Mifano 28

Mbaraka yao wamchao Mungu nayo mapatilizo yao wasiomcha.

¹Wasiomcha Mungu hukimbia pasipo kufukuzwa,

lakini waongofu hutulia pasipo kustushwa kama mwana wa simba.

²Kwa ajili ya mapotovu ya nchi wakuu wake huwa wengi,

lakini mtambuzi mwenye akili huitengemanisha siku nyingi.

³Mtu akosaye mali akikorofisha wanyonge,

ni mvua ifurikayo pasipo kuleta chakula.

⁴Wayaachao Maonyo huwasifu wasiomcha Mungu,

lakini wayaangaliao Maonyo huwakasirisha sana.

⁵Watu wabaya hawatambui mashauri yaliyo sawa,

lakini wamtafutao Bwana huyatambua yote.

⁶Maskini ashikaye njia yake pasipo kukosa ni mwema

kuliko apotoaye njia zake akipata mali nyingi.

⁷Ayashikaye Maonyo ni mwana wa mtambuzi,

lakini aliye mwenzao walafi humtia baba yake soni.

⁸Ajipatiaye mali kwa kukopesha na kutaka faida nyingi

huzikusanyia mwingine atakayezigawia wanyonge.

⁹Ayageuzaye masikio, yasisikie Maonyo,

akimwomba Mungu hutapisha.

¹⁰Apotezaye waongofu, washike njia mbaya,

hutumbukia mwenyewe katika shimo lake,

lakini wasiokosa watapata mema, yawe mafungu yao.

¹¹Mtu mkwasi ni mwerevu wa kweli machoni pake yeye,

lakini mnyonge mwenye utambuzi humchunguza.

¹²Waongofu wakishangilia, uko utukufu mwingi,

lakini wasiomcha Mungu wakipata ukuu, watu hujificha.

¹³Ayafichaye mpotovu yake hatafanikiwa,

ayaungamaye na kuyaacha atahurumiwa.

¹⁴Mwenye shangwe ni mtu ajiangaliaye pasipo kukoma,

lakini aushupazaye moyo wake huangushwa na mabaya.

¹⁵Simba angurumaye na chui atamaniye kula

ni mtu asiyemcha Mungu akitawala watu wanyonge.

¹⁶Mkuu akosaye utambuzi huwakorofisha watu sana,

lakini achukiaye mapato ya upotovu hukaa siku nyingi.

¹⁷Mtu alemewaye moyoni na damu ya mtu, aliyemwua,

hutangatanga hata kuingia shimoni, asione wamshikizao.

¹⁸Aendeleaye pasipo kukosa huokoka,

lakini ajipotoaye kwa kushika njia mbili, mara huanguka katika moja.

¹⁹Alilimiaye shamba lake hushiba chakula,

lakini akimbiliaye mambo ya bure hushiba ukosefu.

²⁰Mtu mwenye kweli hupata mbaraka nyingi,

lakini ajihimizaye kupata upesi mali nyingi hakosi kukora manza.

²¹Kuzitazama nyuso za watu hakufai,

lakini wako wajikoseshao kwa ajili ya kitonge cha wali.

²²Ajikazaye sana kupata mali nyingi huwa mwenye jicho baya,

hajui, ya kuwa ukosefu utamjia.

²³Amwonyaye mtu mwisho atashukuriwa

kuliko asemaye mororo kwa ulimi wake.

²⁴Apokonyaye mali za baba na za mama na kusema: Huku siko kukosa,

yeye ni sawa na mtu aangamizaye vibaya.

²⁵Aliye na roho yenye tamaa nyingi huzusha magomvi,

lakini amwegemeaye Bwana hushibishwa sana.

²⁶Auegemeaye moyo wake yeye ni mpumbavu,

lakini aendeleaye kwa werevu wa kweli yeye hupona.

²⁷Amgawiaye mkosefu hataona ukosefu,

lakini ayafumbaye macho yake huapizwa kabisa.

²⁸Wasiomcha Mungu wakipata ukuu, watu hujificha,

lakini wakiangamia, waongofu huongezeka.