2 Wakorinto 5

Jengo letu la mbinguni.

¹Kwani twajua, ya kuwa hivi vijumba vyetu, tupangamo nchini, vitakapobomolewa, tunayo majengo yaliyojengwa na Mungu, ni nyumba zisizojengwa na mikono ya watu, nazo hukaa kale na kale huko mbinguni.[#Iy. 4:19; 2 Petr. 1:13-14.]

²Kwani hii ndiyo itupigishayo kite, tukitunukia, tuvikwe makao yetu yatokayo mbinguni;[#Rom. 8:23.]

³maana tukiwa tumeyavika hatutaonekana kuwa wenye uchi.

⁴Kwani sisi tuliomo humu kibandani hupiga kite kwa kulemewa, kwa sababu hatutaki kuvuliwa, ila hutaka kuvikwa, maana iliyo yenye kufa imezwe nayo yenye uzima.[#1 Kor. 15:51-53.]

⁵Lakini aliyetutengenezea yaya haya ndiye Mungu aliyetupa Roho, awe rehani yetu.[#2 Kor. 1:22; Rom. 8:16,23; Ef. 1:13-14.]

⁶Kwa hiyo yako, tunayoyatazamia siku zote tukijua, ya kuwa tukiwa mwetu miilini twamkalia Bwana mbali.[#Ebr. 11:13.]

⁷Kwani sisi hufanya mwendo kwa kumtegemea Mungu, siko kwa kuona.[#1 Kor. 13:12.]

⁸Lakini kwa hayo, tunayoyatazamia, hupenda sana kuhama miilini, tupate kukaa kwetu kwa Bwana.[#Fil. 1:23.]

⁹Kwa sababu hii twajihimiza, tumpendeze yeye, ikiwa tuwe bado mwetu miilini, au tuwe tumekwisha kuitoka.*[#Sh. 39:13.]

¹⁰Kwani sisi sote sharti tutokee mbele ya kiti cha uamuzi cha Kristo, kila mmoja alipwe, aliyoyafanyiza alipokuwa mwilini, yakiwa mema au maovu.[#Yoh. 5:29; Tume. 17:31; Rom. 2:16; 14:10.]

Mapatano ya Kimungu.

¹¹Kwa sababu twajua, ya kuwa Bwana huogofya, twawaonya watu, lakini Mungu ndiye, tumtokeaye hivyo, tulivyo. Lakini ninacho kingojeo cha kwamba: Mioyo yenu inajua, ya kuwa nayo tumeitokea hivyo, tulivyo.

¹²Hatujisifu tena mbele yenu, ila twataka kuwapa ninyi sababu ya kujivuna kwa ajili yetu, mpate kuwajibu wale wanaojivunia yaliyo machoni tu, yasiyo namo mioyoni.[#2 Kor. 3:1.]

¹³Kwani tulipokuwa kama wenye wazimu, ni kwa ajili ya Mungu; tena tunapoerevuka, ni kwa ajili yenu.[#2 Kor. 12:2; 1 Kor. 14:19.]

¹⁴*Kwani upendo wa Kristo hutuhimiza sisi, tukawaza hivyo: Mmoja alipokufa kwa ajili yao wote, kwa hiyo wote wamekwisha kufa.

¹⁵Naye alipokufa kwa ajili yao wote alitaka, walio hai wasijikalie wenyewe, ila wamkalie yeye aliyekufa kwa ajili yao, kisha akafufuliwa.[#Rom. 14:7-8; 1 Tim. 2:6.]

¹⁶Kwa hiyo tangu sasa hakuna, tunayemjua kimwili. Ikiwa tulimtambua Kristo kimwili, sasa hatumtambui tena hivyo.[#Mat. 12:46-50.]

¹⁷Kwa hiyo mtu akiwa anaye Kristo, amekuwa kiumbe kipya. Yake ya kale yamepita; ukimtazama, yote yamekuwa mapya.[#Rom. 8:1,10; Gal. 2:20; 6:15; Ufu. 21:5.]

¹⁸Nayo yote hutoka kwa Mungu; ndiye aliyetupatanisha sisi naye yeye, Kristo alipojitoa. Kisha akatupa kuyatumikia hayo mapatano[#Rom. 5:10.]

¹⁹kwamba: Mungu alikuwa katika Kristo, akawapatanisha wa ulimwengu naye yeye, asiwahesabie maanguko yao; akaweka kwetu wenye kuyatangaza hayo mapatano.[#Rom. 3:24-25; Kol. 1:19-20.]

²⁰Hivyo sisi tu wajumbe mahali pake Kristo; ndivyo Mungu mwenyewe anavyowaonya kwa vinywa vyetu sisi. Maana twawabembeleza mahali pa Kristo: Yapokeeni hayo mapatano yake Mungu![#Yes. 52:7; Luk. 10:16.]

²¹Asiyetambua kosa alimgeuza kuwa mwenye makosa kwa ajili yetu, sisi tugeuzwe naye kuwa wenye wongofu wa Kimungu.*[#Yes. 53:4-5,8; Yoh. 8:46; 1 Kor. 1:30; Gal. 3:13; Fil. 3:9; Ebr. 4:15.]