2 Wakorinto 12

Kujivunia unyonge.

¹Nashurutishwa kujivuna, hata isifae kitu. Lakini sasa nitafikia, nilivyotokewa na Bwana, nayo niliyofunuliwa.

²Yuko mtu nimjuaye kuwa mwenye Kristo; sasa miaka yapata 14, kama alikuwa mwilini, sijui, au kama alikuwa ametengwa na mwili wake, sijui; Mungu anayajua. Mtu huyo alipokonywa na kupelekwa, mpaka aiingie mbingu ya tatu.

³Nami nimemjua mtu huyo; kama alikuwa mwilini, au kama alikuwa pasipo mwili wake, sijui; Mungu anayajua.

⁴Naye alipokonywa kupelekwa Paradiso, akasikia maneno yasiyosemeka, yasiyowezekana kusemwa na mtu.

⁵Kwa ajili yake yeye nitajivuna, lakini kwa ajili yangu mimi hakuna, nitakalojivunia, isipokuwa unyonge wangu.[#2 Kor. 11:30.]

⁶Kama ningetaka kujivuna, singekuwa mpuzi, kwani ningesema yaliyo ya kweli. Lakini najikinga, mtu asiniwazie kuwa mkuu kuliko hapo, anionapo na kunisikia.[#2 Kor. 10:8; 11:16.]

⁷Tena yako mafunuo makuu yote, niliyoyapata; lakini kwa kwamba nisijikweze kwa ajili yao, nimetiwa chomeo mwilini mwangu, ndio mjumbe wake Satani; akafunguliwa, anipige makonde nisijikweze.[#Iy. 2:6.]

⁸Kwa ajili yake yeye nimemlalamikia Bwana mara tatu, aniondokee;

⁹naye akaniamba: Gawio langu likutoshee! Kwani katika unyonge ndimo, nguvu yangu itimilikamo. Kwa sababu hii kinipendezacho kupita vingine ni kujivunia manyonge yangu, nguvu ya Kristo ipate kunikalia.

¹⁰Kwa hiyo ninaviona kuwa vema, nikiwa mnyonge au nikikorofishwa au nikihangaishwa au nikifukuzwa au nikisongwa kwa kuwa wake Kristo. Kwani ninapokuwa mnyonge, ndipo, nilipo mwenye nguvu.*[#Fil. 4:13.]

Paulo anawafuata wao wenyewe, si mali zao.

¹¹Nimekuwa mpuzi wa kujivuna, lakini ninyi mmenishurutisha. Kwani ingefaa, mimi nisifiwe nanyi. Kwani hakuna, nishindwacho nao wale wajipao macheo yote ya utume, hata nikiwa si kitu mimi.[#2 Kor. 11:5.]

¹²Yamjulishayo mtu kuwa mtume yamefanyika kati yenu, kama ni uvumilivu mwingi, au kama ni vielekezo na vioja na vya nguvu.[#Tume. 19:11-12; Rom. 15:19.]

¹³Kuna nini, mliyopungukiwa kuliko wateule wengine, isipokuwa hii tu, ya kuwa sikuzila mali zenu ninyi? Niachilieni upotovu huu![#2 Kor. 11:9.]

¹⁴Tazameni, mara hii ni ya tatu, nikiwa tayari kuja kwenu, tena sitazila mali zenu. Kwani siyatafuti yaliyo yenu, ila nawatafuta ninyi wenyewe. Kwani haifai, watoto wawawekee wazazi wao vilimbiko, ila wazazi sharti wao wawawekee watoto.[#2 Kor. 13:1.]

¹⁵Lakini mimi yanipendezayo sana ni kutoa yaliyo yangu, kweli hata mwenyewe nitatolewa kwa ajili yenu ninyi; nikijipingia kuwapenda, itafaa nikipungukiwa kupendwa?[#Fil. 2:17.]

¹⁶Basi, kwa sababu mimi sikuwasumbua, wale husema: Kwa kuwa mwenye werevu mbaya nimewakamata kwa hila.

¹⁷Je? Nimeyatwaa yaliyo yenu ninyi kwa mikono yao wale, niliowatuma kwenu?

¹⁸Nimemwonya Tito, nikatuma pamoja naye yule ndugu. Je? Yako yenu, Tito aliyoyatwaa? Roho ituendeshayo siyo ileile moja? Nazo nyayo, tuzifuatazo, sizo zizo hizo?[#2 Kor. 8:6,16-18.]

Makosa ya Wakorinto.

¹⁹Mmeanza kale kutuwazia, ya kuwa twajikania mbele yenu. Lakini Mungu ajua: twasema kwa kuwa wake Kristo. Nayo yote tunayasema, tuwajenge ninyi, wapenzi.

²⁰Maana naogopa, ya kuwa nitakapokuja sitawaona ninyi, kama nitakavyo kuwaona, tena ya kuwa nami hamtaniona nanyi, kama mtakavyo kuniona. Naogopa kukuta magombano na wivu na mifundo ya mioyo na machokozi na masingizio na mateto na majivuno na matukutiko.[#2 Kor. 10:2; 1 Kor. 4:6.]

²¹Kwa hiyo naogopa kwamba: Nitakapofika kwenu, Mungu wangu ataninyenyekeza tena, nami nitapata kusikitika kwa ajili yao wengi waliokosa kale pasipo kuyajutia mambo ya uchafu na ya ugoni na ya uasherati, waliyoyafanyiza.[#2 Kor. 2:1; 13:2.]