Yesaya 64

Kuendelea kuomba wokovu.

¹Laiti ungizipasua mbingu, ukashuka,

milima ikitukutika mbele yako!

²Kama moto unavyokoleza vijiti, viwake,

au kama moto unavyochemsha maji,

hivyo wajulishe wapingani wako Jina lako,

wamizimu watetemeke mbele yako!

³Ungefanya matendo yatishayo, tusiyoyangojea,

ukashuka, milima ikitukutika mbele yako!

⁴Tangu kale hawakusikia, wala hawakupata habari,

wala macho hayakuona, ya kuwa yko Mungu

anayewafanyia matendo wamngojeao, isipokuwa wewe.

⁵Unawaendea wafurahiao kufanya yaongokayo,

nao wakukumbukao katika njia zako.

Tazama, ulikasirika, tulipokosa

na kuendelea hivyo siku nyingi,

lakini huko nyuma tukaokolewa.

⁶Sisi sote tumekuwa kama wachafu,

wongofu wetu wote ukawa kama nguo yenye madoadoa;

sisi sote tukanyauka kama majani,

mabaya yetu yakatuchukua,

kama upepo unavyochukua majani makavu.

⁷Hakuna alitambikiaye Jina lako,

hakuna ajihimizaye kukushika,

kwani umeuficha uso wako, tusiuone,

ukatuacha, tuzimie kwa nguvu za manza, tulizozikora.

⁸Na sasa, Bwana, wewe ndiwe baba yetu;

sisi tu udongo, nawe ndiwe mfinyanzi wetu,

sisi sote tu kazi za mikono yako.

⁹Bwana, usizidi kukasirika sana,

wala usizikumbuke manza kale na kale!

Twakuomba: Tutazame! Sisi sote tu ukoo wako!

¹⁰Miji yako mitakatifu imegeuka kuwa mapori,

hata Sioni ni pori tupu, Yerusalemu umeangamia.

¹¹Nyumba yetu takatifu iliyokuwa yenye utukufu,

baba zetu walimokushangilia, imeteketezwa na moto;

yote, tuliyoyapenda sana, yamegeuka kuwa mabomoko.

¹²Bwana, kwa ajili ya hayo utawezaje kujizuia?

Utawezaje kunyamaza na kutuacha,

tuzidi kunyongeka sana?