Marko 11

Kuingia Yerusalemu.

¹Hapo, walipoukaribia Yerusalemu na kufika Beti-Fage na Betania penye mlima wa michekele, akatuma wanafunzi wake wawili,

²akawaambia: Nendeni katika kijiji kinachowaelekea! Mtakapoingia mle mara mtaona, pamefungwa mwana punda, ambaye mtu hajampanda bado; mfungueni, mmlete!

³Kama mtu atawauliza: Mbona mnafanya hivi? semeni: Bwana wetu anamtakia kazi! Mara atawapani, mmlete hapa.[#Mar. 14:14.]

⁴Walipoondoka kwenda, wakamwona mwana punda aliyefungwa mlangoni nje njiani, wakamfungua.

⁵Wengine waliosimama huko wakawauliza: Mnafanya nini mkimfungua mwana punda?

⁶Nao wakajibu, kama Yesu alivyowaambia; ndipo, walipowaacha.

⁷Wakampeleka mwana punda kwa Yesu, wakatandika nguo zao upesiupesi juu yake, kisha akampanda.

⁸Watu wengi wakatandika nguo zao njiani, wengine wakatandika matawi ya miti, waliyoyakata mashambani.

⁹Nao waliotangulia nao waliofuata wakapaza sauti:

Hosiana!

¹⁰Na atukuzwe ajaye kwa jina la Bwana!

Utukuzwe ufalme wa baba yetu Dawidi utujiao!

Hosiana juu mbinguni!

¹¹Alipoingia Yerusalemu, akaenda Patakatifu. Alipokwisha kuvitazama vyote vilivyomo, mchana ukawa umekuchwa; kwa hiyo akatoka kwenda Betania pamoja na wale kumi na wawili.

Mkuyu unaapizwa.

¹²Kesho yake walipotoka Betania akaona njaa.[#Luk. 13:6-9.]

¹³Huko mbali akaona mkuyu wenye majani, akaenda, aone, kama liko tunda juu yake. Akaufikia, asione kitu, ila majani tu, kwani siku za kuyu hazijawa.

¹⁴Ndipo, alipotoa neno la kwamba: Kale na kale mtu asile tena kwako tunda! Wanafunzi wake wakayasikia.[#Mar. 11:20.]

Kuwafukuza wachuuzi Patakatifu.

¹⁵Walipofika Yerusalemu, akapaingia Patakatifu, akaanza kuwafukuza wenye kuuzia na kununulia hapo Patakatifu, akaziangusha meza za wavunja fedha na viti vya wachuuzi wa njiwa.

¹⁶Tena hakuacha, mwenye kuchukua chombo apapitie hapo Patakatifu.

¹⁷Akawafundisha akiwaambia: Haikuandikwa ya kuwa: Nyumba yangu itaitwa nyumba ya kuombea kwao makabila yote ya watu? Lakini ninyi mmeigeuza kuwa pango la wanyang'anyi.[#Yes. 56:7; Yer. 7:11.]

¹⁸Watambikaji wakuu na waandishi walipoyasikia, wakatafuta, watakavyomwangamiza, kwani walimwogopa, kwa sababu watu wote pia walishangazwa na mafundisho yake.

¹⁹Lakini kila siku ilipokuwa jioni, wakatoka mjini.

Mkuyu ulipoapizwa.

²⁰Asubuhi walipopita wakauona mkuyu, umekuwa umekauka toka mizizini.[#Mar. 11:14.]

²¹Petero akalikumbuka neno lile, akamwambia: Bwana, tazama, mkuyu, uliouapiza, umenyauka.

²²Yesu akawajibu akisema: Mwe wenye kumtegemea Mungu![#Yoh. 14:1.]

²³Kweli nawaambiani: Kila atakayeuambia mlima huu: Ondoka hapa, ulipo, ujitupe baharini! basi, litatimia vivyo hivyo, asipokuwa na mashaka moyoni mwake, ila akiwa anayategemea tu ya kuwa: Analolisema, litatendeka.[#Mat. 17:20; Luk. 17:6.]

²⁴Kwa hiyo nawaambiani: Yo yote mnayoyaomba kwa kuyataka, yategemeeni tu, ya kuwa mtayapata! ndipo, mtakapoyapata kweli.[#Mat. 7:7; Yoh. 14:13; 16:23.]

²⁵Nanyi mtakaposimama na kuomba mwondoleane, mkiwa mnamwekea mtu mfundo, Baba yenu alioko mbinguni naye awaondolee ninyi makosa yenu![#Mat. 5:23.]

²⁶Lakini ninyi msipoondoleana, naye Baba alioko mbinguni hatawaondolea makosa yenu.[#Mat. 6:14-15.]

Ubatizo wa Yohana.

²⁷Walipoingia tena Yerusalemu, naye alipotembea Patakatifu, wakamjia watambikaji wakuu na waandishi na wazee,

²⁸wakamwuliza: Hayo unayafanya kwa nguvu gani? au ni nani aliyekupa nguvu hii, uyafanye hayo?

²⁹Yesu akawaambia: Nanyi nitawauliza neno moja; mtakaponijibu, nitawaelezea nguvu yangu ya kuyafanya hayo.

³⁰Ubatizo wake Yohana ulitoka mbinguni au kwa watu? Nijibuni!

³¹Wakafikiri mioyoni mwao kwamba: Tukisema: Ulitoka mbinguni, atatuuliza: Mbona hamkumtegemea?

³²Lakini tukisema: Ulitoka kwa watu, basi, waliwaogopa watu; kwani watu wote walimshika Yohana kuwa mfumbuaji wa kweli.

³³Kwa hiyo wakamjibu Yesu wakisema: hatujui. Ndipo, Yesu alipowaambia: Basi, hata mimi siwaambii nguvu inayonifanyisha hayo.