Ufunuo 13

Nyama mwenye pembe kumi na vichwa saba.

¹Nikaona nyama mkali, akitoka baharini mwenye pembe kumi na vichwa saba; juu hizo pembe zake zilikuwa na vilemba kumi vya kifalme, napo vichwani pake palikuwa na majina ya kumtukana Mungu.[#Ufu. 11:7; 17:3,9,12; Dan. 7:3,7.]

²Huyu nyama, niliyemwona, alifanana na chui, lakini miguu yake ilikuwa kama ya nyegere; nacho kinywa chake kilikuwa kama kinywa cha simba. Yule joka akampa uwezo wake na kiti chake cha kifalme na nguvu nyingi.[#Ufu. 12:3.]

³Miongoni mwa vichwa vyake nikaona kimoja kilichokuwa, kama kimepasuliwa kwa kuuawa, lakini donda lake la kuuawa lilikuwa limepona. Ulimwengu wote ukamtazama yule nyama na kumstuka,[#Ufu. 17:8.]

⁴kisha wakamwangukia yule joka, kwa sababu alimpa yule nyama nguvu zake, wakamwangukia naye yule nyama wakisema: Yuko nani anayefanana na nyama huyu? Tena yuko nani anayeweza kupiga vita naye?

⁵Kisha akapewa domo la kusema makuu ya kumtukana Mungu, akapewa nguvu ya kuyafanya hayo mambo yake miezi 42.[#Ufu. 11:2; 12:6,14; Dan. 7:8.]

⁶Ndipo, alipolifunua domo lake, amtukane Mungu, alitukane nalo Jina lake na tuo lake nao wakaao mbinguni.

⁷Tena akapewa kufanya vita nao watakatifu na kuwashinda, akapewa nguvu ya kushinda hata mashina na makabila na misemo na wamizimu wote.[#Ufu. 11:7; Dan. 7:21.]

⁸Kwa hiyo watamwangukia yeye wote wakaao nchini, ambao tangu hapo, ulimwengu ulipoumbwa, hawakuandikwa majina yao katika kitabu cha uzima cha Mwana kondoo aliyechinjwa.[#Ufu. 3:5; 12:12; 17:8.]

⁹Mtu akiwa na masikio na asikie![#Ufu. 14:12; Mat. 26:52.]

¹⁰Kama yuko mwenye kuteka, naye atatekwa; kama yuko mwenye kuua kwa upanga, naye sharti auawe kwa upanga. Hapo ndipo, watakatifu watakapovumilia kwa kumtegemea Mungu.

Nyama mwenye pembe mbili na kiwango chake: 666.

¹¹Nikaona nyama mwingine, akitoka katika nchi; huyu alikuwa na pembe mbili kama mwana kondoo, akasema kama joka.[#Ufu. 16:13; Mat. 7:15.]

¹²Hata nguvu zote za yule nyama wa kwanza aliyemtangulia huzitumia, aishurutishe nchi nao wakaao nchini, wamwangukie yule nyama wa kwanza aliyepona donda lake la kuuawa.[#Ufu. 13:2,4,5,7.]

¹³Hufanya vielekezo vikubwa, hata kushusha moto toka mbinguni, uanguke nchini machoni pa watu.[#1 Fal. 18:24-39; Mat. 24:24; 2 Tes. 2:9-10.]

¹⁴Kwa hivyo vielekezo, alivyopewa kuvifanya mbele ya yule nyama, huwadanganya wakaao nchini akiwaambia wale wakaao nchini, wafanye kinyago cha mfano wa yule nyama aliyekuwa na kidonda cha upanga, akapata kupona.[#5 Mose 13:1-3.]

¹⁵Kisha akapewa kukitia pumzi kinyago cha yule nyama, hicho kinyago cha yule nyama kiseme; kwa hiyo nguvu yake wakauawa wote wasiokiangukia kinyago hicho cha yule nyama.

¹⁶Kwani anawashurutisha wote, wadogo na wakubwa, wenye mali na wakosao mali, waungwana na watumwa, wajitie chapa mikononi mwao mwa kuume au mapajini pao,[#Ufu. 19:20.]

¹⁷maana mtu asiweze kununua au kuuza kitu, asipokuwa na chapa cha jina la yule nyama au kiwango cha jina lake.

¹⁸Hapa ndipo panapotakwa werevu wa kweli; aliye mwenye akili na akifumbue kiwango cha yule nyama! Nacho kiwango chake ndicho mia sita na sitini na sita (666).[#Ufu. 15:2; 17:9.]