1 Wakorinto 4

Watunzaji wa mafumbo ya Mungu.

¹*Hivyo kila mtu atuwazie sisi kuwa watumikizi wa Kristo na watunzaji wa mafumbo yake Mungu.[#Tit. 1:7.]

²Tena kwa watunzaji halitafutwi jingine, ni hili tu, ajulike kuwa mwelekevu.[#Luk. 12:42.]

³Kwangu mimi si kitu, nikihukumiwa nanyi au na wengine wanaohukumu kimtu; nami mwenyewe sijihukumu,

⁴kwani sinacho kibaya, ninachokijua moyoni. Lakini kwa hivyo si mwongofu; ila atakayenihukumu ni Bwana.[#Sh. 143:2.]

⁵Kwa hiyo msihukumu neno lo lote siku hizi, mpaka Bwana atakapokuja; yeye ndiye atakayeyatia mwangani yaliyofichwa gizani; tena ndiye atakayeyafumbua waziwazi mawazo ya mioyo. Hapo ndipo, kila mtu atakapoonea sifa yake kwa Mungu.*[#1 Kor. 3:8; Mbiu. 12:14.]

Imetupasa kunyenyekea.

⁶Ndugu, kwa ajili yenu nimeyasema haya kama mfano wa mimi na Apolo, mpate kujifundishia kwetu sisi, msijikweze kupapita hapo palipoandikwa kwamba: Mtu asijitutumue kuwa mkuu kuliko mwenziwe na kumpunguza mwingine![#Rom. 12:3; 1 Tim. 1:6-7.]

⁷Je? Yuko anayekupatia wewe macheo zaidi? Unacho kitu gani, usichopewa? Lakini kama umepewa, wajivuniaje, kama hukupewa?

⁸Mmekwisha kushiba, mmekwisha kupata mali nyingi, mkatwaa nao ufalme, msiopewa na sisi. Tunataka sana, mwe wafalme, nasi tupate kuwa wafalme wenzenu.

⁹Maana naona, ya kuwa Mungu ametuweka sisi mitume kuwa wa mwisho, kama watu wanaopaswa na kuuawa, kwani sisi ndio wanaotazamwa nao wa ulimwengu wote: malaika, hata watu.

¹⁰Sisi tu wapumbavu kwa ajili ya Kristo, lakini ninyi m wenye akili kwa kuwa naye Kristo. Sisi tu wanyonge, ninyi m wanguvu. Ninyi mwatukuzwa, lakini sisi twabezwa.

¹¹Mpaka saa hii ya sasa maumivu yetu yako, ni haya: njaa na kiu na uchi na mapigo na kukosa kikao;

¹²twasumbuka tukifanya kazi na mikono yetu sisi. Tukitukanwa twaombea mema; tukifukuzwa twavumilia;[#1 Kor. 9:15; Sh. 109:28; Luk. 6:27-28; Tume. 18:3; 20:34; Rom. 12:14; 1 Tes. 2:9; 2 Tes. 3:8.]

¹³tukisingiziwa twabembeleza. Tumekuwa kama taka za ulimwengu, kama kifusi chao wote hata sasa hivi.

¹⁴Siyaandiki haya, niwatie soni, ila nawaonya kama watoto wangu, ninaowapenda.

¹⁵Kwani ingawa mnao wafunzi maelfu katika Kristo, lakini hamnao baba wengi. Kwani mimi ndiye niliyewazaa katika Kristo Yesu kwa kuwapigia hiyo mbiu njema.[#Gal. 4:19.]

¹⁶Kwa hiyo nawaonya, mniige mimi.[#1 Kor. 11:1.]

¹⁷Kwa sababu hii nimemtuma Timoteo kwenu, huyu ni mtoto wangu mpendwa na mwelekevu katika Bwana. Yeye atawakumbusha njia zangu zilizo katika Kristo, kama ninavyowafundisha wateule wote po pote.[#Tume. 19:22.]

¹⁸Lakini wako wanaojivuna, kwamba mimi siji kwenu.

¹⁹Lakini nitakuja kwenu upesi, Bwana akitaka; ndipo, nitakapozitambua nguvu zao, wanazojivunia, si maneno yao tu.[#Tume. 18:21; Yak. 4:15.]

²⁰Maana ufalme wa Mungu sio wa kujisemea, ila uko na nguvu.[#1 Kor. 2:4; Luk. 17:20.]

²¹Mnataka nini? Nije kwenu nikishika fimbo, au nije mwenye upendo na roho ya upole?