Amosi 9

Mapatilizo mabaya ya Waisiraeli.

¹Nimemwona Bwana, akisimama penye kutambikia na kusema:

Zipige nguzo pembeni juu, vizingiti vya juu vitikisike!

Kisha uviponde, viwaangukie vichwani pao wote!

nao watakaosalia nitawaua kwa upanga,

pasiwe hata mmoja kwao, atakayekimbia,

wala mmoja wao atakayepona.

²Ingawa wapenyelee kuzimuni, huko nako mkono wangu utawatoa;

ingawa wapande mbinguni, huko nako nitawabwaga chini.

³Ingawa wajifiche mlimani kwa Karmeli juu,

huko nako nitawakamata na kuwachukua;

ingawa wajitoweshe machoni pangu baharini chini kabisa,

huko nako nitawaagizia nyoka, awaume.

⁴Ingawa waje mbele ya adui zao wakihamishwa kwenda

utumwani,

huko nako nitawaagizia upanga, uwaue;

ndipo, nitakapowaelekezea macho yangu,

niwapatie mabaya, nisiwapatie mema.

⁵Hapo, Bwana Mungu Mwenye vikosi atakapoigusa nchi,

itayeyuka papo hapo, wote wakaao huko waomboleze;

ndipo, nchi yote itakapojitutumua kama mto wa Nili,

kisha itakupwa kama lile jito la Misri.

⁶Ndiye aliyepajenga pake mbinguni kuwa dari yake,

nayo misingi ya kao lake aliiweka chini;

ndiye anayeyaita maji ya baharini, ayafurikishe juu ya

nchi kavu.

Bwana ni Jina lake!

⁷Ndivyo, yeye Bwana asemavyo:

Ham sawasawa kama wana wa Kinubi, ninyi wana wa Isiraeli?

Waisiraeli sikuwatoa katika nchi ya Misri?

Nao Wafilisti kule Kafutori? Nao Washami kule Kiri?

⁸Mtaona, macho yangu Bwana Mungu yakiutazama ufalme uliokosa

niutoweshe juu ya nchi,

lakini sitautowesha mlango wa Yakobo wote mzima;

ndivyo, asemavyo Bwana.

⁹Kwani mtaona, nikitoa amri, niwapepete walio mlango wa Isiraeli

na kuwatapanya kwa mataifa yote,

kama ngano zinavyopepetwa katika ungo,

pasipatikane hata chembe moja itakayoanguka chini.

¹⁰Wakosaji tu wa ukoo wangu watauawa wote kwa panga,

ndio waliosema: Mabaya hayatatufikia, wala hayatatupata.

Kiagio cha siku, huruma zitakapotokea.

¹¹Siku hiyo ndipo, nitakapokisimamisha

kibanda cha Dawidi kilichoanguka,

na kuziziba nyufa zake

na kuyasimamisha mabomoko yake,

nikijenge, kiwe kama siku za kale,

¹²wayatwae masao ya Edomu na wamizimu wote

waliotangaziwa Jina langu;

ndivyo, asemavyo Bwana, naye atayafanya haya.

¹³Ndivyo, asemavyo Bwana: Mtaona, siku zikija,

mwenye kulima atakaposhikamana na mvunaji,

vile vile mwenye kuzikamua zabibu na mpanda mbegu.

Ndipo, milima itakapochuruzika pombe mbichi,

vilima vyote vifurikwe nazo.

¹⁴Ndipo, nitakapoyafungua mafungo yao walio ukoo wangu wa

Isiraeli,

waijenge miji yao iliyoangamizwa,

waipande mizabibu yao, wapate kunywa mvinyo zao.

¹⁵Ndipo, nitakapowapanda katika nchi yao,

wasing'olewe tena katika nchi yao, niliyowapa.

Bwana Mungu wako ameyasema.