Yesaya 55

Magawio ya Kiroho ya Agano Jipya.

¹Nyote mwonao kiu, njoni kwenye maji!

Nanyi mkosao fedha, njoni kununua, mpate kula!

Nunueni pasipo fedha bure tu mvinyo na maziwa!

²Mbona mnatoa fedha pasipo kupata chakula?

Nayo mapato yaliyowachokesha

mbona mnayatoa pasipo kushiba?

Nisikilizeni, mpate kula mema,

roho zenu zipendezwe na manono!

³Yategeni masikio yenu! Njoni kwangu, mnisikie,

roho zenu zipate kupona!

Nami nitafanya nanyi agano la kale na kale

la kuwapa magawio ya Dawidi yanayotegemeka.

⁴Jueni! Nimemweka kunishuhudia kwa makabila ya watu,

akawa mkuu na mtawala makabila ya watu.

⁵Tazama! Utaita watu, usiowajua,

nao watu wasiokujua watakukimbilia,

kwa kuwa uko na Bwana Mungu wako,

kwa kuwa Mtakatifu wa Isiraeli amekupa utukufu.

Nguvu ya Neno la Mungu.

⁶*Mtafuteni Bwana, akingali yuko, aoneke!

Mwiteni, akingali karibu!

⁷Asiyemcha Mungu na aiache njia yake,

kila mtu na auache upotovu wa mawazo yake!

Na arudi kwake Bwana Mungu wetu, amhurumie!

Kwani huzidisha kutuondolea mabaya.

⁸Kwani ndivyo, asemavyo Bwana:

Mawazo yangu siyo mawazo yenu,

wala njia zenu sizo njia zangu;

⁹kama mbingu zilivyo juu kabisa kuliko nchi,

ndivyo, njia zangu zilivyo juu kabisa kuliko zenu,

ndivyo, nayo mawazo yangu yalivyo makuu

kuliko mawazo yenu.

¹⁰Kwani kama mvua ya maji na ya mawe

inavyoshuka toka mbinguni,

isirudi huko, isipokwisha kuinywesha nchi

na kuizalisha na kuichipuza,

itoe mbegu za kupanda na vilaji vya kula:

¹¹ndivyo, litakavyokuwa Neno langu

litokalo kinywani mwangu,

nalo halitarudi kwangu bure

lisipokwisha kufanya yanipendezayo,

lipate kuyatimiza,

ambayo nililituma kuyafanya.*

¹²Kwani mtatoka na kufurahi,

mtaongozwa, mwende na kutengemana.

Milima navyo vilima vitapaza sauti

za kushangilia mbele yenu,

hata miti yote ya porini itapiga makofi.

¹³Palipokuwa na mikunju tu, patakuwa na mivinje,

napo palipokuwa na viwawi tu, patakuwa na miti ya vihagilo,

nayo miti hiyo italitangaza Jina la Bwana,

iwe kielekezo chake cha kale na kale kisichong'oleka.