1 Wakorinto 6

Kutafuta maamuzi kwao wapotovu.

¹Inakuwaje, mtu wa kwenu aliye na jambo na mwenziwe akijipa moyo wa kuja kushtaki mbele yao walio wapotovu, asije mbele yao walio watakatifu?

²Au hamjui, ya kuwa watakatifu watauhukumu ulimwengu? Ikiwa ulimwengu utahukumiwa nanyi, isiwapase kuamulia mambo yaliyo madogo?[#Dan. 7:22; Mat. 19:28; Ufu. 3:21.]

³Hamjui, ya kuwa tutahukumu malaika? Nayo ya huku nchini yasitupase?

⁴Mkitaka kushtakiana mambo ya huku nchini, inakuwaje, mkiwaketisha katika kiti cha uamuzi wale wanaobezwa kwa wateule?

⁵Haya nayasemea kuwatia soni. Je? Kwenu hakuna hata mmoja mwenye werevu wa kweli awezaye kuamua ndugu na mwenzake?

⁶Kwenu sharti ndugu na ndugu washtakiane, kisha wapelekane kwao wasiomtegemea Mungu?

⁷Kweli hayo mambo yote ya kushtakiana ninyi kwa ninyi ni kukosa utimilifu. Sababu gani hamtaki kupotolewa? Tena sababu gani hamtaki kunyang'anywa?[#Mat. 5:38-41; 1 Tes. 5:15; Ebr. 10:34; 1 Petr. 3:9.]

⁸Lakini ninyi mwapotoana, mwanyang'anyana wenyewe, tena m ndugu!

⁹Au hamjui, ya kuwa wapotovu hawataurithi ufalme wa Mungu? Msipotelewe! Wagoni na watambikia vinyago na wavunja unyumba na walegevu na wenye kulalana

¹⁰na wezi na wenye choyo na walevi na wenye matusi na wanyang'anyi, hao wote hawatautwaa ufalme wa Mungu.[#Gal. 5:19-21.]

¹¹Hata kwenu wako walio hivyo. Lakini mmeoshwa, tena mmetakaswa, mkaupata wongofu uliomo katika Jina la Bwana Yesu Kristo na katika Roho ya Mungu wetu.[#Tit. 3:3-7.]

Miili ya Wakristo ni viungo vya Kristo.

¹²Kwangu mimi hakuna cho chote chenye mwiko, lakini sivyo vyote vifaavyo: kwangu mimi hakuna cho chote chenye mwiko, lakini kitakachonishinda sikitaki kamwe.[#1 Kor. 10:23.]

¹³Vyakula ni vya tumbo, nalo tumbo ni la vyakula; naye Mungu atavitowesha vyote viwili. Lakini mwili sio wa ugoni, ila wa Bwana, yeye Bwana ni mwenye mwili.[#1 Tes. 4:3-5.]

¹⁴Mungu alimfufua Bwana, vivyo hivyo atatufufua hata sisi kwa nguvu yake.[#1 Kor. 15:15,20; Rom. 8:11; 2 Kor. 4:14.]

¹⁵Hamjui, ya kuwa miili yenu ni viungo vyake Kristo? Je? Nivichukue viungo vyake Kristo, nivigeuze kuwa vya ugoni? La, sivyo![#1 Kor. 12:27.]

¹⁶Au hamjui, ya kuwa mwenye kugandamiana na mke mgoni amekwisha kuwa mwili mmoja naye? Maana asema: Hao wawili watakuwa mwili mmoja.[#1 Mose 2:24.]

¹⁷Lakini mwenye kugandamiana na Bwana watakuwa roho moja.[#Yoh. 17:21-22; Gal. 2:20; Ef. 5:30.]

¹⁸Ukimbieni ugoni! Kosa lo lote, mtu atakalolifanya, liko nje ya mwili wake, lakini mgoni huukosea mwili wake mwenyewe.

¹⁹Au hamjui, ya kuwa miili yenu ni nyumba yake Roho Mtakatifu awakaliaye? Ndiye, mliyepewa na Mungu, ninyi ham wenye ninyi.[#1 Kor. 3:16.]

²⁰Mmenunuliwa pakubwa, kwa hiyo mtukuzeni Mungu miilini na rohoni mwenu! Maana ni yake Mungu.[#1 Kor. 7:23; Fil. 1:20; 1 Petr. 1:18-19.]