1 Wakorinto 5

Kumtenga mgoni.

¹Po pote panasikilika, ya kwamba kwenu uko ugoni; tena ugoni ulio hivyo hata kwa wamizimu hauko, mtu akiwa na mke wa baba yake.[#3 Mose 18:7-8.]

²Nanyi mnajitutumua, hamkusikitika hata kidogo. Je? Aliyekifanyiza kitendo hicho ameondolewa kati yenu?

³Hata nisipokuwako kwenu na mwili wangu, lakini moyo uko kwenu. Hivyo, kama niko kwenu, nimekwisha kumhukumu yule aliyekitenda kibaya kilicho hivyo:[#Kol. 2:5.]

⁴katika Jina la Bwana Yesu kusanyikeni ninyi na roho yangu pamoja na nguvu ya Bwana wetu Yesu![#Mat. 16:19; 18:18; 2 Kor. 13:10.]

⁵Kisha yule mtu aliye hivyo mmtoe na kumpa Satani, mwili wake uangamizwe, roho yake ipate kuokoka, siku ile ya Bwana itakapotimia.[#1 Kor. 11:32; 1 Tim. 1:20.]

⁶Majivuno yenu si mema. Hamjui, ya kuwa chachu kidogo hulichachusha donge lote?[#Gal. 5:9.]

⁷Iondoeni kabisa ile chachu ya kale, mpate kuwa donge jipya kwa hivyo, mlivyo pasipo chachu!

*Kwani nasi tumechinjiwa kondoo wetu wa Pasaka, ndiye Kristo.

⁸Kwa hiyo tuile sikukuu yetu pasipo chachu ya kale wala chachu yenye uovu na ubaya, tuyapate yale yasiyochachwa, ndiyo mioyo ing'aayo iliyo yenye ukweli.*

⁹Naliwaandikia ninyi katika barua yangu kwa kwamba: Msichanganyike na wagoni![#Mat. 18:17; 2 Tes. 3:14.]

¹⁰Hapo sikuwasema wagoni wa ulimwengu huu au wenye choyo na wanyang'anyi au wenye kutambikia mizimu. Kama vingekuwa hivyo, ingewapasa kutoka ulimwenguni.

¹¹Lakini hapo nimewaandikia, msichanganyike na mtu aitwaye ndugu, akiwa mgoni au mwenye choyo au mtambikia mizimu au mwenye matusi au mlevi au mnyang'anyi; basi, ndugu aliye hivyo msile naye![#2 Tes. 3:6; Tit. 3:10; 2 Yoh. 10.]

¹²Kwani nina jambo gani nao walioko nje, niwaumbue? Nanyi si kazi yenu kuwaumbua hao, mlionao?[#Mar. 4:11.]

¹³Walioko nje Mungu ndiye atakayewaumbua. Mwondoeni yule mbaya, atoke katikati yenu ninyi![#5 Mose 13:5.]