Yesaya 10

Mapatilizo ya waamuzi wabaya.

¹Yatawapata wenye hukumu wanaopotoa hukumu,

nao waandishi wanaoandika makorofi!

²Hutaka kuwazuia wanyonge, wasije shaurini,

huyapokonya yawapasayo wakiwa wao walio ukoo wangu;

tena hutaka, wajane wawe mateka yao,

nao wafiwao na wazazi huwanyang'anya mali zao.

³Siku ya kukaguliwa itakapofika, mtafanya nini,

upepo wa kimbunga utokao mbali utakapovuma?

Mtamkimbilia nani, awasaidie?

Nayo matukufu yenu mtayapeleka wapi, myafiche?

⁴Nanyi hamtaona mzungu kuliko huu:

kupiga magoti kwenye mateka au kutupwa kwenye mizoga.

Lakini kwa hayo yote makali yake hayajatulia bado,

nao mkono wake ungaliko umekunjuka.

Majivuno ya Waasuri yatanyenyekezwa.

⁵Yatawapata Waasuri nao,

ijapo makali yangu yawatumie kuwa fimbo,

ijapo machafuko yangu yawe vigongo mikononi mwao.

⁶Ninawatuma kujia kabila lililojichafua,

ninawaagizia watu, ambao ninawakasirikia,

wateke mateka na kuyapokonya mapokonyo,

wawakanyage kama matope ya njiani.

⁷Lakini wenyewe hawafikiri kama hivyo,

wala mioyo yao haina mawazo kama hayo,

kwani mioyoni mwao mna neno moja tu: Kuangamiza!

Makabila ya watu, wanayotaka kuyang'oa, si machache.

⁸Kwani husema: Wakuu wetu wote pamoja sio wafalme?

⁹Je? Mji wa Kalno haukuangamia kama ule wa Karkemisi?

Mji wa Hamati haukuangamia kama ule wa Arpadi?

Nao mji wa Samaria haukuangamia kama ule wa Damasko?

¹⁰Kama mikono yetu ilivyowapata wafalme wa kimizimu na vinyago vyao vilivyokuwa vyenye nguvu kuliko vile vya Yerusalemu na vya Samaria,[#Yes. 36:18-20.]

¹¹je? Yale, tuliyowafanyizia Wasamaria na vinyago vyao,

yaleyale tusiwafanyizie Wayerusalemu na vinyago vyao?

¹²Lakini hapo, Bwana atakapokuwa ameyamaliza matendo yale mlimani kwa Sioni namo Yerusalemu, ndipo, yatakapokuwa aliyoyasema kwamba: Nitauumbua moyo wa mfalme wa Asuri kwa ajili ya uzao wa ukuu wake na kwa ajili ya utukufu wa macho yake wa kujitukuza.[#Yes. 37:36.]

¹³Kwani alisema: Nikifanya hayo ni nguvu za mikono yangu,

tena ni werevu wangu wa kweli, kwani mimi ni mwenye akili.

Mimi nimeondoa mipaka ya makabila ya watu,

nikayapokonya malimbiko yao, nikawa ng'ombe mkali,

nikawakumba waliokalia viti vya kifalme.

¹⁴Mkono wangu ukaona mali za makabila ya watu,

kama wengine wanavyoona vituo vya ndege.

Kama watu wanavyookota mayai yaliyoachwa,

ndivyo, mimi nilivyookota nchi nzima;

nako hakuwako mwenye kupanua bawa,

wala mwenye kufumbua kinywa wala mwenye kulia.

¹⁵Shoka litawezaje kujitukuza mbele yake

aliyelitumia la kukatia?

Au msumeno utawezaje kujikuza mbele yake

aliyeutumia wa kukerezea?

Ingekuwa kama kusema: Fimbo ndiyo inayompigisha aishikaye,

au kama kusema: Kigongo kinamchukua asiye mti.

¹⁶Kwa hiyo Bwana aliye Bwana Mwenye vikosi

atatuma kwao wanene jambo litakalowakondesha,

nako kwenye utukufu wao kutawaka maunguzo,

nayo yataunguza, kama moto unavyounguza.

¹⁷Nao mwanga wa Isiraeli utawawia moto;

nao utukufu wao utageuka kuwa kama ndimi za moto;

zitayaunguza maboma yao yenye mibigili na mikunju,

yateketee kwa siku moja tu.

¹⁸Hivyo atauangamiza utukufu wa misitu na wa mizabibu yao,

kuanzia shinani mpaka kwenye nyama za ndani,

itazimia, kama mwenye kufa anavyozimia.

¹⁹Miti ya misitu yao itakayosalia itahesabika,

mtoto ataweza kuiandika.

Sao lao Waisiraeli litamgeukia Bwana.

²⁰Siku ile waliosaa wa Isiraeli nao waliopona wa mlango wa Yakobo hawatajishikiza tena kwake yeye aliyewapiga, ila watajishikiza kweli kwa Bwana aliye Mtakatifu wa Isiraeli.

²¹Watakaosalia kuwa sao la Yakobo

ndio watakaomgeukia Mungu mwenye nguvu.

²²Ijapo wawe wengi kama mchanga wa ufukoni,

wao walio ukoo wako wa Isiraeli,

watakaomgeukia watakuwa sao tu;

wengine angamizo lao litatimizwa,

liyatokeze maamuzi yake kuwa ya kweli kabisa.

²³Kwani atakayelitimiza shauri la angamizo

ni Bwana Mungu Mwenye vikosi,

atavifanyiza katika nchi zote.

²⁴Kwa hiyo Bwana Mungu Mwenye vikosi anasema hivyo: Mlio ukoo wangu ukaao Sioni, msimwogope Mwasuri, ijapo awapige vigongo, awainulie fimbo yake na kuishika njia ya Wamisri.

²⁵Kwani bado kitambo kidogo ndipo, machafuko yatakapokoma, makali yangu yawageukie wao, yawamalize.

²⁶Bwana Mwenye vikosi anawashikia mjeledi, awapige, kama alivyowapiga Wamidiani kwenye Mwamba wa Kunguru, atawainulia nayo fimbo yake, kama alivyoiinulia Wamisri baharini.[#2 Mose 14:26; Amu. 7:25.]

²⁷Siku ile mizigo yao itaondoka mabegani kwenu,

nayo miti yao ya kuwafunga itaondoka shingoni kwenu,

itavunjika tu kwa unene, mtakaoupata tena.

²⁸Watakapokuja watapita Ayati, wavuke Migroni,

wataiacha mizigo yao Mikimasi.

²⁹Kisha watapita katika lango la magenge,

Geba wapige makambi ya kulala usiku,

Warama watatetemeka, wa Gibea wa Sauli watakimbia.

³⁰Pigeni yowe, ninyi wa binti Galimu!

Ninyi wa Laisi, sikilizeni! Nanyi wa Anatoti na mwone ukiwa!

³¹Wa Madimena watatawanyika, wakaao Gebimu watakimbia.

³²Siku ya kusimama kwao kule Nobu

watainyosha mikono yao, wauteke mlima wa binti Sioni

nacho kilima cha Yerusalemu.

³³Bwana aliye Bwana Mwenye vikosi atakapotokea,

ayakate matawi yao kwa nguvu zake zitishazo,

ndipo, itakapovunjika nayo miti iliyokwenda juu sana,

hiyo mirefu yenyewe itaanguka.

³⁴Navyo vichaka vya mwituni vitakatwa kwa vyuma vikali,

mwitu wa Libanoni utaishia kwa nguvu za mwenye utukufu.