Yesaya 38

Kuugua na kupona kwake Hizikia.

¹Siku zile Hizikia akaugua, kufa kukamjia karibu. Ndipo, mfumbuaji Yesaya, mwana wa Amosi, alipokuja kwake, akamwambia: Hivi ndivyo, Bwana anavyosema: Yaliyo yako yaagizie walio wa mlango wako! Kwani wewe utakufa, hutarudi kuwa mzima tena.

²Hizikia akageuka na kuuelekeza uso wake ukutani, akamwomba Bwana,

³akasema: E Bwana, na uukumbuke mwenendo, nilioufanya mbele yako kwa welekevu, nikayafanya kwa moyo wote mzima, yaliyo mema machoni pako. Kisha Hizikia akalia kilio kikubwa.[#2 Fal. 18:3-6.]

⁴Ndipo, neno la Bwana lilipomjia Yesaya kwamba:

⁵Nenda, umwambie Hizikia: Hivi ndivyo, Bwana Mungu wa baba yako Dawidi anavyosema: Nimesikia kuomba kwako, nikayaona hayo machozi yako. Basi, siku zako nitaziongeza na kukupa tena miaka kumi na mitano.

⁶Namo mkononi mwake mfalme wa Asuri nitakuponya, hata mji huu, maana nitaukingia mji huu.

⁷Nacho hiki kitakuwa kielekezo chako kitokacho kwa Bwana cha kwamba: Bwana atalifanya neno hili, alilolisema.

⁸Tazama: kuvuli kilichoshuka penye saa ya jua ya Ahazi nitakirudisha nyuma vipande kumi! Kisha jua likarudi penye saa ya jua vipande kumi, lilivyokuwa limevishuka.

⁹Huu ndio wimbo, Hizikia, mfalme wa Yuda, aliouandika katika ugonjwa wake alipokuwa amepona:

¹⁰Mimi nilisema:

Sasa, siku zangu zinapokuwa zimefika kati,

sharti niingie malangoni mwa kuzimu!

Nimenyang'anywa miaka yangu iliyosalia.

¹¹Nilisema: Sitamwona Bwana tena,

maana Bwana yuko katika nchi yao walio hai;

huko kwao wakaao katika nchi ya vivuli

sitapata kuona mtu tena.

¹²Kituo changu kimeng'olewa,

kikachukuliwa kwangu kama hema la mchungaji;

nimezizinga siku za maisha yangu kama mfuma nguo

azikate penye nyuzi zinazozishika;

mchana utakapokuwa haujawa usiku bado, utanitowesha.

¹³Nikalia mpaka asubuhi,

maana aliivunja mifupa yangu sawasawa kama simba;

mchana utakapokuwa haujawa usiku bado, utanitowesha.

¹⁴Nikalia kama kinega au mbayuwayu

nikapiga kelele kama hua,

macho yangu yakafifia kwa kutazama juu kwamba:

Bwana ninakorofika! Nikomboe!

¹⁵Sasa nisemeje? Aliyoniambia, yeye ameyafanya.

Nami nitaendelea na kutulia miaka yangu yote

kwa ajili ya uchungu, roho yangu iliouona.

¹⁶Bwana! Kwa maneno kama hayo watu hupata uzima,

nao uzima wa roho yangu umo humo;

nami umeniponya na kunirudisha uzimani.

¹⁷Tazama! Uchungu uliokuwa kweli uchungu kwangu

umenipatia utengemano!

Kwa kunipenda wewe umeitoa roho yangu

mle shimoni mwa kutoweka,

kwani makosa yangu yote uliyatupa nyuma yako.

¹⁸Kwani kuzimuni siko, wanakokushukuru,

wala waliokufa sio wanaokushangilia,

wala walioshuka shimoni sio wanaoungojea welekevu wako.

¹⁹Aliye hai, kweli aliye hai ndiye

atakayekushukuru kama mimi leo.

Baba huwajulisha watoto mambo ya welekevu wako.

²⁰Bwana ndiye aliyetaka kuniokoa;

kwa hiyo na tumpigie mazeze na kumwimbia

Nyumbani mwa Bwana siku zetu zote za kuwapo!

²¹Kisha Yesaya akasema, walete andazi la kuyu, waliweke juu ya jipu, apate kupona.[#2 Fal. 20:7.]

²²Hizikia akasema: Kielekezo ni nini cha kwamba: Nitapanda tena kwenda nyumbani mwa Bwana?[#Yes. 38:7-8; 2 Fal. 20:8-11.]