Yesaya 30

Wakimbiliao Misri wataangamia.

¹Ndivyo, asemavyo Bwana:

Yatawapata wale wana wabishi

wapigao shauri lisilo la kwangu,

wafanyao agano pasipo Roho yangu,

kusudi waongeze kosa kwa kosa.

²Ndio wanaokwenda kushuka Misri

pasipo kukiuliza kinywa changu,

wajipatie nguvu kwa nguvu za Farao

kwa kukikimbilia kivuli cha Misri.

³Lakini nguvu zake Farao zitawageukia, ziwatie soni,

nako kukikimbilia kivuli cha Misri kutawapatia matusi.

⁴Ijapo wakuu wake waje Soani,

ijapo wajumbe wake wafike mpaka Hanesi,

⁵wao wote wataona soni na watu wasiowafalia kitu,

kwa kuwa hawawezi kuwasaidia

au kuwapatia cho chote kuwafaliacho,

kwani wanawatia soni tu, wengine wawabeze na kuwatukana.

⁶Wanapita katika nchi yenye masongano na mahangaiko,

kwani wamo simba na chui, pili na nyoka za moto warukao.

Huko wanapitisha mali zao migongoni kwa punda,

nako kwenye nundu za ngamia malimbiko yao,

wayapelekee watu wasiowafalia kitu.

⁷Nayo Misri msaada wake ni kama mvuke, ni wa bure tu,

kwa sababu hii waliipa jina hili:

Mkuu wa maneno anayejikalia tu.

⁸Sasa nenda, uyachore katika kibao machoni pao,

kisha uyaandike namo kitabuni,

siku za nyuma yapate kuwashuhudia kale na kale.

⁹Kwani ndio watu wabishi na wana wenye uwongo,

kweli ndio wana wasiotaka kuyasikia Maonyo ya Bwana.

¹⁰Huwaambia waonaji: Msione!

nao watazamaji: Msitutazamie yaliyo ya kweli!

Sharti mtuambie yaliyo mafuta ya midomo,

sharti mtutazamie madanganyifu!

¹¹Ondokeni njiani penye kweli! Ipotoeni mikondo inyokayo!

Tuacheni, tupumzike, tusimwone Mtakatifu wa Isiraeli!

¹²Kwa hiyo Mtakatifu wa Isiraeli anasema:

Kwa kuwa mmelikataa neno hili,

mkayaegemea mambo yenye ukorofi na upotovu,

mkayatumia ya kujishikizia:

¹³kwa sababu hii hizo manza, mlizozikora,

zitakuwa kama ufa

unaokwenda ukipanuka katika ukuta mrefu,

nao utabomoka ghafula na kuwagundua watu.

¹⁴Naye Bwana atauvunja, kama watu wanavyovunja mtungi

wakiupigapiga pasipo kuuhurumia,

hapo, utakapovunjika, kisipatikane kigae

cha kupalia moto jikoni, wala cha kutekea maji kisimani.

¹⁵Kwani hivi ndivyo, anavyosema Bwana Mungu,

aliye Mtakatifu wa Isiraeli:

Mtakaporudi na kutulia, mtaokolewa;

mtakaponyamaza na kujiegemeza,

mtapata nguvu,

lakini mmekataa!

¹⁶Mkasema: Hapana! Na tupande farasi, tupige mbio!

Kwa hiyo mtakimbia.

Mkasema: Na tupande farasi wenye mbio sana!

Kwa hiyo watakaowafukuza watawapigisha mbio.

¹⁷Elfu wa kwenu wataikimbia yowe ya mmoja;

watano wakipiga yowe, mtakimbia wote,

mpaka masao yenu yawe kama mlingoti ulioko mlimani juu

au kama bendera iliyoko kilimani.

Wamngojeao Bwana wataokoka.

¹⁸Kwa hiyo Bwana anangoja, apate kuwatolea upole;

kwa hiyo anainuka, apate kuwahurumia,

kwani Bwana ni Mungu wa kuamua kweli;

wenye shangwe ni wote wanaomngoja,

¹⁹kwani walio wa Sioni watakaa Yerusalemu.

Hamtalia machozi kamwe, atawaendea kwa upole;

atakapozisikia sauti za vilio vyenu atawaitikia.

²⁰Kweli, Bwana amewalisha mikate ya masongano,

akawanywesha maji ya mahangaiko,

lakini wafunzi wako hawatajificha tena,

ila macho yako yatakuwa yakiwatazamia wafunzi wako.

²¹Nayo masikio yako yatasikia neno

litokalo nyuma yako kwamba:

Njia ni hii, ishikeni!

kama mtakuwa mmeiacha kuumeni au kushotoni.

²²Hapo ndipo, mtakapovichafua vinyago vyenu vya miti

vilivyofunikwa na fedha navyo vilivyofunikwa na dhahabu,

utavitupatupa, kama ni takataka,

na kuviambia: Tokeni kwetu!

²³Naye atakupa mvua za mbegu zako, ulizozipanda shambani,

nalo shamba litakutolea mikate itakayokuwa yenye nguvu ya kunonesha,

nao kondoo wako watalisha siku zile kwenye uwanda mpana.

²⁴Nao ng'ombe na punda wako wanaolima shamba

watakula muhindi ulioungwa na majani yenye chumvi,

nao utakuwa umepepetwa kwa ungo na kipepeto.

²⁵Katika kila mlima mrefu,

hata katika kila kilima kiendacho juu

kutakuwa na vijito vya maji yarukayo;

itakuwa siku ile, wengi watakapouawa,

minara itakapoanguka.

²⁶Nao mwanga wa mwezi utakuwa kama wa jua,

nao mwanga wa jua utaongezeka mara saba,

uwe kama wa siku saba.

Itakuwa siku ile,

Bwana atakapovifunga vidonda vyao walio ukoo wake

na kuyaponya machubuko, aliyowapiga.

Mapatilizo ya Asuri,

²⁷Tazameni, Jina la Bwana linakuja toka mbali,

makali yake yanawaka, moshi mwingi unapanda,

midomo yake imejaa machafuko,

ulimi wake ni kama moto ulao!

²⁸Pumzi yake ni kama mto udidimizao,

nayo maji yake hufika shingoni,

awapepete wamizimu katika pepeto liangamizalo,

atie mataifa mazima hatamu vinywani za kuwapoteza.

²⁹Nanyi mtaimba, kama watu wanavyoimba

katika usiku wa kuandalia sikukuu,

mtafurahi mioyoni kama wasafiri

wanaokwenda na kupiga mazomari,

waje mlimani kwa Bwana aliye mwamba wa Isiraeli.

³⁰Ndipo, Bwana atakapoipaza sauti yake yenye utukufu,

atauonyesha nao mkono wake, jinsi unavyokunjuka,

akifoka kwa ukali na kuwakisha ndimi za moto ulao,

akileta kimbunga na mvua yenye maji mengi

pamoja na mvua ya mawe.

³¹Kwani Waasuri watastushwa na sauti yake Bwana,

atakapowapiga kwa fimbo yake:

³²kila mara fimbo ya kuwapiga itakapotokea,

Bwana akiielekeza, iwajie,

itakuwa kwa kupiga patu na mazeze,

vita vyake vitakuwa hivyo akiwatisha na kuwapigapiga.

³³Kwani tangu kale pametengenezwa mahali

pa kuchinjia watu, wawe ng'ombe za tambiko,

naye mfalme amepatengenezewa pake,

napo ni papana na parefu kwenda chini;

kuzunguka hapo moto uko tayari,

hata kuni nyingi zimekwisha kupangwa;

pumzi ya Bwana yenye moto wa kiberitiberiti itaziwasha.