3 Mose 24

Agizo la kuziwasha taa za kinara cha Patakatifu.

¹Bwana akamwambia Mose kwamba:

²Waagize wana wa Isiraeli, wakupatie mafuta ya chekele yaliyotwangwa vema kuwa safi ya kinara ya kutia siku zote katika taa zake.[#2 Mose 27:20.]

³Hapo nje ya pazia penye Sanduku la Ushahidi katika Hema la Mkutano Haroni azitengeneze hizo taa, ziwake tangu jioni hata asubuhi mbele ya Bwana pasipo kukoma. Maongozi haya na yawe ya kale na kale kwa vizazi vyenu.

⁴Penye kile kinara cha dhahabu tupu na azitengeneze taa zake, ziwake mbele ya Bwana siku zote.

Agizo la kuweka mikate mezani pa Bwana.

⁵Tena uchukue unga mwembamba, uuoke kuwa mikate kumi na miwili, kila mikate mmoja uwe wa pishi moja ya unga.

⁶Kisha uiweke mistari miwili, kila mstari wenye mikate sita, juu ya meza ya dhahabu tupu mbele ya Bwana.[#2 Mose 25:30.]

⁷Kisha uweke juu ya kila mstari uvumba ulio safi, uwe moto wa kumpendeza Bwana na kumkumbusha hiyo mikate.

⁸Kila siku ya mapumziko sharti aitengeneze tena mbele ya Bwana pasipo kukoma. Hili na liwe agano la kale na kale nao wana wa Isiraeli, wasiache kuitoa.

⁹Kisha hiyo mikate itakuwa yao Haroni na wanawe, nao sharti waile mahali patakatifu. Kwa kuwa mitakatifu yenyewe sharti iwe fungu lao litokalo kwenye mioto ya Bwana. Hii na iwe haki yao ya kale na kale.

Agizo la kuwaua wamtukanao Mungu.

¹⁰Ikawa, mwana wa mwanamke wa Kiisiraeli mwenye baba wa Kimisri alipotokea katikati ya wana wa Isiraeli, huyu mwana wa mwanamke wa Kiisiraeli akagombana na mtu wa Kiisiraeli makambini.

¹¹Naye yule mwana wa mwanamke wa Kiisiraeli akalitukana Jina la Bwana pamoja na kuliapiza. Ndipo, walipompeleka kwa Mose, nalo jina la mama yake lilikuwa Selomiti, binti Diburi, wa shina la Dani.[#3 Mose 24:16.]

¹²Wakamweka kifungoni, wapate kuelezwa, kinywa cha Bwana kitakavyowaambia.[#4 Mose 15:34.]

¹³Bwana akamwambia Mose kwamba:

¹⁴Huyo mwenye kutukana mtokeze nje ya malago, kisha wote walioyasikia na wambandikie mikono yao kichwani pake, kisha watu wote wa mkutano huu na wamwue kwa kumpiga mawe.

¹⁵Lakini wana wa Isiraeli waambie kwamba: Mtu ye yote atakayemwapiza Mungu wake sharti alipishwe hilo kosa lake.

¹⁶Atakayelitukana Jina la Bwana sharti auawe kabisa, watu wote wa mkutano huu wakimpiga mawe. Kama ni mgeni au kama ni mwenyeji, kwa kulitukana hilo Jina hana budi kuuawa.[#2 Mose 20:7; Mat. 26:65.]

Mapatilizo yao wanaoumiza wenzao.

¹⁷Mtu akimpiga mwenzake, afe, sharti auawe naye.

¹⁸Lakini akipiga nyama, naye akifa, sharti amlipe, nyama aliye mzima kwa yule aliyekufa.[#2 Mose 21:12.]

¹⁹Mtu akimwumiza mwenziwe, apate kilema, naye sharti afanyiziwe yaleyale, aliyoyafanya:[#2 Mose 21:23-25.]

²⁰kidonda kwa kidonda, jicho kwa jicho, jino kwa jino. Kilema, alichompatia mwenzake, apatiwe naye.

²¹Ni hivi: mtu atakayempiga nyama, naye akifa, sharti amlipe; lakini mtu atakayempiga mwenziwe, naye akifa, sharti auawe.

²²Hukumu za kwenu sharti ziwe moja, mwenye kuhukumiwa kama ni mgeni au kama ni mwenyeji. Kwani mimi Bwana ni Mungu wenu.[#2 Mose 12:49; 3 Mose 19:34.]

²³Mose alipokwisha kuwaambia wana wa Isiraeli maneno haya, wakamtokeza yule mwenye kutukana nje ya makambi, wakamwua kwa kumpiga mawe; wana wa Isiraeli wakafanya, kama Bwana alivyomwagiza Mose.