HOSEAS 12

¹Ang Efraim ay nanginginain sa hangin,

at humahabol sa hanging silangan sa buong araw;

sila'y nagpaparami ng mga kabulaanan at karahasan;

sila'y nakikipagkasundo sa Asiria,

at nagdadala ng langis sa Ehipto.

²Ang Panginoon ay may paratang laban sa Juda,

at parurusahan ang Jacob ayon sa kanyang mga lakad;

at pagbabayarin siya ayon sa kanyang mga gawa.

³Sa sinapupunan ay kanyang hinawakan sa sakong ang kanyang kapatid;[#Gen. 25:26; #Gen. 32:24-26]

at sa kanyang pagkabinata ay nakipagbuno siya sa Diyos.

⁴Siya'y nakipagbuno sa anghel, at nanaig;[#Gen. 28:10-22]

siya'y tumangis, at humiling ng pagpapala niya.

Nakatagpo niya siya sa Bethel,

at doo'y nakipag-usap siya sa kanya.

⁵Ang Panginoon , ang Diyos ng mga hukbo;

Panginoon ang kanyang pangalan!

⁶Kaya't magbalik-loob ka sa iyong Diyos,

mag-ingat ng kabutihang-loob at katarungan,

at hintayin mong lagi ang iyong Diyos.

⁷Isang mangangalakal na may timbangang madaya sa kanyang mga kamay,

maibigin siya sa pang-aapi.

⁸At sinabi ng Efraim, “Tunay na ako'y mayaman,

ako'y nagkamal ng kayamanan para sa aking sarili;

sa lahat ng aking pakinabang

walang natagpuang paglabag sa akin

na masasabing kasalanan.”

⁹Ngunit ako ang Panginoon mong Diyos[#Lev. 23:42, 43]

mula sa lupain ng Ehipto;

muli kitang patitirahin sa mga tolda,

gaya sa mga araw ng takdang kapistahan.

¹⁰Ako ay nagsalita sa mga propeta,

at ako ang nagparami ng mga pangitain;

at sa pamamagitan ng mga propeta ay nagbigay ako ng mga talinghaga.

¹¹Sa Gilead ba'y may kasamaan?

Sila'y pawang walang kabuluhan.

Sa Gilgal ay naghahandog sila ng mga toro;

ang kanilang mga dambana ay parang mga bunton

sa mga lupang binungkal sa bukid.

¹²Si Jacob ay tumakas patungo sa lupain ng Aram,[#Gen. 29:1-20]

at doon ay naglingkod si Israel dahil sa isang asawa,

at dahil sa isang asawa ay nag-alaga siya ng mga tupa.

¹³Sa pamamagitan ng isang propeta ay iniahon ng Panginoon ang Israel mula sa Ehipto,[#Exo. 12:50, 51]

at sa pamamagitan ng isang propeta, siya'y napangalagaan.

¹⁴Ang Efraim ay nagbigay ng mapait na galit,

kaya't ibababa ng kanyang Panginoon ang mga kasamaan niya sa kanya

at pagbabayarin siya sa kanyang mga panlalait.