Mifano 14

Werevu wa kweli unatukuzwa.

¹Werevu wa kweli wa wanawake huzijenga nyumba zao,

lakini ujinga wao huzibomoa kwa mikono yao wenyewe.

²Ashikaye njia inyokayo humcha Bwana,

lakini azipotoaye njia zake humbeza.

³Kinywani mwa mjinga imo fimbo ya majivuno,

lakini midomo ya werevu wa kweli huwalinda.

⁴Pasipo ng'ombe zizi hukaa likiwa safi,

lakini mapato huwa mengi, nguvu za ng'ombe zinapotumiwa.

⁵Shahidi mwenye kweli haongopi,

asemaye maneno ya uwongo ni shahidi mwenye uwongo.

⁶Mfyozaji akitafuta werevu wa kweli haupati,

lakini mtambuzi hupata upesi kujua maana.

⁷Toka kwa mtu aliye mjinga!

Kwani kwake huoni midomo ijuayo maana.

⁸Werevu wa kweli wa mtu aerevukaye humtambulisha njia yake,

lakini ujinga wa wapumbavu huwadanganya.

⁹Wajinga hufyoza wakikora manza,

lakini wanyokao hupendezana.

¹⁰Moyo wenyewe hujua uchungu wa roho yake,

hata katika furaha yake mwingine hajitii humo.

¹¹Nyumba zao wasiomcha Mungu hubomolewa,

lakini mahema yao wanyokao yatachanua.

¹²Ziko njia zinyokazo machoni pa watu,

lakini mwisho wao huenda kufani.

¹³Hata ukicheka, moyo unaweza kuumia,

mara nyingi mwisho wa furaha ni majonzi.

¹⁴Moyo ukirudi nyuma, mtu hushibishwa mapato ya njia zake,

naye mtu mwema huyapata, aliyoyasumbukia.

¹⁵Mjinga huitikia maneno yote,

lakini aerevukaye hupatambua, anapokwenda.

¹⁶Mwerevu wa kweli huogopa, huepuka penye mabaya,

lakini mjinga huchafuka, kisha huwaza, ya kuwa mambo yametulia.

¹⁷Mwenye moyo mdogo hufanya yenye ujinga,

naye mwenye mawazo mabaya huchukiwa.

¹⁸Wasiojua kitu hujipatia ujinga, uwe fungu lao,

lakini waerevukao huvikwa vilemba vya ujuzi.

¹⁹Wabaya sharti wawainamie wema,

nao wasiomcha Mungu sharti wasimame milangoni pao waongofu.

²⁰Hata rafiki yake humchukia maskini,

lakini wampendao mwenye mali ni wengi.

²¹Amwendeaye mwenziwe na kumbeza hukosa,

lakini awahurumiaye wanyonge ni mwenye shangwe.

²²Je? Wawazao mabaya hawapotei?

Lakini wawazao mema hujipatia upendeleo wa kweli.

²³Masumbuko yote yako na mapato,

lakini yaliyo maneno matupu ya midomo huleta ukosefu tu.

²⁴Kwao werevu wa kweli mali zao ni kama kilemba,

lakini ujinga wa wapumbavu huwa ujinga.

²⁵Shahidi mwenye kweli huponya roho za watu,

lakini asemaye uwongo huziponza.

²⁶Mtu akimcha Bwana analo egemeo lenye nguvu,

nao wanawe wanapo pao pa kukimbilia.

²⁷Kumcha Bwana ni kisima cha uzima,

tena ni kuondoka penye matanzi ya kifo.

²⁸Utukufu wa mfalme umo katika wingi wa watu,

lakini watu wanapokwisha, mkuu wao huangamia.

²⁹Mvumilivu anao utambuzi mwingi,

lakini mwenye moyo mdogo hukuza ujinga.

³⁰Moyo mpole ni uzima wa mwili,

lakini wivu ni kama ugonjwa wa ubovu mifupani.

³¹Akorofishaye mnyonge humsimanga aliyemwumba,

lakini amheshimuye humhurumia mkiwa.

³²Kwa ubaya wake asiyemcha Mungu hukumbwa, aanguke,

lakini mwongofu hata kufani yuko na kimbilio lake.

³³Moyoni mwa mtambuzi ndimo, werevu wa kweli unamotua,

lakini yaliyomo mioyoni mwa wapumbavu hujulikana.

³⁴Wongofu hukuza taifa,

lakini ukosaji hutweza makabila mazima.

³⁵Mfalme hupendezwa na mtumishi mwenye akili,

lakini humkasirikia sana anayemtweza.