1 Wakorinto 9

Matumio yampasayo mpiga mbiu.

¹Je? Mimi sikukombolewa? Mimi si mtume? Mimi sikumwona Bwana wetu Yesu Kristo? Nanyi ham kazi yangu, niliyomfanyizia Bwana?[#1 Kor. 15:8; Tume. 9:3-5; 22:17; 26:16.]

²Nisipokuwa mtume wa wengine, lakini ninyi ndimi mtume wenu. Kwani ninyi m muhuri inayoujulisha utume wangu, ya kuwa ni wa Bwana.[#1 Kor. 4:15; 2 Kor. 3:2-3.]

³Makanio yangu kwao wanaoniulizauliza ndiyo haya ya kwamba:[#Luk. 10:8.]

⁴Je? Hatuna ruhusa ya kula na ya kunywa yo yote?

⁵Hatuna ruhusa pote, tunapokwenda, kuchukua na mke aliye ndugu, kama wanavyofanya mitume wengine na ndugu za Bwana, hata Kefa?[#Mat. 8:14; Yoh. 1:42.]

⁶Au labda mimi na Barnaba peke yetu hatuna ruhusa ya kuwapo pasipo kazi?

⁷Yuko askari aendaye vitani na kujilipa mwenyewe? Yuko mpanda mizabibu asiyekula matunda yao? Au yuko mchunga kundi asiyetumia maziwa ya kundi kuwa kitoweo?

⁸Haya nayasema kimtu? Maonyo nayo hayayasemi yayo hayo?

⁹Kwani imendikwa katika Maonyo ya Mose:

Ng'ombe mwenye kupura ngano usimfunge kinywa! Hapo Mungu anataka kuwapatia ng'ombe?

¹⁰Hapasemi kabisa kwa ajili yetu sisi? Kweli imeandikwa kwa ajili yetu sisi kwa kufaa, mkulima alimie kingojeo, naye mwenye kupura apurie kingojeo cha kugawiwa.

¹¹Kama sisi tumewapandia ya kutunza roho, ni vikubwa gani, sisi tukivuna yenu ya kutunza miili?[#15:27.]

¹²Ikiwa wengine wamepata ruhusa ya kula matumio yenu, hayatupasi sisi kuliko wale? Lakini hatukuitumia hiyo nguvu yetu, ila twayavumilia yote, kwamba Utume mwema wa Kristo tusiuzuie kamwe.[#Tume. 20:34-35; 2 Kor. 11:9.]

¹³Hamjui, ya kuwa hao watumikiao Patakatifu hula yatokayo Patakatifu? Nao wachinja ng'ombe za tambiko hugawiwa fungu lao hapo chinjioni?[#4 Mose 18:8,31; 5 Mose 18:1-3.]

¹⁴Vivyo hivyo naye Bwana aliwaagiza watangazaji wa Utume mwema, wajilishe huo Utume mwema.[#Luk. 10:7.]

¹⁵Lakini mimi sikuyatumia mambo hayo hata moja. Nami sikuyaandika haya, kwamba yanitimilie hivyo; maana ningependa kufa kuliko kutenguliwa hilo tukuzo langu.[#Tume. 18:3.]

¹⁶Kwani nikiipiga hiyo mbiu njema sinalo la kujivunia, maana nitashurutishwa. Kwani nisipoipiga hiyo mbiu njema ningepatwa na mambo.

¹⁷Kwani nikiyafanya kwa kuyapenda, napata mshahara; lakini nikiyafanya pasipo kupenda, nako ndiko kuutimiza utunzaji niliopewa.[#1 Kor. 4:1.]

¹⁸Basi, mshahara wangu ndio nini? Ni huu: nautangaza Utume mwema pasipo upato, nisiyatangue matumio yangu yaliyomo katika huo Utume mwema.[#1 Kor. 8:9.]

Paulo mtumwa wao wote.

¹⁹Maana mimi niliyekombolewa katika utumwa wote nimejigeuza kuwa mtumwa wao wote, kusudi walio wengi niwapate, wanifuate.[#Mat. 20:26-27.]

²⁰Kwao walio Wayuda nimekuwa kama Myuda, niwapate Wayuda. Kwao wenye miiko nimekuwa kama mwenzao mwenye miiko, tena miiko sinayo, ni kwamba tu, niwapate wenye miiko nao.[#Tume. 16:3; 21:20-26.]

²¹Kwao wasiojua maonyo nimekuwa kama mwenzao asiyejua maonyo, tena sipo pasipo Maonyo yake Mungu, kwani nayakalia Maonyo yake Kristo; huko ni kwamba tu, niwapate nao wasiojua maonyo.[#Gal. 2:3.]

²²Kwao walio wanyonge nimekuwa kama mnyonge mwenzao, niwapate walio wanyonge nao. Hivyo wote nimejifananisha nao katika mambo yo yote, nipate po pote wenye kuokoka.[#Rom. 11:14; 2 Kor. 11:29.]

²³Hayo nayafanya yote kwa ajili ya Utume mwema, nami nipate kugawiwa bia yake.

Mashindano.

²⁴*Hamjui: Penye mashindano wote hupiga mbio, lakini atakayepewa tunzo ni mmoja tu? Nanyi pigeni mbio hivyo, kusudi mpewe![#Fil. 3:14; 2 Tim. 4:7.]

²⁵Lakini kila aendaye kushindania hujinyima yote; hao hujinyima, wapewe kilemba kiangamiacho, lakini ninyi mjinyime, mpewe kilemba kisichoangamika![#2 Tim. 2:4-5; 1 Petr. 5:4.]

²⁶Basi, nami napiga mbio hivyo, si kama sijui, ninavyokimbilia; napigana, lakini si kama anayejipigia tu.

²⁷Ila nauponda mwili wangu, mpaka nguvu zake ziishie kama za mtumwa, maana mimi ninayetangazia wengine nisije kuwa mwenye kutupwa.*[#Rom. 8:13; 13:14.]