Mga Hebreo 3

Higit na Dakila si Hesus kaysa kay Moises

¹Kaya nga mga kapatid ko sa pananampalataya, at mga kapwa ko tinawag ng Diyos na makakasama sa langit, ituon ninyo ang inyong isip kay Hesus. Siya ang apostol at punong pari ng ating pananampalataya.

²Tapat siya sa Diyos na nagsugo sa kanya, katulad ni Moises na naging tapat sa pamamahala ng pamilya ng Diyos.

³Sapagkat itinuring ng Diyos si Hesus na higit kaysa kay Moises, dahil kung ihahalintulad sa bahay, higit ang karangalan ng nagtayo kaysa sa bahay na itinayo.

⁴Alam natin na may gumawa ng bawat bahay. Ngunit ang Diyos ang gumawa ng lahat ng bagay.[#3:4 : O At.]

⁵Tapat si Moises sa pamamahala niya sa pamilya ng Diyos bilang isang lingkod. At ang mga bagay na ginawa niya ay larawan ng mga bagay na mangyayari sa hinaharap.

⁶Ngunit si Kristo ay tapat bilang Anak na namamahala sa pamilya ng Diyos. At tayo ang pamilya ng Diyos, kung patuloy tayong magiging tapat sa pag-asang ipinagmamalaki natin.

⁷Kaya tulad ng sinasabi ng Banal na Espiritu:

“Sa araw na ito,

kapag narinig ninyo ang tinig niya,

⁸huwag ninyong patigasin ang inyong puso,

tulad ng ginawa ng inyong mga ninuno

nang silaʼy maghimagsik laban sa akin

doon sa ilang, nang subukin nila ako.

⁹Dooʼy sinubok nila ang aking pasensya,

kahit na nakita nila ang ginawa ko

sa loob ng apatnapung taon.

¹⁰Kaya nagalit ako sa henerasyong ito;

at sinabi ko, ‘Palaging lumalayo ang puso nila sa akin,

at ayaw nilang sumunod sa mga itinuturo ko sa kanila.’

¹¹Kaya sa galit koʼy sumumpa ako,

‘Hinding-hindi nila mararanasan ang kapahingahang

inilaan ko sa kanila.’ ”

¹²Kaya mga kapatid, mag-ingat kayo upang hindi magkaroon ang sinuman sa inyo ng pusong masama at walang pananampalataya, na siyang maglalayo sa inyo sa buháy na Diyos.

¹³Magpaalalahanan kayo araw-araw habang may panahon pa, upang walang sinuman sa inyo ang malinlang ng kasalanan na siyang nagpapatigas sa inyong puso.

¹⁴Sapagkat kasama tayo ni Kristo kung mananatiling matatag ang pananampalataya natin sa kanya hanggang sa wakas.

¹⁵Gaya nga ng nabanggit sa Kasulatan:

“Sa araw na ito, kapag narinig ninyo ang tinig niya,

huwag ninyong patigasin ang inyong puso,

tulad ng ginawa ng inyong mga ninuno

nang silaʼy maghimagsik.”

¹⁶Sino ba ang mga taong nakarinig sa tinig ng Diyos at naghimagsik pa rin sa kabila nito? Hindi baʼt ang mga inilabas ni Moises sa Ehipto?

¹⁷At kanino ba nagalit ang Diyos sa loob ng apatnapung taon? Hindi baʼt sa mga nagkasala na namatay sa ilang?

¹⁸At sino ba ang isinumpa ng Diyos na hindi makakaranas ng kapahingahan? Hindi baʼt ang mga ayaw sumunod sa kanya?

¹⁹Kaya malinaw na hindi nila nakamtan ang kapahingahan dahil sa kawalan ng pananampalataya sa Diyos.