Mga Hebreo 9

Makalumang Tuntunin tungkol sa Pagsamba

¹May mga tuntunin ang unang kasunduan tungkol sa pagsamba at may sambahang gawa ng tao.

²Itinayo ang Toldang Sambahan na may dalawang silid. Ang unang silid ay tinatawag na Banal na Lugar, kung saan naroon ang ilawan, ang mesa, at ang tinapay na handog sa Diyos.

³Ang ikalawang silid ay nasa likod ng tabing. Ito ay tinatawag na Pinakabanal na Lugar.

⁴Naroon ang gintong altar na pinagsusunugan ng insenso at ang Kaban ng Tipan na nababalutan ng ginto. Nasa loob ng Kahon ang lalagyang ginto na may lamang manna, ang tungkod ni Aaron na nagkasibol, at ang mga malalapad na mga bato kung saan nakaukit ang mga utos ng Diyos.

⁵Sa ibabaw ng Kahon ay may mga kerubin na nagpapahiwatig ng kaluwalhatian ng Diyos, at nilililiman ng mga pakpak ng mga ito ang tinatawag na Takip ng Kapatawaran. Ngunit hindi namin ito maipapaliwanag nang detalyado sa ngayon.

⁶Ganoon ang pagkakaayos sa loob ng Toldang Sambahan. At araw-araw pumapasok ang mga pari sa unang silid ng Tolda para gampanan ang tungkulin nila.

⁷Ngunit ang punong pari lang ang nakakapasok sa Pinakabanal na Lugar at minsan lang sa isang taon. At sa tuwing papasok siya rito, naghahandog siya ng dugo para sa sarili niyang mga kasalanan at sa mga kasalanang nagawa ng mga tao nang hindi nila nalalaman.

⁸Sa ginagawa nilang ito, ipinapakita ng Banal na Espiritu na hindi makakapasok sa Pinakabanal na Lugar ang karaniwang tao hanggaʼt naroon pa ang dating Toldang Sambahan.

⁹Ang Toldang iyon ay larawan lang ng kasalukuyang panahon. Sapagkat ang mga handog at kaloob na iniaalay doon ng mga tao ay hindi nakapaglilinis ng kanilang konsensiya.

¹⁰Ang mga ginagawa nilang itoʼy nauukol lang sa mga pagkain at inumin at mga seremonya ng paglilinis. Mga tuntuning panlabas lamang ito na ipinapatupad hanggang sa dumating ang bagong pamamaraan ng Diyos.

Ang Dugo ni Kristo

¹¹Ngunit dumating na si Kristo na punong pari ng bagong pamamaraan na higit na mabuti kaysa sa dati. Pumasok siya sa mas dakila at mas ganap na Toldang hindi gawa ng tao, at wala sa mundong ito.

¹²Minsan lang pumasok si Kristo sa Pinakabanal na Lugar. At hindi dugo ng kambing o ng guya ang dala niya kundi ang sarili niyang dugo. At sa pamamagitan ng kanyang dugo, tinubos niya tayo sa mga kasalanan natin magpakailanman.

¹³Ayon sa Kautusan, kung itinuturing na marumi ang isang tao, kailangan siyang wisikan ng dugo ng kambing at toro, at ng abo ng dumalagang baka para maging malinis.

¹⁴Kung nakakalinis ang mga ito, higit na nakakalinis ang dugo ni Kristo. Sa pamamagitan ng walang hanggang Espiritu, inialay ni Kristo ang sarili niya bilang handog na walang kapintasan sa Diyos. Ang dugo niya ang lilinis sa ating pusoʼt isipan upang matalikuran natin ang mga gawaing walang kabuluhan at paglingkuran ang Diyos na buháy.

¹⁵Kaya si Kristo ang ginawang tagapamagitan sa atin at sa Diyos sa bagong kasunduan. Sapagkat sa pamamagitan ng kanyang kamatayan, tinubos niya ang mga taong lumabag sa unang kasunduan. Dahil dito, matatanggap ng mga tinawag ng Diyos ang walang hanggang pagpapala na ipinangako niya.

¹⁶Maihahalintulad ito sa isang huling testamento na kailangang mapatunayan na namatay na ang gumawa nito,

¹⁷dahil wala itong bisa habang nabubuhay pa siya. Nagkakabisa lang ang isang testamento kapag namatay na ang gumawa nito.

¹⁸Kaya maging ang unang kasunduan ay kinailangang pagtibayin sa pamamagitan ng dugo.

¹⁹Pagkatapos maipahayag ni Moises sa mga tao ang bawat utos na sinasabi ng Kautusan, kumuha siya ng dugo ng mga guyaʼt kambing, at hinaluan ng tubig. Isinawsaw niya rito ang balahibo ng tupa na kinulayan ng pula na nakatali sa sanga ng hisopo. Pagkatapos, winisikan niya ang Aklat ng Kautusan at ang mga tao.

²⁰At sinabi niya: “Ito ang dugong nagpapatibay sa kasunduang ibinigay at ipinatutupad sa inyo ng Diyos.”[#9:20 Exo. 24:8.]

²¹Winisikan din niya ng dugo ang Toldang Sambahan at ang lahat ng bagay doon na ginagamit sa pagsamba.

²²Ayon sa Kautusan, nililinis sa pamamagitan ng dugo ang halos lahat ng bagay na ginagamit sa pagsamba. At kung walang pagbubuhos ng dugo bilang handog sa Diyos, wala ring kapatawaran ng mga kasalanan.

²³Kaya kailangang linisin sa pamamagitan ng ganitong paraan ng paghahandog ang mga bagay sa sambahang ito na larawan lang ng mga bagay na nasa langit. Ngunit nangangailangan ng mas mabuting handog ang mga bagay na nasa langit.

²⁴Sapagkat hindi pumasok si Kristo sa isang banal na lugar na gawa ng tao at larawan lang ng mga bagay na nasa langit, kundi sa langit mismo. Siya ngayon ay namamagitan para sa atin sa harap ng Diyos.

²⁵Ang punong pari ng mga Hudyo ay pumapasok sa Pinakabanal na Lugar bawat taon, na may dalang dugo ng hayop. Ngunit si Kristo ay minsan lamang naghandog ng kanyang sarili, at hindi na niya ito inulit-ulit pa.

²⁶Dahil kung kailangang ulit-ulitin, maraming beses sanang nagdusa si Kristo mula pa nang likhain ang mundo. Ngunit minsan lamang siya naparito sa mundo upang alisin ang mga kasalanan natin sa pamamagitan ng paghahandog ng kanyang sarili. Ginawa niya ito ngayong matatapos na ang panahon.

²⁷Itinakda sa mga tao ang mamatay nang minsan at pagkatapos nitoʼy ang paghuhukom ng Diyos.

²⁸Ganoon din naman, minsan lang namatay si Kristo nang inihandog niya ang kanyang sarili upang alisin ang kasalanan ng mga tao. At muli siyang babalik dito sa mundo, hindi na upang akuing muli ang kasalanan ng mga tao, kundi upang iligtas ang mga taong naghihintay sa kanya.