MGA AWIT 105

Ang Diyos at ang Kanyang Bayan

¹O magpasalamat kayo sa Panginoon , kayo'y magsitawag sa kanyang pangalan;

ipabatid ninyo ang kanyang mga gawa sa mga bayan!

²Umawit kayo sa kanya, umawit kayo sa kanya ng mga papuri;

sabihin ninyo ang lahat niyang kahanga-hangang mga gawa!

³Lumuwalhati kayo sa kanyang banal na pangalan;

magagalak ang puso nila na nagsisihanap sa Panginoon .

⁴Hanapin ninyo ang Panginoon at ang kanyang kalakasan;

patuloy ninyong hanapin ang kanyang mukha!

⁵Alalahanin ninyo ang mga kahanga-hangang gawa na kanyang ginawa;

ang kanyang mga kababalaghan at ang mga kahatulan ng kanyang bibig,

⁶O kayong binhi ni Abraham na lingkod niya,

mga anak ni Jacob, na mga pinili niya!

⁷Siya ang Panginoon nating Diyos;

ang kanyang mga kahatulan ay nasa buong lupa.

⁸Kanyang inaalala ang kanyang tipan magpakailanman,

ang salita na kanyang iniutos sa libong salinlahi,

⁹ang tipan na kanyang ginawa kay Abraham,[#Gen. 12:7; 17:8; Gen. 26:3]

ang kanyang sinumpaang pangako kay Isaac,

¹⁰na kanyang pinagtibay kay Jacob bilang isang tuntunin,[#Gen. 28:13]

sa Israel bilang isang walang hanggang tipan,

¹¹na sinasabi, “Sa iyo'y ibibigay ko ang lupain ng Canaan,

bilang iyong bahaging pinakamana.”

¹²Nang sila'y iilan lamang sa bilang;

at totoong kakaunti, at doon ay mga dayuhan;

¹³na gumagala mula sa isang bansa tungo sa isang bansa,

mula sa isang kaharian hanggang sa ibang bayan.

¹⁴Hindi niya pinahintulutan ang sinuman na sila ay pagmalupitan;[#Gen. 20:3-7]

sinaway niya ang mga hari alang-alang sa kanilang sarili:

¹⁵“Huwag ninyong galawin ang aking mga pinahiran;

ang aking mga propeta ay huwag ninyong sasaktan.”

¹⁶At siya'y nagdala ng taggutom sa lupain;[#Gen. 41:53-57]

binali niya ang bawat tungkod ng tinapay,

¹⁷siya'y nagsugo ng isang lalaki sa unahan nila,[#Gen. 37:28; 45:5]

si Jose na ipinagbili bilang alipin.

¹⁸Ang kanyang mga paa ay sinaktan ng mga tanikala,[#Gen. 39:20–40:23]

siya'y nilagyan ng kuwelyo na bakal;

¹⁹hanggang sa ang kanyang salita ay maganap;

siya ay sinubok ng salita ng Panginoon .

²⁰Ang hari ay nagsugo at pinakawalan siya;[#Gen. 41:14]

ang pinuno ng mga bayan, at siya'y pinalaya niya,

²¹kanyang ginawa siyang panginoon ng kanyang tahanan,[#Gen. 41:39-41]

at pinuno ng lahat niyang ari-arian,

²²upang talian ang kanyang mga pinuno ayon sa kanyang nais,

at turuan ng karunungan ang kanyang matatanda.

²³At ang Israel ay dumating sa Ehipto;[#Gen. 46:6; Gen. 47:11]

si Jacob ay nakipanirahan sa lupain ng Ham.

²⁴At ginawang napakabunga ng Panginoon ang kanyang bayan,[#Exo. 1:7-14]

at ginawa silang higit na malakas kaysa kanilang mga kaaway.

²⁵Kanyang ibinaling ang kanilang puso upang mapoot sa kanyang bayan,

upang makitungong may katusuhan sa kanyang mga lingkod.

²⁶Kanyang sinugo si Moises na kanyang lingkod,[#Exo. 3:1–4:17]

at si Aaron na kanyang pinili.

²⁷Kanilang isinagawa ang kanyang kahanga-hangang gawa sa gitna nila,

at mga kababalaghan sa lupain ng Ham.

²⁸Siya'y nagsugo ng mga kadiliman, at nagpadilim,[#Exo. 10:21-23]

sila'y hindi naghimagsik laban sa kanyang mga salita.

²⁹Kanyang ginawang dugo ang kanilang tubig,[#Exo. 7:17-21]

at pinatay ang kanilang mga isda.

³⁰Ang kanilang lupain ay napuno ng mga palaka,[#Exo. 8:1-6]

maging sa mga silid-tulugan ng kanilang mga hari.

³¹Siya'y nagsalita, at dumating ang mga pulutong na mga langaw,[#Exo. 8:20-24; Exo. 8:16, 17]

at mga niknik sa buong bayan.

³²Binigyan niya sila ng yelo bilang ulan,[#Exo. 9:22-25]

at liyab ng apoy sa kanilang lupain.

³³Pinatay niya ang kanilang mga puno ng ubas at mga puno ng igos,

at winasak ang mga punungkahoy sa kanilang lupain.

³⁴Siya'y nagsalita at ang mga balang ay nagsidating,[#Exo. 10:12-15]

ang mga batang balang na di kayang bilangin,

³⁵na kinain ang lahat ng pananim sa kanilang lupain,

at kinain ang bunga ng kanilang lupain.

³⁶Pinagpapatay din niya ang lahat ng panganay sa kanilang lupain,[#Exo. 12:29]

ang unang bunga ng lahat nilang kalakasan.

³⁷At kanyang inilabas sila na may pilak at ginto;[#Exo. 12:33-36]

at walang sinuman sa kanyang mga lipi ang natisod.

³⁸Natuwa ang Ehipto nang sila'y magsialis;

sapagkat ang pagkatakot nila ay dumating sa kanila.

³⁹Kanyang inilatag ang ulap bilang panakip,[#Exo. 13:21, 22]

at apoy upang magbigay liwanag sa gabi.

⁴⁰Sila'y humingi, at dinalhan niya ng mga pugo,[#Exo. 16:2-15]

at binigyan niya sila ng saganang tinapay mula sa langit.

⁴¹Kanyang binuksan ang bato at dumaloy ang tubig;[#Exo. 17:1-7; Bil. 20:2-13]

ito'y umagos sa ilang na gaya ng ilog.

⁴²Sapagkat naalala niya ang kanyang banal na salita,

at si Abraham na kanyang lingkod.

⁴³At kanyang inilabas na may kagalakan ang kanyang bayan,

at ang kanyang hinirang na may pag-aawitan.

⁴⁴At ibinigay niya sa kanila ang mga lupain ng mga bansa;[#Jos. 11:16-23]

at inangkin nila ang paggawa ng mga tao,

⁴⁵upang kanilang ingatan ang kanyang mga tuntunin,

at ang kanyang mga kautusan ay sundin.

Purihin ang Panginoon !