2 Mambo 11

Rehabeamu anakatazwa kupigana na Waisiraeli

¹Rehabeamu alipofika Yerusalemu, akaikusanya milango ya Yuda na ya Benyamini, watu 180000 waliochaguliwa kupiga vita, wapigane na Waisiraeli, wamrudishie Rehabeamu ufalme huo.

²Lakini neno la Bwana likamjia Semaya aliyekuwa mtu wa Mungu, kwamba:

³Mwambie Rehabeamu, mwana wa Salomo, mfalme wa Wayuda, nao Waisiraeli wote walioko katika nchi ya Yuda na ya Benyamini kwamba:

⁴Hivi ndivyo, Bwana anavyosema: Msipande kwenda kupigana na ndugu zenu! Rudini kila mtu nyumbani kwake! Kwani jambo hili limefanywa na mimi. Walipoyasikia maneno haya ya Bwana wakarudi wakiacha kumwendea Yeroboamu.

Miji ya Rehabeamu yenye maboma.

⁵Rehabeamu alipokaa Yerusalemu akajenga miji yenye maboma katika nchi ya Yuda.

⁶Akajenga maboma Beti-Lehemu na Itamu na Tekoa,

⁷na Beti-Suri na Soko na Adulamu,

⁸na Gati na Maresa na Zifu,

⁹na Adoraimu na Lakisi na Azeka,

¹⁰na Sora na Ayaloni na Heburoni; hii ndiyo miji yenye maboma katika nchi ya Yuda na ya Benyamini.

¹¹Haya maboma akayajenga kuwa yenye nguvu, akaweka humo wenye amri na vilimbiko vya vilaji na vya mafuta na vya mvinyo.

¹²Humo katika kila mji mmoja akaweka ngao na mikuki, akaijenga kuwa yenye nguvu nyingi mno. Nchi ya Yuda na ya Benyamini ikawa yake.

Watambikaji na Walawi wanamjia Rehabeamu.

¹³Watambikaji na Walawi katika nchi zote za Isiraeli wakarudi upande wake na kutoka katika mipaka yao yote.

¹⁴Kwani Walawi wakayaacha malisho na mapato yao, wakaenda Uyuda na Yerusalemu, kwa kuwa Yeroboamu na wanawe waliwatupa, waiswe watambikaji wa Bwana.[#2 Mambo 13:9.]

¹⁵Akajiwekea mwenyewe watambikaji wa kutambika vilimani, nao wa kutambikia mashetani na ndama, alizozitengeneza.[#1 Fal. 12:31.]

¹⁶Katika mashina yote ya Isiraeli watu waliojipa mioyo ya kumtafuta Bwana Mungu wa Isiraeli wakawafuata wale, wakaja Yerusalemu kumtolea Bwana Mungu wa baba zao ng'ombe za tambiko.

¹⁷Hawa ndio walioutia ufalme wa Yuda nguvu, wakamwongezea Rehabeamu, mwana wa Salomo, uwezo miaka mitatu, kwani waliendelea katika njia za Dawidi na za Salomo miaka mitatu.

Wanawake na wana wa Rehabeamu.

¹⁸Rehabeamu akamwoa Mahalati wa Yerimoti, mwana wa Dawidi na wa Abihaili, binti Eliabu, mwana wa Isai.[#1 Sam. 16:6.]

¹⁹Huyu akamzalia wana hawa: Yeusi na Semaria na Zahamu.

²⁰Kisha akamwoa Maka, binti Abisalomu; huyu alimzalia Abia na Atai na Ziza na Selomiti.

²¹Rehabeamu akampenda maka, binti Abisalomu, kuliko wakeze na masuria zake wote, kwani alichukua wake 18 na masuria 60, akazaa wana wa kiume 28 na wa kike 60.

²²Rehabeamu akamweka Abia, mwana wa Maka, kuwa mkuu na mwenye amri kwa ndugu zake, kwani alitaka kumpa ufalme.

²³Kwa kuwa mwenye utambuzi akawatawanya wanawe wote katika nchi zote za Yuda na za Benyamini akiwaweka katika miji yote yenye maboma, akawapa vyakula vingi, akawaposea hata wanawake wengi.[#2 Mambo 21:3.]