HEBREO 3

Higit na Dakila kay Moises

¹Kaya, mga banal na kapatid, mga kabahagi sa makalangit na pagkatawag, isaalang-alang ninyo na si Jesus, ang Apostol at Pinakapunong Pari ng ating pagpapahayag,

²ay tapat sa nagtalaga sa kanya, gaya ni Moises na tapat sa buong sambahayan ng Diyos.[#Bil. 12:7; #3:2 Sa Griyego ay .]

³Sapagkat siya ay itinuring na karapat-dapat sa higit na kaluwalhatian kaysa kay Moises, yamang ang nagtayo ng bahay ay may higit na karangalan kaysa bahay.

⁴Sapagkat ang bawat bahay ay may nagtayo, subalit ang nagtayo ng lahat ng mga bagay ay ang Diyos.

⁵At si Moises ay naging tapat sa buong sambahayan ng Diyos gaya ng isang lingkod, bilang patotoo sa mga bagay na sasabihin.[#3:5 Sa Griyego ay .]

⁶Subalit si Cristo ay tapat sa bahay ng Diyos, bilang isang anak, at tayo ang bahay na iyon kung ating iingatang matibay hanggang sa katapusan ang ating pagtitiwala at pagmamalaki sa ating pag-asa.[#3:6 Sa Griyego ay .]

Kapahingahan para sa Bayan ng Diyos

⁷Kaya't gaya ng sinasabi ng Espiritu Santo,[#Awit 95:7-11 (LXX)]

“Ngayon, kung marinig ninyo ang kanyang tinig,

⁸huwag ninyong papagmatigasin ang inyong mga puso gaya ng sa paghihimagsik,

gaya ng sa araw ng pagsubok sa ilang,

⁹na doon ay sinubok ako ng inyong mga ninuno,

bagaman nakita nila ang aking mga gawa sa loob ng

¹⁰apatnapung taon.

Kaya't nagalit ako sa lahing ito,

at aking sinabi, ‘Sila'y laging naliligaw sa kanilang puso,

at hindi nila nalaman ang aking mga daan.’

¹¹Gaya ng sa aking galit ay aking isinumpa,

‘Hindi sila papasok sa aking kapahingahan.’”

¹²Mga kapatid, mag-ingat kayo, na walang sinuman sa inyo ang may pusong masama at walang pananampalataya na naglalayo sa buháy na Diyos.

¹³Ngunit magpayuhan kayo sa isa't isa araw-araw, habang ito ay tinatawag na “ngayon,” upang walang sinuman sa inyo ang papagmatigasin ng pagiging madaya ng kasalanan.

¹⁴Sapagkat tayo'y nagiging kabahagi ni Cristo kung ating hinahawakang matatag ang pasimula ng ating pagtitiwala hanggang sa katapusan.

¹⁵Gaya ng sinasabi,[#Awit 95:7, 8 (LXX)]

“Ngayon, kung marinig ninyo ang kanyang tinig,

huwag ninyong papagmatigasin ang inyong mga puso, na gaya ng sa paghihimagsik.”

¹⁶Sinu-sino ba sila na matapos makarinig ay naghimagsik? Hindi ba ang lahat ng umalis sa Ehipto sa pamamagitan ni Moises?[#Bil. 14:1-35]

¹⁷Ngunit kanino siya galit nang apatnapung taon? Hindi ba sa mga nagkasala, na ang mga katawan ay nabuwal sa ilang?

¹⁸At kanino siya sumumpa na hindi sila makakapasok sa kanyang kapahingahan, kung hindi sa mga sumuway?

¹⁹Kaya't nakikita natin na sila'y hindi nakapasok dahil sa kawalan ng pananampalataya.