APOCALIPSIS 19

Ang Pagsasaya sa Langit

¹Pagkatapos ng mga bagay na ito ay narinig ko ang gaya ng isang malakas na tinig ng napakaraming tao sa langit, na nagsasabi,

“Aleluia!

Ang kaligtasan, at kaluwalhatian, at kapangyarihan ay nauukol sa ating Diyos.

²Sapagkat tunay at matuwid ang kanyang mga paghatol;[#Deut. 32:43; 2 Ha. 9:7]

hinatulan niya ang tanyag na mahalay na babae

na nagpasama sa daigdig sa pamamagitan ng kanyang pakikiapid,

at ipinaghiganti ng Diyos ang dugo ng kanyang mga alipin laban sa babae.”

³At sa ikalawang pagkakataon ay kanilang sinabi,[#Isa. 34:10]

“Aleluia!

At ang usok ng babae ay pumailanglang magpakailanpaman.”

⁴At nagpatirapa ang dalawampu't apat na matatanda at ang apat na nilalang na buháy, at sumamba sa Diyos na nakaupo sa trono, na nagsasabi,

“Amen. Aleluia!”

Ang Hapunan ng Kasalan ng Kordero

⁵At lumabas ang isang tinig sa trono, na nagsasabi,[#Awit 115:13]

“Purihin ninyo ang ating Diyos,

kayong lahat na mga alipin niya,

at kayong natatakot sa kanya,

mga hamak at dakila.”

⁶Narinig ko ang gaya ng isang tinig ng napakaraming tao, gaya ng lagaslas ng maraming tubig, at gaya ng dagundong ng malalakas na kulog na nagsasabi,[#Ez. 1:24; Awit 93:1; 97:1; 99:1]

“Aleluia!

Sapagkat naghahari ang Panginoon nating Diyos na Makapangyarihan sa lahat.

⁷Tayo'y magalak at tayo'y magpakasaya

at ibigay natin sa kanya ang kaluwalhatian,

sapagkat dumating na ang kasal ng Kordero,

at inihanda na ng kanyang magiging asawa ang kanyang sarili.

⁸At sa kanya'y ipinagkaloob na magsuot

ng pinong lino, makintab at malinis;”

sapagkat ang pinong lino ay ang matutuwid na gawa ng mga banal.

⁹At sinabi ng anghel sa akin, “Isulat mo: Mapapalad ang mga inanyayahan sa hapunan ng kasalan ng Kordero.” At sinabi niya sa akin, “Ito ang mga tunay na salita ng Diyos.”[#Mt. 22:2, 3; #19:9 Sa Griyego ay .]

¹⁰At ako'y nagpatirapa sa kanyang paanan upang siya'y aking sambahin, ngunit sinabi niya sa akin, “Huwag mong gawin iyan! Ako'y kapwa mo alipin na kasama mo at ng iyong mga kapatid na mayroong patotoo ni Jesus. Sa Diyos ka sumamba. Sapagkat ang patotoo ni Jesus ang espiritu ng propesiya.”

Ang Nakasakay sa Puting Kabayo

¹¹At nakita kong nabuksan ang langit at naroon ang isang kabayong puti! At ang nakasakay doon ay tinatawag na Tapat at Totoo; at sa katuwiran siya'y humahatol at nakikipagdigma.[#Ez. 1:1; Awit 96:13; Isa. 11:4]

¹²Ang kanyang mga mata ay tulad ng ningas ng apoy, at sa kanyang ulo ay maraming diadema; at siya'y may isang pangalang nakasulat, na walang nakakaalam kundi ang kanyang sarili.[#Dan. 10:6]

¹³Siya'y nakasuot ng damit na inilubog sa dugo at ang kanyang pangalan ay tinatawag na Ang Salita ng Diyos.[#19:13 Sa ibang mga kasulatan ay .]

¹⁴Ang mga hukbo ng langit ay sumusunod sa kanya na mga nakasakay sa mga kabayong puti, at sila'y may damit na pinong lino na maputi at dalisay.

¹⁵Mula sa kanyang bibig ay lumalabas ang isang tabak na matalas, upang sa pamamagitan nito'y tatagain niya ang mga bansa at sila'y kanyang paghaharian ng tungkod na bakal, at paaagusin niya mula sa pisaan ng ubas ang bagsik ng poot ng Diyos na Makapangyarihan sa lahat.[#Awit 2:9; Isa. 63:3; Joel 3:13; Apoc. 14:20]

¹⁶At siya'y mayroong isang pangalang nakasulat sa kanyang damit at sa kanyang hita, “Hari ng mga hari at Panginoon ng mga panginoon.”

¹⁷At nakita kong nakatayo sa araw ang isang anghel, at siya'y sumigaw nang may malakas na tinig, na nagsasabi sa lahat ng mga ibong lumilipad sa gitna ng himpapawid, “Halikayo at magkatipon sa dakilang hapunan ng Diyos,[#Ez. 39:17-20]

¹⁸upang kayo'y makakain ng laman ng mga hari, ng laman ng mga kapitan, ng laman ng mga taong makapangyarihan, ng laman ng mga kabayo at ng mga nakasakay dito, at ng laman ng lahat ng mga taong malaya at mga alipin man, mga hamak at dakila.”

¹⁹At nakita ko ang halimaw at ang mga hari sa lupa at ang kanilang mga hukbo, na nagkakatipon upang makipagdigma laban doon sa nakasakay sa kabayo, at laban sa kanyang hukbo.

²⁰At hinuli ang halimaw at kasama niya ang bulaang propeta na gumawa ng mga tanda sa harapan nito, na siyang ipinandaya sa mga tumanggap ng tanda ng halimaw at sa mga sumamba sa larawan nito. Ang dalawang ito ay buháy na inihagis sa lawa ng apoy na nagliliyab sa asupre.[#Apoc. 13:1-18]

²¹At ang mga iba ay pinatay ng tabak na lumalabas sa bibig noong nakasakay sa kabayo; at ang lahat ng mga ibon ay nabusog sa mga laman nila.