1 Yohana 4

Asiyemwungama Yesu hakutoka kwa Mungu.

¹Wapendwa, msiitikie kila roho, ila zijaribuni roho, kama zimetoka kwa Mungu! Kwani wafumbuaji wa uwongo wengi wametokea ulimwenguni.[#Mat. 7:15; 1 Tes. 5:21.]

²Hapo ndipo, mtakapoitambua roho ya Mungu: kila roho inayoungama, ya kuwa Yesu Kristo amekuja mwenye mwili wa kimtu, imetoka kwa Mungu.

³Lakini kila roho isiyomwungama Yesu haikutoka kwa Mungu. Hiyo ndiyo roho ya Mpinga Kristo, mliyoisikia, ya kuwa inakuja; tena sasa imekwisha kuwamo humu ulimwenguni.[#1 Yoh. 2:18; 1 Kor. 12:3.]

⁴Vitoto, ninyi m wa Kimungu, tena mmewashinda wale, kwani yeye alimo mwenu ni mkubwa kuliko yeye aliomo humu ulimwenguni.

⁵Wale ni wa kiulimwengu; kwa hiyo husema ya kiulimwengu, nao wa kiulimwengu huwasikia.[#Yoh. 15:19.]

⁶Sisi tu wa Kimungu; naye amtambuaye Mungu hutusikia sisi, lakini asiye wa Kimungu hatusikii sisi. Hapo twaitambua roho, kama ni ya kweli au ya upotevu.[#Yoh. 8:47.]

Mungu ni pendo.

⁷Wapendwa, tupendane sisi kwa sisi! Kwani upendo ni wa Kimungu. Kila mwenye kupenda amezaliwa naye Mungu, naye humtambua Mungu.

⁸Asiyependa hakumtambua Mungu kwamba: Mungu ni upendo.[#1 Yoh. 4:16.]

⁹*Upendo wake Mungu wa kutupenda sisi umeonekana waziwazi hapo, Mungu alipomtuma Mwana wake wa pekee kuja ulimwenguni, sisi tupewe naye uzima.[#Yoh. 3:16.]

¹⁰Humu ndimo upendo: sio sisi tuliompenda Mungu, ila yeye alitupenda sisi, akamtuma Mwana wake kuwa kole kwa ajili ya makosa yetu.[#1 Yoh. 2:2.]

¹¹Wapendwa, kama Mungu alitupenda hivyo, imetupasa nasi kupendana.[#Mat. 18:33.]

¹²Hakuna mtu aliyemwona Mungu hata kale; tukipendana, Mungu hukaa mwetu, upendo wake ukatimilika mwetu.[#Yoh. 1:18.]

¹³Hapa ndipo, tunapotambua, kama tumo mwake yeye, kama yeye naye yumo mwetu, tukiwa na Roho wake, ambaye alitugawia.[#1 Yoh. 3:24.]

¹⁴Nasi tumeviona, tukavishuhudia, ya kuwa Baba amemtuma Mwana, awe mwokozi wa ulimwengu.*[#Yoh. 3:17.]

¹⁵Ye yote atakayeungama kwamba: Yesu ni mwana wake Mungu, basi, Mungu hukaa mwake huyo, naye mwake Mungu.[#1 Yoh. 5:5.]

¹⁶Nasi tumeutambua, tukautegemea upendo wake Mungu wa kutupenda sisi.[#1 Yoh. 4:8.]

*Mungu ni upendo; naye mwenye upendo hukaa mwake Mungu, naye Mungu hukaa mwake yeye.

¹⁷Upendo, tupendwao nao, unatimilika hapo, tukiweza kuishangilia siku ya hukumu; kwani yeye alivyo, ndivyo, tulivyo na sisi humu ulimwenguni.[#1 Yoh. 2:28.]

¹⁸Woga haumo katika upendo, ila upendo uliotimilika huufukuza woga, kwa sababu woga huhangaisha. Naye aliye mwenye woga bado hajautimiliza upendo.

¹⁹Sisi na tumpende! Kwani yeye alianza kutupenda sisi.

²⁰Mtu akisema: Nampenda Mungu, akamchukia ndugu yake, huyo ni mwongo. Kwani asipompenda ndugu yake, anayemwona, hawezi kumpenda Mungu, asiyemwona,

²¹maana agizo hili tumepewa naye kwamba: Mwenye kumpenda Mungu sharti ampende na ndugu yake!*[#Mat. 22:37-40; Mar. 12:29-31.]