Ufunuo 6

Maana ya muhuri saba: 1. Mpanda farasi mweupe.

¹Kisha nikamwona Mwana kondoo, akifungua moja ya zile muhuri saba. Nikasikia, mmoja wa wale nyama wanne akisema kama kwa sauti ya ngurumo: Njoo![#Ufu. 4:6-8; 5:1-2,6,8.]

²Nikatazama, nikaona farasi mweupe, naye aliyempanda alikuwa na uta, akapewa kilemba; kisha yeye aliyekuwa mshindaji akatoka, ashinde tena.[#Zak. 1:8; 6:1-5.]

2. Mpanda farasi mwekundu.

³Alipoifungua muhuri ya pili, nikasikia, nyama wa pili akisema: Njoo![#Ufu. 4:7.]

⁴Pakatokea farasi mwingine, ni mwekundu sana; aliyempanda akapewa kuuondoa utengemano katika nchi, wapate kuuana wao kwa wao. Naye akapewa upanga mkubwa.

3. Mpanda farasi mweusi.

⁵Alipoifungua muhuri ya tatu, nikasikia, nyama wa tatu akisema: Njoo! Nikatazama, nikaona farasi mweusi, naye aliyempanda alikuwa na kipimo mkononi mwake.[#Ufu. 4:7.]

⁶Nikasikia iliyokuwa kama sauti iliyokuwa katikati ya wale nyama wanne, ikisema: Kibaba cha mchele ni shilingi, vibaba vitatu vya mtama ni shilingi. Lakini mafuta usiyapotoe, wala mvinyo!

4. Mpanda farasi mwenye rangi ya kijivujivu.

⁷Alipoifungua muhuri ya nne, nikasikia, nyama wa nne akisema: Njoo![#Ufu. 4:7.]

⁸Nikatazama, nikaona farasi wa kijivujivu, naye aliyempanda jina lake Kifo, nao wazimu wakafuatana naye. Wakapewa nguvu ya fungu la nne la nchi, wawaue kwa panga na kwa njaa na kwa magonjwa yauayo na kwa nyama wakali waliopo nchini.[#Yer. 15:3; Ez. 14:21.]

5. Roho zao waliouawa kwa ajili ya Neno la Mungu.

⁹Alipoifungua muhuri ya tano, nikaona, mvunguni mwa meza ya Bwana zimo roho zao waliouawa kwa ajili ya Neno la Mungu na kwa ajili ya ushuhuda, walioushuhudia.[#Ufu. 8:5; 14:18; 16:7.]

¹⁰Nao wakalia kwa sauti kuu wakisema: Mpaka lini, wewe Bwana uliye mtakatifu na mkweli? Mbona huwahukumu wanaokaa nchini, uzilipize damu zetu?[#Ufu. 18:10; 1 Mose 4:10.]

¹¹Ndipo, walipopewa kila mmoja kanzu nyeupe, wakaambiwa, wanyamaze siku chache tena, mpaka yatimilike mambo ya watumwa wenzao nayo ya ndugu zao watakaouawa vivyo hivyo kama wao wenyewe.[#Ufu. 3:4-5; 7:9,13-14.]

6. Siku kubwa ya makali.

¹²Nikamwona, alipoifungua muhuri ya sita. Pakawa tetemeko kubwa la nchi, hata jua likawa jeusi kama gunia la makonge, mwezi wote ukawa kama damu,[#Yes. 13:10; Yoe. 2:30-31; Mat. 24:29; Luk. 21:25.]

¹³nyota za mbinguni zikaanguka nchini, kama mkuyu unavyoyabwaga mapooza yake ukitikiswa na upepo mwingi.[#Yes. 34:4.]

¹⁴Kisha mbingu zikatengeka kama karatasi linalojizinga upesi, hata milima yote na visiwa vyote vikaondolewa mahali pao.

¹⁵Ndipo, wafalme wa nchini, nao walio wakubwa, nao wakuu wa vikosi, nao wenye mali, nao wenye nguvu, nao watumwa wote, nao waungwana wote walipojificha mapangoni na miambani penye milima[#Yes. 2:10,19.]

¹⁶wakiiambia milima na miamba: Tuangukieni, mtufiche machoni pake yeye anayekaa kitini mwa kifalme napo penye makali ya Mwana kondoo![#Luk. 23:30.]

¹⁷Kwani imekuja siku kubwa ya makali yao, yuko nani awezaye kusimama?[#Rom. 2:5.]