Malaki 3

Mtangulizi wa Masiya na kuja kwake Bwana.

¹Mtaniona, nikimtuma mjumbe wangu, atengeneze njia mbele yangu. Yule Bwana, mnayemtafuta, atakuja kutokea Jumbani mwake, msipomwazia. Naye mjumbe wa agano anayewapendeza mtamwona, anavyokuja; ndivyo, Bwana Mwenye vikosi anavyosema.[#Mat. 11:10; Mar. 1:2; Luk. 1:17.]

²Lakini yuko nani atakayeivumilia siku ya kuja kwake? Tena yuko nani atakayesimama, atakapoonekana? Kwani yeye ni kama moto wa mwenye kuyeyusha fedha au kama sabuni ya wafua nguo.[#Yes. 1:25.]

³Naye atakaa akiyeyusha fedha, aitakase; ndivyo, atakavyowatakasa wana wa Lawi, awang'aze, wawe kama dhahabu au fedha, wapate kumpelekea Bwana vipaji vya tambiko kwa wongofu.[#Zak. 13:9.]

⁴Ndipo, vipaji vya tambiko vya Yuda na vya Yerusalemu vitakapompendeza Bwana kama katika siku za kale na kama katika miaka iliyopita zamani.

⁵Hapo ndipo, nitakapowatokea kukata mashauri, nami nitakuwa shahidi wa kuwasuta wachawi na wavunja unyumba, nao waapao viapo vya uwongo, nao wawanyimao wakibarua mshahara, nao wakorofishao wajane hata waliofiwa na wazazi, nao wapotoao wageni pasipo kuniogopa mimi; ndivyo, Bwana Mwenye vikosi anavyosema.*

⁶Kwani mimi Bwana sikugeuka, nanyi hamkukoma kuwa wana wa Yakobo.

⁷Tangu siku za baba zenu mmeyaacha maongozi yangu, hamkuyashika, myaangalie. Rudini kwangu! Ndipo, nami nitakaporudi kwenu; ndivyo, Bwana Mwenye vikosi anavyosema. Nanyi mnauliza: Turudi kwa njia gani?[#Zak. 1:3.]

⁸Je? Mtu anaweza kumnyima Mungu yaliyo yake? Kwani ninyi mnaninyima yaliyo yangu, mkisema: Tumekunyima namna gani yaliyo yako? Ni mafungu ya kumi na vipaji vya kupatolea Patakatifu.

⁹Ninyi mmekwisha kuapizwa kwa kiapizo, tena ninyi mmeninyima yaliyo yangu, taifa hili lote.[#Hag. 1:6.]

¹⁰Yapelekeni mafungu yote ya kumi mle nyumbani, kilimbiko kilimo, yawe vilaji vya Nyumbani mwangu! Kanijaribuni hivyo, kama sitawafunulia madirisha ya mbinguni, nikiwamwagia mbaraka isiyopimika kwa kufurika; ndivyo, Bwana Mwenye vikosi anavyosema.

¹¹Ndipo, nitakapowakemea walafi kwa ajili yenu, wasiwaangamizie mazao ya nchi, wala mizabibu yenu iliyoko mashambani isikose matunda; ndivyo, Bwana Mwenye vikosi anavyosema.

¹²Ndipo, wamizimu wote watakapowatukuza kuwa wenye shangwe, kwani mtakuwa nchi ipendezayo; ndivyo, Bwana Mwenye vikosi anavyosema.

¹³Maneno yenu, mliyoyasema kwa ajili yangu, yamekuwa magumu; ndivyo, Bwana anavyosema, nanyi mkauliza: Tumesema nini kwa ajili yako wewe?

¹⁴Mmesema: Ni bure kumtumikia Mungu, tumejipatia nini kwa kuyaangalia maagizo yake yaliyotupasa kuyaangalia na kwa kumwendea Bwana Mwenye vikosi na kuvaa nguo za matanga?[#Sh. 73:13-14.]

¹⁵Kwa hiyo sasa tunawawazia wao wasiomkumbuka Mungu kuwa wenye shangwe, hata wao wasiomcha Mungu wamejengwa, napo hapo, walipomjaribu Mungu, wamepona.

¹⁶Hapo, wamchao Bwana walipoongeana kila mtu na mwenziwe, Bwana alitega sikio, akasikiliza; mbele yake kikaandikwa kitabu cha ukumbusho wao waliomcha Bwana na kulikumbuka Jina lake.

¹⁷Ndivyo, Bwana Mwenye vikosi asemavyo: Hao watakuwa wangu mimi mwenyewe siku hiyo nitakayoifanya mimi, nami nitawahurumia, kama mtu anavyomhurumia mwanawe aliyemtumikia.[#2 Mose 19:5.]

¹⁸Hapo ndipo, mtakapoona tena, ya kuwa wanapambanuka amchaye Bwana naye asiyemcha, tena amtumikiaye Mungu naye asiyemtumikia.