-4,11.]

⁷Kwa hiyo apandeye siye, wala anyweshaye siye, ila Mungu aoteshaye ndiye.

⁸Lakini apandaye naye anyweshaye sisi tu wamoja, lakini tutapata kila mmoja wake mshahara wa masumbuko yake mwenyewe.[#1 Kor. 4:5.]

⁹Maana sisi tunasaidiana kazi na Mungu, ninyi m shamba lake Mungu, tena m jengo lake Mungu.[#Mat. 13:3-9; Ef. 2:20.]

Msingi wa Mungu.

¹⁰Kwa werevu wa kweli, niliogawiwa na Mungu, mimi niliweka msingi kama fundi aliye mwenye ubingwa wa jengo; lakini mwingine anajenga juu yake. Lakini kila aangalie, jinsi anavyojenga juu yake![#1 Kor. 15:10.]

¹¹*Kwani hakuna anayeweza kuweka msingi mwingine pasipo ule uliokwisha kuwekwa, ulio Yesu Kristo.[#1 Petr. 2:4-6.]

¹²Lakini mtu akijenga juu ya msingi huo kama dhahabu au fedha au mawe yenye bei kubwa au miti au nyasi au mabua,

¹³basi, kila mtu kazi yake itatokea waziwazi. Siku ile itaipambanua, maana itafunuliwa kwa kuunguzwa na moto; ni ule moto utakaoumbua, kazi ya kila mtu ilivyo.[#1 Kor. 4:5.]

¹⁴Jengo la mtu, alilolijenga juu yake likikaa, atapokea mshahara wake;

¹⁵kama jengo la mtu linateketea, atapotelewa nalo, lakini mwenyewe ataokolewa, lakini itakuwa kama kuokolewa motoni.

Nyumba ya Mungu.

¹⁶Hamjui, ya kuwa ninyi m nyumba ya Mungu, ya kuwa Roho wa Mungu hukaa ndani yenu?[#1 Kor. 6:19; 2 Kor. 6:16.]

¹⁷Mtu akiiangamiza nyumba yake Mungu, Mungu atamwangamiza yeye. Maana nyumba yake Mungu ni takatifu, ndiyo ninyi.

¹⁸Mtu asijidanganye! Ikiwa mtu wa kwenu anajiwazia kuwa mwenye werevu wa kweli katika ulimwengu huu, sharti apumbae, apate kuwa mwerevu wa kweli![#Ufu. 3:17-18.]

¹⁹Kwani huo werevu wa ulimwengu huu ni upumbavu kwa Mungu, maana imeandikwa:

Wenye ubingwa huwanasa katika werevu wao mbaya.

²⁰Na tena:

Bwana huyatambua mawazo ya wenye werevu kuwa ya bure.

²¹Kwa hiyo mtu asijivune kwa wenziwe! Kwa maana yote ni yenu,

²²akiwa Paulo au Apolo, akiwa Kefa, au ukiwa ulimwengu, kukiwa kuishi au kufa, yakiwa yaliyopo au yatakayokuwapo, yote ni yenu.

²³Lakini ninyi m wake Kristo, naye Kristo ni wake Mungu.*[#1 Kor. 11:3.]