Yesaya 29

Masongano na wokovu wa Yerusalemu.

¹Umekwisha kuapizwa, wewe Simba wa Mungu!

Wewe Simba wa Mungu! Wewe mji, Dawidi alimotua!

Ongezeni mwaka kwa mwaka na kula sikukuu miaka mizima!

²Kisha nitamsonga Simba wa Mungu,

kuweko kipiga kite na kuugua;

ndipo, atakapokuwa mbele yangu Simba wa Mungu wa kweli.

³Ndipo, nitakapokupigia makambi, yakuzinge,

kisha nitakujengea boma la kukusonga,

nitaisimamisha hata minara, nipate kukushinda.

⁴Hapo ndipo, utakaponyenyekea, useme na kulala chini,

maneno yako, utakayonitolea toka mavumbini,

yatakuwa ya kujipunguza,

sauti yako itakuwa kama ya mzimu atokaye kuzimuni,

maneno yako ya kusema uvumbini

yatakuwa ya kunong'ona tu.

⁵Lakini mavumo ya wale wageni waliokujia

yatakuwa kama mavumbi membamba,

kweli mavumo ya hao wakorofi

yatakuwa kama makapi yapeperushwayo;

nayo yatakuwa kwa ghafula, wagunduliwe nayo.

⁶Maana utakaguliwa na Bwana Mwenye vikosi,

atakapokujia na kuitetemesha nchi kwa ngurumo,

kwani ni mwenye sauti kuu,

ataleta nao upepo wa kimbunga ulio wenye nguvu

na ndimi za moto ulao.

⁷Yatakuwa kama ndoto, mtu aliyoiota usiku,

hayo mavumo ya wamizimu waliokuja

kumshambulia Simba wa Mungu

nao waliolipigia boma lake vita na kumsonga.

⁸Itakuwa kama mwenye njaa anayeota akila chakula,

lakini anapoamka hakuna kitu kwake,

au kama mwenye kiu anayeota akinywa,

lakini anapoamka hutweta na kuivuta roho yake.

Hivyo ndivyo, yatakavyokuwa mavumo ya wamizimu wote,

waliokuja kuushambulia mlima wa Sioni!

Watu hawatambui maana.

⁹Tumbueni macho na kuyakodoa! Yatieni giza na kupofuka!

Wamelewa, lakini si kwa mvinyo,

wanapepesuka, lakini si kwa kileo.

¹⁰Kwani Bwana amewamwagia ninyi roho ya usingizi mwingi,

akayafumba macho yenu, ninyi wafumbuaji,

akavifunika vichwa vyenu, ninyi wachunguzaji.

¹¹Hayo yote mliyoyaona yakawa kwenu kama maneno ya kitabu

kulichofungwa na kutiwa muhuri;

kama ajuaye kusoma anapewa na kuambiwa: Kisome hiki!

atajibu: Siwezi, kwani kimefungwa na kutiwa muhuri.

¹²Kama asiyejua kusoma anapewa na kuambiwa: Kisome hiki!

atajibu: Sijui kusoma.

¹³Bwana akasema:

Ukoo huu hunikaribia na vinywa vyao,

huniheshimu kwa midomo tu,

lakini mioyo yao inanikalia mbali;

kwa sababu hii hunicha bure,

kwani hufundisha mafundisho yaliyo maagizo ya watu tu.

¹⁴Kwa hiyo na mwone, ninavyoendelea

kuufanyizia ukoo huu mambo ya mataajabu na ya vioja,

werevu wao walio werevu wa kweli kwao upotee,

nao utambuzi wa watambuzi wao usionekane.

¹⁵Yatawapata wao walao njama,

kwamba: wamfiche Bwana mashauri yao!

Nao wafanyao gizani kazi zao na kusema:

Yuko nani anayetuona? Yuko nani anayetujua?

¹⁶Mmepotea kabisa!

Uko udongo unaowaziwa kuwa sawa na mfinyanzi?

Au kiko kiumbe kiwezacho kumwambia aliyekiumba:

Hukunifanya?

Au kiko chombo kiwezacho kumwambia aliyekifinyanga:

Hujui kitu?

Bwana atayageuza yote.

¹⁷Sicho kitambo kidogo bado,

Libanoni kugeuke kuwa shamba,

nayo mashamba yawaziwe kuwa mwitu?

¹⁸*Siku ile viziwi watayasikia maneno yaliyoandikwa,

nayo macho ya vipofu yaliyokuwa yenye giza jeusi yataona.

¹⁹Nao wanyonge wataendelea kumfurahia Bwana

nao walio wakiwa kuliko watu wengine

watamshangilia Mtakatifu wa Isiraeli.

²⁰Kwani wakorofi watakuwa wamekwisha,

nao wafyozaji watakuwa wameangamia,

nao wote watakuwa wameng'olewa

waliokataa kulala usingizi, wapate kuwapotoa wenzao.

²¹Ndio wanaokosesha wengine shaurini,

ndio wanaowategea waamuliao penye malango ya mji,

kwani hivyo wanawapotoa waongofu, wasishinde shaurini.*

²²Kwa sababu hii Bwana alimkomboa Aburahamu,

akauambia mlango wa Yakobo:

Sasa Yakobo hatapatwa tena na soni,

wala uso wake hautamvilia tena.

²³Kwani watoto wake watakapoona,

mikono yangu itakayoyafanya kwao,

watalitakasa Jina langu,

ndiko kumtakasa Mtakatifu wa Yakobo

na kumcha Mungu wa Isiraeli.

²⁴Ndipo, waliopotea rohoni watakapojua utambuzi

nao walionung'unika watajifundisha yafaayo.