Iyobu 33

Mapatilizo ya Mungu yanataka kuiponya roho ya mtu.

¹Kwa hiyo Iyobu, yasikilize nitakayoyasema! Maneno yangu yote yategee masikio yako!

²Tazama! Nitakifumbua kinywa changu, ulimi wangu useme kinywani mwangu.

³Maneno yangu yananyoka kama moyo wangu; midomo yangu itayasema ninayoyajua, yaliyo ya kweli.

⁴Roho ya Mungu aliyeniumba na pumzi ya Mwenyezi zinanipa kuwapo.

⁵Kama utaweza na unijibu! Jiweke tayari kusimama usoni pangu!

⁶Tazama! Mimi na wewe kwake Mungu tu sawa, mimi nami nilifinyangwa kwa udongo.[#Iy. 10:9.]

⁷Tazama! Sikutishi, usinistukie, nayo nitakayokutwika yasikulemeze.

⁸Kweli ulisema masikioni pangu, nikaisikia sauti yao hayo maneno:

⁹Ninatakata, sikufanya kiovu, mimi ni safi, sikukora manza.[#Iy. 16:17; 27:6.]

¹⁰Tazama! Yako mambo, Mungu aliyonionea: ananiwazia kuwa miongoni mwao wachukivu wake.[#Iy. 13:24; 19:11.]

¹¹Anaitia miguu yangu mikatale, anapaangalia pote, nipitapo.[#Iy. 13:27.]

¹²Tazama! Ninakujibu: kwa hiyo huongoki, kwani Mungu ni mkuu kuliko mtu.

¹³Mbona unamgombeza kwa kusema: Hayo yote hajibu neno liwalo lote?

¹⁴Lakini Mungu akisema mara moja au mara mbili, mtu haangalii; au sivyo?

¹⁵Watu wakiona ndoto kwa kulala usiku wenye usingizi mwingi, hapo, wanapokuwa wanalala vitandani pao,

¹⁶ndipo, anapoyazibua masikio ya watu, ayatie muhuri hayo, aliyowafunza na kuwaonya,[#Iy. 36:10; Sh. 16:7.]

¹⁷amkataze mtu kuyafanya tena, aliyoyafanya, ayakinge majivuno, yasimpate mtu;[#Sh. 119:67,71.]

¹⁸aizuie nayo roho yake, isitumbukie shimoni, nao mwili wake wenye uzima, usipite penye mishale iuayo.

¹⁹Kwa hiyo mtu anachapwa na kuumizwa kitandani pake, mifupa yake ikishindana na mateso pasipo kukoma.

²⁰Huchafukwa na moyo anapokula, ijapo kiwe chakula hicho, anachokitamani rohoni.

²¹Nyama za mwili wake zinakauka, zisionekane, mifupa yake iliyokuwa haionekani ikatokea waziwazi.

²²Roho yake ikafika karibu kuingia shimoni, nao moyo wake ukawafikia wauuao.

²³Hapo malaika akamtokea, ampatanishe na Mungu, mmoja wao walioko kama elfu; akimwonyesha mtu njia ya kunyoka tena,[#Ebr. 1:14.]

²⁴ndipo, atakapomhurumia na kumwambia: Mwokoe huyu, asishuke shimoni! Kwani makombozi yake nimeyapata.

²⁵Ndipo, nyama za mwili wake zitakapochipuka kuliko zile za utoto, azirudie kuwa kama siku hizo za ujana wake.[#Sh. 103:5.]

²⁶Atakapomwomba Mungu, atapendezwa naye, atamwonyesha uso wake, aushangilie; ndivyo, anavyompatia mtu kuwa mwongofu tena.

²⁷Naye ataimba, watu wamsikie, akiungama kwamba: Nalikosa kwa kuyapotoa yanyokayo, lakini hakuna malipo, niliyotozwa!

²⁸Akaikomboa roho yangu, isitumbukie shimoni, moyo wangu uufurahie huu mwanga![#Iy. 33:18.]

²⁹Tazama! Hayo yote ndiyo, Mungu anayoyafanya mara mbili, hata mara tatu,

³⁰airudishe roho ya mtu, isitumbukie shimoni, mwanga wenye uzima umwangazikie.[#Sh. 56:13; 103:4.]

³¹Tega masikio, Iyobu, unisikilize! Nyamaza tu, mimi niseme!

³²Kama unaona la kusema, nijibu! Sema! Kwani nitapendezwa kukuona kuwa mwenye wongofu.

³³Kama wewe huna la kusema, nisikilize! Nyamaza tu, nikufunze werevu ulio wa kweli!

Elihu anasema mara ya pili: Mungu hayapotoi yaliyo sawa.

Elihu akajibu tena akisema: