1 Wakorinto 8

Nyama za tambiko.

¹Mambo ya nyama za tambiko twayajua kwamba: Sote tumeyatambua; tena: Utambuzi huleta majivuno, lakini upendo hujenga.[#1 Kor. 8:4; Tume. 15:29.]

²Lakini mtu akijiwazia, ya kuwa amekwisha kutambua kitu, basi, yeye hajautambua bado utambuzi upasao.[#Gal. 6:3.]

³Lakini mtu akimpenda Mungu, huyo ametambuliwa naye.[#Gal. 4:9.]

⁴Kwa ajili ya kula nyama za tambiko tunajua: hakuna, kinyago kifaliacho humu ulimwenguni, tena hakuna aliye Mungu pasipo mmoja.[#1 Kor. 10:19; 5 Mose 6:4.]

⁵Kweli viko viitwavyo miungu, kama vya mbinguni au vya ulimwenguni, kwa hiyo miungu yao ni mingi nao mabwana zao ni wengi,[#Sh. 136:2-3; Rom. 8:38-39.]

⁶lakini kwetu sisi Mungu ni mmoja, ni Baba. Yote yametoka kwake, nasi tu watu wake. Tena Bwana ni mmoja, Yesu Kristo; vyote viliumbwa naye yeye, hata sisi tumeumbwa naye.[#1 Kor. 12:5-6; Ef. 4:5-6; Kol. 1:16.]

⁷Lakini sio wote walio wenye utambuzi huu. Kwa hivyo, walivyozoea kutambikia mizimu, hata sasa wako wanaozila zile nyama, zikiwa za tambiko, lakini mioyo yao iliyo minyonge huchafuliwa kwa kujua maana.[#1 Kor. 10:27.]

⁸Tena hakuna, vyakula vinavyotupatia kwake Mungu. Ikiwa tukila, hakuna tunachoongezewa; ikiwa hatuli, hakuna tunachopungukiwa.[#Rom. 14:17.]

⁹Mwangalie tu, matumio yenu yasikwaze wanyonge!

¹⁰Maana wewe uliyeyatambua hayo ukikaa hapo, wanapotambikia mizimu, ule nyama machoni pa mwenzio aliye mnyonge kwa kutojua maana vema, je? Hatahimizwa moyoni mwake, mpaka naye azile nyama zile za tambiko?[#Gal. 5:13.]

¹¹Hivyo kwa ajili ya utambuzi wako mnyonge anaponzwa, naye ni ndugu, ambaye Kristo alikufa kwa ajili yake.[#Rom. 14:15.]

¹²Mkiwakosea ndugu hivyo na kuiponza mioyo yao iliyo minyonge kwa kutojua maana vema, basi, mnamkosea Kristo mwenyewe.

¹³Kwa hiyo, chakula kikimkwaza ndugu yangu, sitakula nyama kale na kale, maana nisimkwaze ndugu yangu.[#Rom. 14:21.]