1 Wakorinto 7

Unyumba.

¹Mambo, mliyoniandikia, nayajibu hivi: Ni vizuri, mtu asipogusa mwanamke.

²Lakini kwa ajili ya ugoni kila mtu awe na mkewe mwenyewe, hata kila mwanamke awe na mumewe mwenyewe.

³Mume ampe mkewe yampasayo, naye mke ampe mumewe yayo hayo.

⁴Mke siye mwenye mwili wake, ila mumewe; vilevile naye mume siye mwenye mwili wake, ila mkewe.

⁵Msinyamane, isipokuwa mmepatana kukaa hivyo kitambo kidogo, mjipatie siku za kufunga na za kuomba. Kisha mwandamane tena, Satani asipate kuwajaribu, kwani hamwezi kuvumilia pasipo kukoma.

⁶Haya nayasema, kama ninavyoyatambua mimi, lakini siyo ya kuagiza.

⁷Kupenda napenda, watu wote wawepo kama mimi mwenyewe; lakini kila mtu amegawiwa na Mungu kipaji chake yeye, mmoja hivyo, mwenzake hivyo.[#Mat. 19:12.]

Kuachana.

⁸Lakini wasiooa na wajane nawaambia: Itawafalia, wakikaa kama mimi.

⁹Lakini kama hawawezi kujivumiliza, na waoe. Kwani kuoa ndiko kuzuri kuliko kuchomwa na tamaa.[#1 Tim. 5:14.]

¹⁰Nao waliokwisha oana nawaagiza, tena si mimi, lakini ni Bwana: Mke asiachane na mumewe![#1 Kor. 7:12,25,40; Mat. 5:32.]

¹¹Lakini mke akiwa ameachana na mumewe, sharti akae pasipo kuolewa au apatanishwe tena na mumewe! Naye mume asiachane na mkewe!

¹²Nao wengine nawaambia mimi, si Bwana: Aliye ndugu akiwa na mke asiyemtegemea Mungu, naye mkewe anapenda kukaa naye, asimwache!

¹³Naye mwanamke akiwa na mume asiyemtegemea Mungu, naye mumewe anapenda kukaa naye, asimwache mumewe!

¹⁴Kwa maana mume asiyemtegemea Mungu hutakaswa na mkewe; naye mke asiyemtegemea Mungu hutakaswa naye aliye ndugu. Ikiwa sivyo, watoto wenu wangekuwa wachafu, lakini sasa wametakata.[#Rom. 11:16.]

¹⁵Lakini wale wasiomtegemea Mungu wakitaka kuvunja unyumba, na wauvunje! Hapo aliye ndugu, akiwa mume au akiwa mke, hakuna kifungo tena kinachomzuia; kwani ninyi Mungu amewaitia mapatano.[#Rom. 14:19.]

¹⁶Kwani wajuaje, wewe mke, kama utamwokoa mumeo? Au wajuaje, wewe mume, kama utamwokoa mkeo?[#1 Petr. 3:1.]

¹⁷Kwa hiyo nasema: Kila mtu avishike, Bwana alivyomgawia, kila mtu aendelee hivyo, alivyokuwa hapo, Mungu alipomwita! Hivyo ndivyo, ninavyoagiza katika wateule wote.[#1 Kor. 7:20,24.]

¹⁸Mtu akiitwa alipokwisha kutahiriwa asivifiche! Mtu akiitwa akiwa hajatahiriwa, asitahiriwe!

¹⁹Kule kutahiriwa siko, nako kutotahiriwa siko, ila kuyashika maagizo ya Mungu ndiko.[#Gal. 5:6; 6:15.]

²⁰Kila mtu hivyo, alivyokuwa alipoitwa, na akae vivyo hivyo![#1 Kor. 7:17,24.]

²¹Kama ulikuwa mtumwa ulipoitwa, usivionee uchungu! Lakini ukiweza kujikomboa jikomboe![#Ef. 6:8.]

²²Kwani mtumwa aliyeitiwa kuwa wa Bwana amekwisha kukombolewa na Bwana. Vivi hivi mwungwana aliyeitwa ni mtumwa wa Kristo.[#Ef. 6:6; File. 16.]

²³Mmenunuliwa pakubwa. Msiwe tena watumwa wa watu![#1 Kor. 6:20.]

²⁴Ndugu zangu, kila mtu hivyo, alivyokuwa hapo alipoitwa, sharti akae vivyo hivyo kwa Mungu![#1 Kor. 7:17,20; Gal. 3:28.]

Wanawali.

²⁵Kwa ajili ya wanawali sikupata agizo la Bwana, ninawaambia, ninayoyatambua kwa hivyo, nilivyogawiwa na Bwana kuwa mwelekevu.[#1 Kor. 7:10,40; 1 Tes. 2:4; 1 Tim. 1:12-13.]

²⁶Nionavyo kuwa vizuri, ni hivi: kwa ajili ya shida hii, tuliyo nayo inamfaa mtu kukaa hivyo, alivyo:[#1 Kor. 7:29; 10:11.]

²⁷ukiwa umejifunga kuwa na mke usitafute kufunguliwa! Usipokuwa umejifunga kuwa na mke usitafute mke!

²⁸Lakini hata ukioa hukosi, naye mwanamwali akiolewa hakosi. Lakini wafanyao hivyo huipatia miili maumivu, nayo ndiyo, mimi ninayoyataka kuwaponya

²⁹Lakini nasema hivi, ndugu zangu: Siku zimepunguka. Hapo panaposalia nao wenye wake sharti wawe, kama hawana! Nao wenye kulia wawe kama wasiolia![#Luk. 14:26; Rom. 13:11.]

³⁰Nao wenye furaha wawe kama wasiofurahi! Nao wenye kununua wawe, kama hawana kitu!

³¹Nao wenye kuvitumia vya ulimwengu huu wawe, kama wanajitumilia bure tu! Kwani ulimwengu huu, jinsi ulivyo sasa, unatoweka.[#1 Yoh. 2:15-17.]

³²Nataka, msipatwe na masumbuko. Asiyeoa huyasumbukia mambo ya Bwana, apate kumpendeza Bwana.

³³Aliyeoa huyasumbukia mambo ya ulimwenguni, apate kumpendeza mkewe; hivyo amekwisha kugawanyika.[#Luk. 14:20; Ef. 5:29.]

³⁴Nayo ya mke na ya mwanamwali ni yaleyale: mke asiye na mume naye mwanamwali huyasumbukia mambo ya Bwana, apate kutakata mwilini na rohoni. Lakini mwenye mume huyasumbukia mambo ya ulimwenguni, apate kumpendeza mumewe.

³⁵Lakini haya nayasema, kwa kuwa yanawafaa; siyasemi, niwategee kitanzi, ila nayasemea kwamba: Yenu yote yaendelee, kama yapasavyo, mfulize kumkalia Bwana pasipo kuzuiliwa.

³⁶Lakini mtu akiona, ya kama haimfai mwanawe wa kike, akiwa mtu mzima pasipo kuolewa, -nayo hufikia hapohapo-, basi, na afanye, kama atakavyo! Hakosi, na amwoze!

³⁷Lakini aliyeushikiza moyo wake ukashupaa vizuri, usiteseke, yuko na nguvu ya kuyashinda mapenzi yake mwenyewe; basi, mtu aliye hivyo akijipa moyo wa kumkataza mwanawe wa kike kuolewa, atafanya vizuri.

³⁸Hivyo amwozaye mwanawe wa kike anafanya vizuri, lakini asiyemwoza mwanawe wa kike anafanya vizuri kumpita yule.

³⁹Mke yuko na mwiko siku zote za kuishi kwake mumewe; lakini mumewe anapokufa, amefunguliwa kuolewa naye ye yote, ampendaye, ikiwa tu, kama Bwana atakavyo.[#Rom. 7:2.]

⁴⁰Lakini vitakavyomfaa kupita hivi ni kukaa hivyo, alivyo. Hivyo ndivyo, nionavyo mimi; lakini najiwazia, ya kwamba nami ninayo Roho ya Mungu.[#1 Kor. 7:25.]