Luka 3

Yohana Mbatizaji.

¹Mwaka wa 15 wa kutawala kwake Kaisari Tiberio Pontio Pilato alikuwa mtawala nchi ya Yudea, naye Herode alikuwa mfalme wa Galilea, naye Filipo, ndugu yake, alikuwa mfalme wa Iturea na wa nchi ya Tarakoniti, naye Lisania alikuwa mfalme wa Abilene,

²tena Ana na Kayafa walikuwa watambikaji wakuu. Hapo ndipo, neno la Mungu lilipomjia Yohana, mwana wa Zakaria, huko nyikani.

³Akaenda katika nchi zote za kando ya Yordani, akatangaza ubatizo wa kujutisha, wapate kuondolewa makosa.[#Mar. 1:4.]

⁴Ikawa, kama ilivyoandikwa kitabuni mwa maneno ya mfumbuaji Yesaya:

Iko sauti ya mtu apigaye mbiu nyikani:

Itengenezeni njia ya Bwana!

Yanyosheni mapito yake!

⁵Vibonde vyote vifukiwe,

navyo vilima vyote na vichuguu vyote vichimbuliwe!

Napo palipopotoka panyoshwe,

napo penye mashimo pawe njia za sawasawa,

⁶wote wenye miili wauone wokovu wake Mungu.

⁷Akawaambia makundi ya watu waliotokea, wabatizwe naye: Ninyi wana wa nyoka, nani aliwaambia ninyi, ya kuwa mtayakimbia makali yatakayokuja?[#Mat. 23:33.]

⁸Tendeni mazao yaliyo ya kujuta kweli! Msianze kusema mioyoni mwenu: Tunaye baba yetu, ndiye Aburahamu! Kwani nawaambiani: Katika mawe haya ndimo, Mungu awezamo kumwinulia Aburahamu wana.

⁹Miti imekwisha wekewa mashoka mashinani, kila mti usiozaa matunda mazuri hukatwa, utupwe motoni.

¹⁰Yale makundi ya watu wakamwuliza wakisema: Basi, tufanye nini?

¹¹Akajibu akiwaambia: Mwenye nguo mbili amgawie mwenziwe asiye nayo, naye mwenye vyakula na afanye vilevile!

¹²Watoza kodi nao walipokuja, wabatizwe, wakamwuliza: Mfunzi, tufanye nini?

¹³Naye akawaambia: Msitoze kuvipita hivyo, mlivyoagizwa!

¹⁴Walipomwuliza nao askari wakisema: Nasi tufanye nini? akawaambia: Msimwendee mtu kwa nguvu wala kwa ukorofi, tena mtoshewe na mishahara yenu!

¹⁵Watu walipokuwa wakingoja, vya Yohana vitakapotokea wazi, wote waliwaza mioyoni mwao kwamba: Yeye labda ni Kristo; ndipo, Yohana[#Yoh. 1:19-28.]

¹⁶aliposema akiwaambia wote: Mimi nawabatiza kwa maji; lakini anakuja aliye na nguvu kunipita mimi, nami sifai kumfungulia kanda za viatu vyake. Yeye atawabatiza katika Roho takatifu na katika moto.

¹⁷Ungo wa kupepetea umo mkononi mwake, apafagie pake pa kupuria ngano; ngano atazikusanya, aziweke chanjani mwake, lakini makapi atayachoma kwa moto usiozimika.

¹⁸Hivyo aliwapigia watu mbiu njema na kuwaonya hata mengine mengi.

¹⁹Lakini mfalme Herode alipoumbuliwa naye kwa ajili ya Herodia, mke wa nduguye, na kwa ajili ya mabaya yote, Herode aliyoyatenda,[#Mat. 14:3-4; Mar. 6:17-18.]

²⁰akayaongeza mabaya yake na kumfunga Yohanba kifungoni.

Kubatizwa kwa Yesu.

²¹Lakini watu wote walipokuwa wakibatizwa, Yesu anaye alipobatizwa, ikawa, alipokuwa katika kuomba, ndipo, mbingu zilipofunuka,

²²Roho Mtakatifu akamshukia mwenye mwili kama wa njiwa, sauti ikatoka mbinguni: Wewe ndiwe mwanangu mpendwa, nimependewa na wewe.[#Luk. 9:35.]

Ukoo wa Yesu.

²³Yesu alipoianza kazi yake alikuwa wa miaka kama 30. Akadhaniwa kuwa mwana wa Yosefu, wa Eli,[#Luk. 4:22.]

²⁴wa Matati, wa Lawi, wa Melki, wa Yanai, wa Yosefu,

²⁵wa matatia, wa Amosi, wa Nahumu, wa Esili, wa Nagai,

²⁶wa Mahati, wa Matatia, wa Simei, wa Yoseki, wa Yoda,

²⁷wa Yohana, wa Resa, wa Zerubabeli, wa Saltieli, wa Neri,

²⁸wa Melki, wa Adi, wa Kosamu, wa Elmadamu, wa Heri,

²⁹wa Yesu, wa Eliezeri, wa Yorimu, wa Matati, wa Lawi,

³⁰wa Simeoni, wa Yuda, wa Yosefu, wa Yonamu, wa Eliakimu,

³¹wa Melea, wa Mena, wa Matata, wa Natani, wa Dawidi,[#2 Sam. 5:14.]

³²wa Isai, wa Obedi, wa Boazi, wa Salmoni, wa Nasoni,[#Ruti 4:17-22.]

³³wa Aminadabu, wa Ramu, wa Hesiromu, wa Peresi, wa Yuda,[#1 Mose 29:35.]

³⁴wa Yakobo, wa Isaka, wa Aburahamu, wa Tera, wa Nahori,[#1 Mose 21:2-3; 11:10-26.]

³⁵wa Serugi, wa Ragau, wa Pelegi, wa Eberi, wa Sala,[#1 Mambo 1:24-27.]

³⁶wa Kenani, wa Arpakisadi, wa Semu, wa Noa, wa Lameki,[#1 Mose 5:3-32.]

³⁷wa Metusela, wa Henoki, wa Yaredi, wa Mahalaleli, wa Kenani,

³⁸wa Enosi, wa Seti, wa Adamu wa Mungu.[#1 Mose 5:1-3.]