MGA AWIT 48

¹Dakila ang Panginoon , at marapat purihin,

sa lunsod ng aming Diyos, ang kanyang banal na bundok.

²Maganda sa kataasan, ang kagalakan ng buong lupa,[#Mt. 5:35]

ang Bundok ng Zion, sa malayong hilaga, ang lunsod ng dakilang Hari.

³Sa loob ng kanyang kuta ay ipinakita ng Diyos

ang sarili bilang isang tiyak na tanggulan.

⁴Sapagkat narito, ang mga hari ay nagtipon,

sila'y dumating na magkakasama.

⁵Nang kanilang nakita, sila'y nanggilalas,

sila'y natakot, sila'y nagsitakas.

⁶Sila'y nanginig,

nahapis na gaya ng isang babaing manganganak.

⁷Sa pamamagitan ng hanging silangan

ay winasak mo sa Tarsis ang kanilang mga sasakyan.

⁸Gaya ng aming narinig, ay gayon ang aming nakita

sa lunsod ng Panginoon ng mga hukbo,

sa lunsod ng aming Diyos,

na itinatag ng Diyos magpakailanman. (Selah)

⁹Aming inaalala ang iyong tapat na pag-ibig, O Diyos,

sa gitna ng iyong templo.

¹⁰Gaya ng iyong pangalan, O Diyos, gayon ang papuri sa iyo,

ay nakakarating hanggang sa mga dulo ng lupa.

Ang iyong kanang kamay ay puspos ng tagumpay.

¹¹Hayaang magalak ang Bundok ng Zion!

Hayaang magalak ang mga anak na babae ng Juda

dahil sa iyong mga paghatol!

¹²Libutin ninyo ang Zion, at inyong paligiran siya;

inyong bilangin ang mga tore niya.

¹³Isaalang-alang ninyong mabuti ang kanyang mga balwarte,

inyong pasukin ang kanyang mga muog,

upang inyong maibalita sa susunod na salinlahi

¹⁴na ito ang Diyos,

ang ating Diyos magpakailanpaman:

Siya'y magiging ating patnubay magpakailanman.