Ayu 12

Ayubu Ajibu: Mimi Nachekwa Sana

¹Ndipo Ayubu akajibu, na kusema,

²Hapana shaka ninyi ndinyi watu halisi,

Nanyi mtakapokufa, ndipo na hekima itakoma.

³Lakini mimi pia, nina fahamu kama ninyi;

Mimi si duni yenu ninyi;

Naam, ni nani asiyejua mambo kama hayo?

⁴Mimi ni mtu wa kuchekwa na jirani yake,[#Ayu 16:20; Zab 91:15; Yer 33:3; Mik 7:7]

Ni mtu niliyemwita Mungu, naye akanijibu;

Huyo mwenye haki, aliye mtimilifu, amekuwa ni kicheko.

⁵Katika mawazo yake huyo aliye na raha mna kudharau mashaka;[#Mit 14:2]

Tayari kwa ajili ya wenye kuteleza miguu.

⁶Hema za wapokonyi hufanikiwa,

Na hao wamkasirishao Mungu hukaa salama;

Mikononi mwao Mungu huleta vitu vingi.

⁷Lakini sasa waulize hao wanyama, nao watakufundisha;

Na nyuni wa angani, nao watakuambia;

⁸Au nena na nchi, nayo itakufundisha;

Nao samaki wa baharini watakutangazia.

⁹Katika hawa wote ni yupi asiyejua,

Kwamba ni mkono wa BWANA uliofanya haya?

¹⁰Ambaye nafsi ya kila kilicho hai i mkononi mwake,[#Hes 16:22; Dan 5:23; Mdo 17:28]

Na pumzi zao wanadamu wote.

¹¹Je! Sikio silo lijaribulo maneno,

Kama vile kaakaa lionjavyo chakula?

¹²Wazee ndio walio na hekima,

Na katika kuishi siku nyingi iko fahamu.

¹³Hekima na amri zina yeye [Mungu];

Yeye anayo mashauri na fahamu.

¹⁴Tazama, yuavunja, wala haiwezekani kujenga tena;[#Ufu 3:7]

Humfunga mtu, wala haiwezekani kumfungua.

¹⁵Tazama, yuayazuia maji, nayo yakatika;[#1 Fal 17:1; Mwa 7:11]

Tena, huyapeleka, nayo yaipindua dunia.

¹⁶Kwake yeye ziko nguvu, na makusudi kufanikiwa;

Huyo adanganywaye, na mdanganyi pia ni wake.

¹⁷Yeye huwaondoa washauri hali wametekwa nyara,

Naye huwafanya waamuzi kuwa ni wapumbavu.

¹⁸Yeye hulegeza kifungo cha wafalme,

Na kuwafunga viuno vyao kwa mshipi.

¹⁹Yeye huwaondoa makuhani hali wametekwa nyara.

Na kuwapindua mashujaa.

²⁰Huondoa matamko ya hao walioaminiwa,

Na kuondoa fahamu za wazee.

²¹Humwaga aibu juu ya hao wakuu,

Na kulegeza mshipi wa wenye nguvu.

²²Huvumbua mambo ya siri tokea gizani,[#Mt 10:26; 1 Kor 4:5]

Na hicho kilicho giza tupu huleta mwangani.

²³Huyaongeza mataifa, na kuyaangamiza;

Huyaeneza mataifa mbali, na kuyaacha.

²⁴Huwaondolea moyo wakuu wa watu wa nchi,

Na kuwapoteza nyikani pasipokuwa na njia.

²⁵Wao hupapasa gizani pasipokuwa na mwanga,

Naye huwafanya kupepesuka kama vile mlevi.