The chat will start when you send the first message.
1Nang matanda na si Samuel, pinili niya ang mga anak niyang lalaki na maging pinuno ng Israel.
2Joel ang pangalan ng panganay at Abias naman ang sumunod. Pareho silang namuno sa Beer-seba,
3pero hindi sila gaya ng kanilang ama. Gahaman sila sa pera, tumatanggap ng suhol at binabaluktot ang katarungan.
4Kaya nagtipon ang lahat ng tagapamahala ng Israel at pumunta kay Samuel sa Rama.
5Sinabi nila, “Matanda na po kayo; at ang mga anak ninyoʼy hindi naman sumusunod sa inyong mga pamamaraan. Ngayon, bigyan nʼyo po kami ng hari na mamumuno sa amin, gaya ng ibang bansa na mayroong hari.”
6Ngunit sumama ang loob ni Samuel sa hiniling nila, kaya nanalangin siya sa Panginoon .
7Sinabi sa kanya ng Panginoon , “Gawin mo ang ipinapagawa nila sa iyo, hindi ikaw ang tinatanggihan nila kundi ako.
8Mula nang ilabas ko sila sa Ehipto hanggang ngayon, itinakwil nila ako at sumunod sa diyos-diyosan. Ngayon, ganyan din ang ginagawa nila saʼyo.
9Kaya gawin mo ang kahilingan nila, ngunit balaan mo sila tungkol sa pamumunong gagawin ng hari sa kanila.”
10Sinabi ni Samuel sa mga Israelitang humihingi ng hari ang lahat ng sinabi ng Panginoon .
11Sinabi niya, “Ito ang gagawin ng hari na mamumuno sa inyo: Kukunin niya ang mga anak ninyong lalaki at gagawin niyang mga sundalo. Silaʼy gagawin niyang mga mangangarwahe, mangangabayo at ang ibaʼy mauuna sa kanyang karwahe.
12Ang iba sa kanilaʼy gagawin niyang opisyal na mamamahala sa isang libong sundalo at ang iba naman sa 50 sundalo. Ang ibaʼy pag-aararuhin niya sa kanyang bukid at ang ibaʼy pag-aanihin ng mga pananim niya, ang iba namaʼy gagawin niyang manggagawa ng mga armas para sa digmaan at mga kagamitan para sa kanyang karwahe.
13Kukunin niya ang mga anak ninyong babae at gagawin niyang mga kusinera at panadera, at tagagawa ng pabango.
14Kukunin niya ang pinakamaganda ninyong mga bukid, mga ubasan, mga taniman ng olibo, at ibibigay niya ang mga ito sa mga utusan niya.
15Kukunin niya ang ikasampung bahagi ng inyong mga trigo at mga ubas, at ibibigay niya sa mga opisyal at iba pa niyang mga utusan.
16Kukunin din niya ang mga alipin nʼyong lalaki at babae, at ang pinakamaganda ninyong mga baka at mga asno para magtrabaho sa kanya.
17Kukunin din niya ang ikasampung bahagi ng mga hayop ninyo, at pati kayo ay gagawin niyang mga alipin.
18Pagdating ng araw na iyon, dadaing kayo sa Panginoon dahil sa kalupitan ng hari na pinili ninyo, pero hindi niya kayo sasagutin.”
19Ngunit hindi nakinig kay Samuel ang mga tao. Sinabi nila, “Hindi maaari! Gusto namin na may haring mamamahala sa amin.
20At magiging tulad kami ng ibang mga bansa, na may haring namamahala at nangunguna sa amin sa digmaan.”
21Nang marinig ni Samuel ang lahat ng sinabi ng mga tao, sinabi niya ito sa Panginoon .
22Sumagot ang Panginoon sa kanya, “Gawin mo ang sinabi nila. Bigyan mo sila ng hari.”
Pagkatapos, sinabi ni Samuel sa mga Israelita, “Magsiuwi na kayo sa mga bayan ninyo.”