Luka 4

Kujaribiwa kwa Yesu.

¹Yesu akajaa Roho takatifu, akarudi akitoka huko Yordani, akapelekwa na Roho nyikani,

²akajaribiwa siku 40 na Msengenyaji. Siku zile hakula cho chote; zilipokwisha pita, akaona njaa.

³Msengenyaji akamwambia: Kama ndiwe Mwana wa Mungu, liambie jiwe hili, liwe chakula!

⁴Yesu akamjibu akisema: Imeandikwa:

Mtu hataishi kwa chakula tu, ila kwa kila neno la Mungu.

⁵Kisha akampandisha mlimani, akamwonyesha kwa kitambo kidogo ufalme wote pia wa ulimwengu.

⁶Kisha Msengenyaji akamwambia: Nguvu hii yote na utukufu wake nitakupa wewe; kwani mimi nimepewa, nami humpa ye yote, nimtakaye.

⁷Basi, wewe ukiniangukia hapa machoni pangu, yote yatakuwa yako.

⁸Yesu akajibu akimwambia: Ondoka nyuma yangu, Satani! Imeandikwa:

Umwangukie Bwana Mungu wako na kumtumikia peke yake!

⁹Kisha akampeleka Yerusalemu, akamsimamisha juu pembeni hapo Patakatifu, akamwambia: Kama ndiwe Mwana wa Mungu, ruka hapa, ujitupe chini!

¹⁰Kwani imeandikwa:

Atakuagizia malaika zake, wakulinde,

¹¹nao watakuchukua mikononi mwao,

usije kujikwaa mguu wako katika jiwe.

¹²Yesu akajibu akimwambia: Liko neno la kwamba:

Usimjaribu Bwana Mungu wako!

¹³Msengenyaji alipokwisha kumjaribu yote akaondoka, akamwacha kwanza.[#Luk. 22:28; Ebr. 4:15.]

Mahubiri katika Nasareti.

¹⁴Yesu akarudi Galilea mwenye nguvu ya Roho, akavumika katika nchi zote zilizoko pembenipembeni.

¹⁵Naye alipofundisha katika nyumba zao za kuombea akatukuzwa nao wote.

¹⁶*Alipofika Nasareti, - ndio mji, alimolelewa, - akaingia siku ya mapumziko nyumbani mwa kuombea, kama alivyozoea. Alipoinuka kuwasomea

¹⁷akapewa kitabu cha mfumbuaji Yesaya; alipokifunua hicho kitabu akaona mahali palipolandikwa:[#Yes. 61:1-2.]

¹⁸Roho ya Bwana inanikalia,

kwa hiyo ameanipaka mafuta,

niwapigie maskini mbiu njema.

Amenituma, niwatangazie mateka,

ya kuwa watakombolewa,

nao vipofu, ya kuwa wataona,

niwape ruhusa walioumizwa, wajiendee,

¹⁹niutangaze mwaka wa Bwana upendezao.[#3 Mose 25:10.]

²⁰Kisha akakifunga kitabu, akamrudishia mtumishi, akaketi. Ndipo, wote waliokuwamo humo nyumbani mwa kuombea walipomkazia macho,

²¹akaanza kuwaambia: Leo hivi yaliyoandikwa hapa yametimia masikioni penu.*

²²Nao wote wakamshuihudia ya kuwa ndivyo, wakastaajabu maneno ya upole yaliyotoka kinywani mwake, wakasema: Huyu si mwana wa Yosefu?[#Luk. 3:23; Yoh. 6:42.]

²³Akawaambia: Kweli mtaniambia fumbo hili: Mganga, jiponye mwenyewe! Hata huku kwako, ulikokulia, yafanye, tuliyoyasikia, ya kuwa yamefanyika Kapernaumu![#Mat. 4:13.]

²⁴Lakini akasema: Kweli nawaambiani: Hakuna mfumbuaji anayepokelewa kwao, alikokulia.[#Yoh. 4:44.]

²⁵Nawaambiani ya kweli: Siku za Elia kulikuwa na wajane wengi katika Waisiraeli; ni hapo, mbingu zilipofungwa miaka mitatu na miezi sita, ikawa njaa kubwa katika nchi zote.[#1 Fal. 17:1,9; 18:1; Yak. 5:17.]

²⁶Lakini hao Elia hakutumwa kwa mwenzao mmoja, ila alitumwa Sareputa wa Sidoni kwa mwanamke mjane wa kule.

²⁷Tena siku za mfumbuaji Elisa kulikuwa na wenye ukoma wengi katika Waisiraeli, lakini kwao hao hakuna aliyetakaswa ila Namani wa Ushami.[#2 Fal. 5:14.]

²⁸Wote waliokuwamo humo nyumbani mwa kuombea walipoyasikia haya, mioyo yao ikajaa makali,

²⁹wakainuka, wakamfukuza mjini, wakampeleka ukingoni pa mlima, ambao mji wao ulikuwa umejengwa juu yake, wapate kumsukuma chini.

³⁰Lakini yeye akapita katikati yao, akaenda zake.

Mwenye pepo.

³¹Akashuka kwenda Kapernaumu, mji wa Galilea, akawa akiwafundisha siku ya mapumziko.[#Mat. 4:13; Yoh. 2:12.]

³²Nao wakashangazwa na mafundisho yake, kwani maneno yake yalikuwa yenye nguvu.[#Mat. 7:28-29; Yoh. 7:46.]

³³Humo nyumbani mwa kuombea mkawa na mtu mwenye pepo mchafu, akapaza sauti na kupiga kelele:

³⁴Acha! Tuko na jambo gani sisi na wewe, Yesu wa Nasareti? Umekuja kutuangamiza. Nakujua, kama u nani; ndiwe Mtakatifu wa Mungu.

³⁵Yesu alipomkaripia akisema: Nyamaza, umtoke! ndipo, yule pepo alipomkumba, aanguke katikati, kisha akamtoka pasipo kumwumiza.

³⁶Wote wakaingiwa na kituko, wakasemezana wao kwa wao wakiuliza: Neno gani hilo? Anawaagiza pepo wachafu kwa nguvu ya kifalme, nao hutoka!

³⁷Huo uvumi wake ukatoka, ukafika po pote penye nchi zilizoko pembenipembeni.

Mkwewe Simoni.

³⁸Alipoondoka nyumbani mwa kuombea akaingia nyumbani mwa Simoni. Naye mama ya mkewe Simoni alikuwa ameshikwa na homa kali, wakamwombea kwake.

³⁹Akaja, akasimama kichwani pake, akaikaripia homa; ndipo, ilipomwacha. Papo hapo akainuka kitandani, akawatumikia.

⁴⁰Jua lilipokuchwa, wakaja wote waliokuwa na wanyonge wa magonjwa menginemengine, wakiwaleta kwake; akawaponya kwa kuwabandikia mikono kila mmoja.

⁴¹Hata pepo wakatoka wengi wakipiga kelele na kusema: Wewe ndiwe Mwana wa Mungu. Lakini akawakaripia, akawakataza kusema, ya kuwa walimjua kuwa yeye ni Kristo.[#Mat. 8:29; Mar. 3:11-12.]

⁴²Lakini kulipokucha, akatoka, akaenda mahali palipokuwa pasipo watu. Ndipo, makundi ya watu walipomtafuta, wakaja kwake, wakamzuia, asiondoke kwao.

⁴³Lakini akawaambia: Inanipasa kuipigia hata miji mingine mbiu njema ya ufalme wa Mungu, kwani hiyo ndiyo, niliyotumiwa.[#Luk. 8:1.]

⁴⁴Kisha akawa akiipiga hiyo mbiu katika nyumba za kuombea zilizoko Galilea.[#Mat. 4:23.]