Ezekiel 13

Parurusahan ang mga Bulaang Propeta

¹Sinabi sa akin ng Panginoon ,

²“Anak ng tao, magsalita ka laban sa mga bulaang propeta ng Israel na nanghuhula mula sa sarili nilang isipan. Sabihin mo na pakinggan nila ang mensahe ng Panginoon :

³Ako, ang Makapangyarihang Panginoon ay nagsasabing nakakaawa ang mga hangal na propetang nanghuhula mula sa sarili nilang isipan, at wala silang nakikitang mga pangitain: ‘Pakinggan ninyo ang salita ng Panginoon .’

⁴O Israel, ang mga propeta moʼy katulad ng mga asong-gubat na nasa gibang lungsod.

⁵Ang katulad nilaʼy mga walang pakialam sa wasak na mga pader ng Israel na hindi inayos upang maging matibay dumating man ang digmaan, sa araw ng paghatol ng Panginoon .

⁶Hindi totoo ang mga pangitain nila at kasinungalingan ang mga hula nila. Sinasabi nilang mula sa Panginoon ang sinasabi nila pero ang totooʼy hindi ko sila sinugo at hinihintay nilang maganap ito.

⁷Hindi totoo ang mga pangitain nila at kasinungalingan ang mga hula nila. Sinasabi nilang, ‘Sinabi ito ng Panginoon ,’ pero hindi iyon nanggaling sa akin.

⁸“Kaya ako, ang Makapangyarihang Panginoon ay nagsasabi na kakalabanin ko sila dahil kasinungalingan ang mga hula nila at hindi totoo ang kanilang mga pangitain.

⁹Parurusahan ko ang mga propetang hindi totoo ang pangitain at kasinungalingan ang mga hula. Hindi ko sila ituturing na kabilang ng aking mga mamamayan at ang mga pangalan nilaʼy hindi isusulat sa talaan ng mga mamamayan ng Israel at hindi maaaring pumasok sa lupain ng Israel. At malalaman ninyong ako ang Makapangyarihang Panginoon .

¹⁰“Inililigaw ng mga propetang ito ang aking mga mamamayan sa pagsasabi ng ‘Kapayapaan,’ subalit wala namang kapayapaan. Parang tinatabunan lang ng apog at putik ang mahinang pader na itinatayo ng mga mamamayan.

¹¹Sabihin mo sa mga nagtapal na mawawasak ang pader na ito, dahil darating ang malakas na bagyo at uulan ng yelong kasintigas ng bato na wawasak sa pader na ito.

¹²At kapag nawasak na ito, magtatanong ang mga tao sa kanila, ‘Ano ang naitulong ng itinapal ninyo?’

¹³“Kaya ako, ang Makapangyarihang Panginoon , ay nagsasabi: Sa tindi ng galit ko, wawasakin ko ang pader sa pamamagitan ng malakas na bagyo, pag-ulan ng yelo na kasintigas ng bato, at malakas na ulan.

¹⁴Oo, wawasakin ko ang pader na tinapalan ninyo ng apog at putik. Wawasakin ko ito hanggang sa lumabas ang pundasyon nito. At kapag nawasak na ito, babagsakan kayo at mamamatay. At malalaman ninyo na ako ang Panginoon .

¹⁵Ipaparamdam ko ang galit ko sa pader at sa mga nagtapal dito. At ipamamalita ko na wala na ang pader at ang mga nagtapal nito,

¹⁶na walang iba kundi ang mga propeta ng Israel na humula na magiging maayos ang kalagayan ng Jerusalem at nakakita ng mga pangitain ng kapayapaan, pero kasinungalingan naman. Ako, ang Makapangyarihang Panginoon , ang nagsasabi nito.

¹⁷“Ngayon naman, anak ng tao, magpropesiya ka laban sa mga babaeng nanghuhula mula sa sarili nilang isipan.

¹⁸Sabihin mo sa kanilang ako, ang Makapangyarihang Panginoon , ang nagsasabi: Kahabag-habag kayo, kayong mga babaeng bumibiktima sa mga mamamayan ko, maging mga bata o matatanda sa pamamagitan ng mga anting-anting ninyo. Nilalagyan ninyo sila ng mga anting-anting na pulseras sa kanilang kamay at belo sa mga ulo. Binibiktima ninyo ang mga mamamayan ko para sa pansarili ninyong kapakinabangan.

¹⁹Nilalapastangan ninyo ako sa harap ng mga mamamayan ko para lang sa kaunting sebada at ilang tinapay. Sa pamamagitan ng pagsisinungaling ay sinasabi ninyong mamamatay ang hindi dapat mamatay at hindi mamamatay ang dapat mamatay. At naniniwala naman ang mga mamamayan ko sa kasinungalingan ninyo.

²⁰“Kaya ako, ang Makapangyarihang Panginoon , ay nagsasabing: Labis akong nagagalit sa mga anting-anting na ginagamit ninyo upang biktimahin ang mga tao na parang mga ibong nahuli sa bitag. Hahablutin ko ang mga anting-anting ninyo sa kamay at palalayain ko ang mga taong hinuli ninyo na parang ibon.[#13:20 : Sa literal, braso.]

²¹Pupunitin ko rin ang mga belo ninyo at ililigtas ko ang mga mamamayan mula sa mga kamay ninyo, hindi nʼyo na sila mabibiktimang muli. At malalaman ninyong ako ang Panginoon .

²²“Pinalungkot ninyo ang mga matuwid sa pamamagitan ng inyong kasinungalingan, na kahit ako ay hindi sila nabigyan ng kalungkutan. Pinalakas ninyo ang loob ng masasama na ipagpatuloy ang kasamaan nila sa pamamagitan ng mga pangakong maliligtas sila sa kamatayan.[#13:22 : O pangako na iyon ang magliligtas sa kanila sa kamatayan.]

²³Kaya mawawala na ang mga hindi totoong pangitain at panghuhula ninyo. Ililigtas ko ang mga mamamayan ko mula sa inyong mga kamay. At malalaman ninyong ako ang Panginoon .”