2 Wafalme 24

Wayuda wanaanza kutumikia Babeli.

¹Hizo siku zake Nebukadinesari, mfalme wa Babeli, akapanda huko; ndipo, Yoyakimu alipomtumikia miaka 3, kisha akamkataa tena akiacha kumtii.

²Ndipo, Bwana alipotuma kwake vikosi vya Wakasidi na vikosi vya Washami na vikosi vya Wamoabu na vikosi vya wana wa Amoni, akawatuma katika nchi ya Yuda, waiangamize kwa lile neno la Bwana, alilolisema vinywani mwa watumishi wake wafumbuaji.

³Hivyo vikaingia katika nchi ya Yuda kwa lile neno, kinywa cha Bwana kililolisema, aiondoe usoni pake kwa ajili ya makosa ya Manase, aliyoyafanya yote.[#2 Fal. 21:10-16; 23:26-27.]

⁴Hata kwa ajili ya damu zao wasiokosa, alizozimwaga, akaujaza Yerusalemu hizo damu zao wasiokosa, kwa sababu hii Bwana hakutaka kuwaondolea makosa.

Kufa kwake Yoyakimu.

⁵Mambo mengine ya Yoyakimu nayo yote, aliyoyafanya, hayakuandikwa katika kitabu cha mambo ya siku za wafalme wa Wayuda?

⁶Yoyakimu alipokwenda kulala na baba zake, mwanawe Yoyakini akawa mfalme mahali pake.

⁷Lakini mfalme wa Misri hakutoka tena katika nchi yake, kwani mfalme wa Babeli aliichukua nchi yote iliyokuwa yake mfalme wa Misri toka kwenye mto wa Misri mpaka kwenye jito la Furati.

Mfalme Yoyakini; mwanzo wa uhamisho wa Babeli.

⁸Yoyakini alikuwa mwenye miaka 18 alipoupata ufalme, akawa mfalme miezi 3 mle Yerusalemu; jina la mama yake ni Nehusta, binti Elnatani, wa Yerusalemu.

⁹Akayafanya yaliyo mabaya machoni pake Bwana kama yote, baba zake waliyoyafanya.[#2 Fal. 23:37.]

¹⁰Wakati huo wakapanda watumishi wa Nebukadinesari, mfalme wa Babeli, kwenda Yerusalemu, mji huu ukaja kusongwa kwa kuzingwa.

¹¹Naye Nebukadinesari, mfalme wa Babeli, akaja Yerusalemu, watumishi wake walipokuwa wakiusonga huo mji kwa kuuzinga.

¹²Ndipo, Yoyakini, mfalme wa Wayuda, alipomtokea mfalme wa Babeli, yeye na mama yake na watumishi wake na wakuu wake na watumishi wake wa nyumbani, naye mfalme wa Babeli akamchukua katika mwaka wa 8 wa ufalme wake yeye.

¹³Akatoa navyo vilimbiko vyote vya Nyumba ya Bwana na vilimbiko vya nyumba ya mfalme, dhahabu na vyombo vyote, Salomo, mfalme wa Waisiraeli, alivyovitengeneza vya kutumiwa Jumbani mwa Bwana, akavivunjavunja, kama Bwana alivyosema.[#2 Fal. 20:17.]

¹⁴Akawahamisha Wayerusalemu wote na wakuu wote na mafundi wa vita wenye nguvu, nao walikuwa mateka 10000 na mafundi wote na wahunzi, hakusalia mtu, wasipokuwa watu wanyonge wa nchi hiyo.

¹⁵Naye Yoyakini akamhamisha kwenda Babeli na mamake mfalme na wakeze mfalme na watumishi wake wa nyumbani, nao wenye macheo katika nchi hii akawatoa Yerusalemu na kuwapeleka Babeli kifungoni.[#2 Fal. 25:27; Yer. 22:26; 24:1.]

¹⁶Tena wenye nguvu wote 7000, na mafundi na wahunzi 1000, wote ni mafundi wa kweli wa kupiga vita; hao mfalme wa Babeli akawapeleka Babeli kifungoni.

Mfalme Sedekia.

¹⁷Kisha mfalme wa Babeli akamfanya baba yake mdogo Matania kuwa mfalme mahali pake, akaligeuza jina lake, akamwita Sedekia.

¹⁸Sedekia alikuwa mwenye miaka 21 alipoupata ufalme; akawa mfalme miaka 11 mle Yerusalemu; jina la mama yake ni Hamutali, binti Yeremia, wa Libuna.[#Yer. 52:1-3.]

¹⁹Akayafanya yaliyo mabaya machoni pake Bwana kama yote, Yoyakimu aliyoyafanya.[#2 Fal. 23:37.]

²⁰Kwani ikawa kwa ajili ya makali ya Bwana yaliyouwakia mji wa Yerusalemu, hata nchi ya Yuda, akiwatupa, waondoke usoni pake. Kisha Sedekia akamkataa mfalme wa Babeli akiacha kumtii.[#2 Fal. 23:27.]