Amosi 8

Mfano wa nne wa mapatilizo ya Waisiraeli.

¹Hili ndilo ono, Bwana Mungu alilonionyesha: Nimeona kikapu chenye matunda yaliyoiva. Akaniuliza:[#Amo. 7:8.]

²Unaona nini, Amosi? Niliposema: Kikapu chenye matunda yaliyoiva, Bwana akaniambia: Zimetimia siku za kuishia kwao walio ukoo wangu wa Isiraeli, sitaendelea tena kuwapita tu.

³Siku hiyo ndipo, nyimbo za majumbani zitakapokuwa vilio, kwani mizoga ya watu itakuwa mingi, mahali po pote wataitupa tu na kunyamaza kimya; ndivyo, asemavyo Bwana Mungu.[#Amo. 6:10.]

⁴Lisikieni hili, ninyi mfokeao maskini, mkakanyaga wanyonge wa nchi[#Amo. 2:7.]

⁵Mwasema: Mwezi mpya utatokea lini, tupate kuuza ngano?

Nayo siku ya mapumziko itapita lini, tupate kufungua malimbikio?

Ndipo, tutakapopunguza pishi pamoja na kuongeza bei,

tuwadanganye watu kwa mizani zilizo za uwongo.

⁶Ndipo, tutakaponunua wanyonge kwa fedha, wawe watumwa,

nao maskini kwa viatu viwili,

makumvi ya ngano nayo tutayauza.

⁷Bwana ameapa na kumtaja aliye mkuu wa Yakobo kwamba:

Sitayasahau kale na kale matendo yao yote!

⁸Je? Kwa ajili ya hayo nchi isitetemeke?

Asiomboleze kila mtu akaaye huku?

Nchi yote nzima itajitutumua kama mto wa Nili kwa kuchafuka,

kisha itakupwa kama lile jito la Misri.

⁹Ndivyo, asemavyo Bwana Mungu:

Siku hiyo ndipo, nitakapoliendesha jua, lichwe mnamo saa sita,

niugeuze mwanga wa mchana kuwa giza katika nchi.

Nazo sikukuu zenu nitazigeuza kuwa za maombolezo,

¹⁰nazo nyimbo zenu zote kuwa vilio;

kisha nitawavika nyote magunia viunoni,

napo vichwani penu nyote nitatoa vipara.

Nitafanya, maombolezo yawe kama ya

kumwombolezea mwana wa pekee,

mwisho wao uwe kama siku yenye uchungu.

¹¹*Ndivyo, asemavyo Bwana Mungu:

Mtaona, siku zikija, nitakapotuma njaa,

ije kuingia katika nchi hii,

siyo njaa ya chakula, wala siyo kiu ya maji,

ila itakuwa njaa ya kuyasikia maneno ya Bwana.

¹²Ndipo, watakapotangatanga, watoke baharini,

wafike kwenye bahari nyingine,

tena watoke upande wa kaskazini,

wafike upande wa maawioni kwa jua;

watazunguka po pote kwa kulitafuta Neno la Bwana,

lakini hawataliona.*

¹³Siku hiyo ndipo, watakapozimia kwa kiu

wanawali wazuri pamoja na wavulana.

¹⁴Ndio wao wanaoapa na kuvitaja vinyua vya Samaria

vinavyowakosesha, nao wasemao:

Hivyo, Mungu wako, Dani, alivyo mzima!

Au: Hivyo, njia ya Beri-Seba inavyotupa uzima!

wataanguka, lakini hawatainuka tena.