Habakuki 1

Ukosaji wa Yuda.

Hili ndilo neno zito, aliloliona mfumbuaji Habakuki.

¹Bwana, hata lini nikulilie, unisaidie? Nawe husikii!

²Hata lini nikulalamikie kwa kukorofishwa? Nawe huniokoi!

³Mbona umeniacha, nione maovu,

ukatazama tu, ninavyosumbuliwa?

Uangamizo na ukorofi uko mbele yangu,

yako magombano, hata mashindano hutokea.

⁴Kwa hiyo Maonyo yanakosa nguvu,

mashauri yapasayo hayatokei kale na kale,

kwani asiyemcha Mungu humnasa aliye mwongofu,

kwa hiyo yanyokayo yakitokea yamekwisha kupotolewa.

Mabaya, Wakasidi watakayoyafanya.

⁵Yatazameni mambo yaliyoko kwa wamizimu, myaangalie!

Ndipo, mtakapozizimka kwa kustuka.

Kwani mimi hizi siku zenu nitatenda tendo,

kama lingesimuliwa, msingeliitikia.

⁶Kwani mtaniona, nikiwainua Wakasidi,

lile taifa kali lenye mioyo miepesi,

ni wale wanaokwenda katika nchi za mbali,

wajipatie makao yasiyo yao.

⁷Ndio watu watishao kwa kutia woga,

kwao hao hutoka amri zilizo za majivuno tu.

⁸Farasi wao hupiga mbio kushinda machui,

ni wepesi sana kuliko mbwa wa mwitu wawindao jioni.

Wapanda farasi wa kwao hujitata;

tena hao wapanda farasi wakija kutoka mbali

huruka kama tai wakimbiliao kula.

⁹Wao wote hujia kukorofisha,

nyuso zao zote pia zikiwa zimeelekea mbele,

hukusanya mateka kama ni mchanga.

¹⁰Hao ndio watakaowafyoza wafalme,

hata wakuu watawacheka;

hao ndio watakaoteka kila boma,

maana hulikusanyia mchanga kuwa boma, kisha huliteka.

¹¹Baadaye hujiendea kama upepo,

huenda zao na kuzidi kukosa,

nguvu zao huziwazia kuwa mungu wao.

Ombo na ombolezo la mfumbuaji.

¹²Kumbe wewe Bwana, siwe Mungu wangu mtakatifu toka kale?

Kwa hiyo hatutakufa.

Wewe Bwana, umemweka, atupatilize;

wewe Mwamba wetu, umemtia nguvu, atuchapue.

¹³Macho yako yanatakata, hayawezi kuyaona tu hayo mabaya,

huwezi kabisa kuvitazama tu, watu wanavyosumbuliwa.

Mbona sasa unawatazama tu wapokonyaji na kujinyamazia kimya,

asiyekucha akimmeza aliye mwongofu kuliko yeye?

¹⁴Unataka, watu wawe kama samaki wa baharini

au kama wadudu wakosao awatawalaye?

¹⁵Yeye amewapandisha hawa wote kwa ndoana,

akawakamata namo katika nyavu zake,

akawakusanya katika majarifa yake,

kwa hiyo akafurahi na kupiga vigelegele.

¹⁶Kwa sababu hii huzitambikia nyavu zake,

huyavukizia nayo majuya yake,

kwani kwa msaada wao mafungu yake ni yenye manono,

navyo vyakula vyake ni vyenye mafuta.

¹⁷Je? Kwa hiyo utamwacha, awatoe vivyo hivyo,

wavu wake uliowakamata,

akiendelea kuua mataifa mazima pasipo kuwahurumia?