Mateo 4

Tinukso ng Diyablo si Hesus

¹Pagkatapos nito, dinala ng Espiritu si Hesus sa ilang para tuksuhin ng diyablo.

²Doon ay nag-ayuno si Hesus nang apatnapung araw at apatnapung gabi, kaya nagutom siya.

³Dumating ang manunukso at sinabi sa kanya, “Kung ikaw nga ang Anak ng Diyos, utusan mo ang mga batong ito na maging tinapay.”

⁴Ngunit sumagot si Hesus, “Sinasabi sa Kasulatan, ‘Hindi lamang sa tinapay nabubuhay ang tao kundi sa bawat salitang nagmumula sa bibig ng Diyos.’”[#4:4 Deu. 8:3.]

⁵Pagkatapos, dinala siya ng diyablo sa Jerusalem, ang banal na lungsod, at pinatayo sa pinakatuktok ng Templo.

⁶At sinabi niya kay Hesus, “Kung ikaw nga ang Anak ng Diyos, magpatihulog ka. Sapagkat sinasabi sa Kasulatan:

‘Uutusan ng Diyos ang kanyang mga anghel

na ingatan ka.

Bubuhatin ka nila

upang hindi tumama

ang iyong mga paa sa bato.’”

⁷Sinagot siya ni Hesus, “Sinasabi rin sa Kasulatan, ‘Huwag mong susubukin ang Panginoon na iyong Diyos.’”[#4:7 Deu. 6:16.]

⁸Muli, dinala ng diyablo si Hesus sa isang napakataas na bundok. Ipinakita niya sa kanya ang lahat ng kaharian sa mundo at ang kadakilaan ng mga ito.

⁹At sinabi ng diyablo kay Hesus, “Ang lahat ng iyan ay ibibigay ko sa iyo, kung ikaʼy magpapatirapa at sasamba sa akin.”

¹⁰Ngunit sumagot si Hesus, “Lumayas ka, Satanas! Sapagkat sinasabi sa Kasulatan, ‘Sambahin mo ang Panginoon na iyong Diyos at siya lamang ang dapat mong paglingkuran.’”[#4:10 Deu. 6:13.]

¹¹Pagkatapos nito, iniwan siya ng diyablo, Dumating ang mga anghel ng Diyos at inalagaan siya.

Sinimulan ni Hesus ang Kanyang Gawain

¹²Nang mabalitaan ni Hesus na ibinilanggo si Juan, bumalik siya sa Galilea.

¹³Ngunit hindi na siya nanirahan sa Nazaret kundi sa Capernaum, isang bayan sa baybayin ng Lawa ng Galilea at sakop ng Zebulun at Neftali.

¹⁴Sa ganitong paraan ay natupad ang sinabi ni Propeta Isaias:

¹⁵“Ang mga lupain ng Zebulun at Neftali,

sa baybayin ng lawa,

sa kabila ng Ilog Jordan,

Galilea ng mga Hentil,

¹⁶ang mga taong nabubuhay sa kadiliman

ay nakakita ng matinding kaliwanagan.

At kahit silaʼy nananahan

sa lilim ng kamatayan,

sila ay maliliwanagan.”

¹⁷Mula nooʼy nagsimulang mangaral si Hesus, “Magsisi kayo sa inyong mga kasalanan at magbalik-loob sa Diyos, dahil malapit nang dumating ang kaharian ng Langit.”

Ang mga Unang Alagad ni Hesus

¹⁸Habang naglalakad si Hesus sa tabi ng Lawa ng Galilea, nakita niya ang magkapatid na sina Simon (na tinatawag ding Pedro) at Andres. Naghahagis sila ng lambat sa lawa sapagkat silaʼy mga mangingisda.

¹⁹Sinabi niya sa kanila, “Halikayo, sumunod kayo sa akin at gagawin ko kayong mangingisda ng mga tao.”

²⁰Kaagad nilang iniwan ang mga lambat nila at sumunod sa kanya.

²¹At habang patuloy siyang naglalakad, nakita naman niya ang magkapatid na sina Santiago at Juan na mga anak ni Zebedeo. Nasa bangka sila kasama ang kanilang ama at nag-aayos ng kanilang lambat. Tinawag din niya ang magkapatid.

²²Agad nilang iniwan ang kanilang bangka at ang kanilang ama, at sumunod kay Hesus.

Pinagaling ni Hesus ang mga Maysakit

²³Nilibot ni Hesus ang buong Galilea habang nagtuturo sa mga sinagoga at ipinapangaral ang Magandang Balita tungkol sa kaharian ng Diyos. At pinagaling din niya ang lahat ng uri ng sakit at kapansanan ng mga tao.

²⁴Naging tanyag siya sa buong lalawigan ng Siria, at dinala sa kanya ang lahat ng maysakit, at mga nagdurusa dahil sa matinding karamdaman: ang mga sinasapian ng demonyo, ang mga may epilepsiya at ang mga paralitiko. At pinagaling niya silang lahat.

²⁵Sinundan siya ng napakaraming tao mula sa Galilea, sa Decapolis, sa Jerusalem, at sa lahat ng bayan ng Judea, at sa mga lugar sa kabila ng Ilog Jordan.