Kawikaan 4

Magkaroon ng Karunungan sa Anumang Paraan

¹Mga anak, pakinggan ninyong mabuti

ang mga pagtutuwid ng inyong ama

sa inyong pag-uugali,

upang lumawak

ang inyong pang-unawa.

²Mabuti ang itinuturo kong ito,

kaya huwag ninyong ipagwalang bahala.

³Noong bata pa ako

at nasa piling pa ng aking mga magulang,

mahal na mahal ako ng aking ina

bilang nag-iisang anak.

⁴Tinuruan ako ni ama.

Sinabi niya sa akin,

“Anak, ingatan mo sa iyong puso

ang mga itinuturo ko.

Sundin mo ang mga utos ko

at mabubuhay ka nang matagal.

⁵Pagsikapan mong magkaroon

ng karunungan at pang-unawa.

Huwag mong kalilimutan

ang mga sinasabi ko

at huwag kang hihiwalay dito.

⁶Huwag mong tanggihan ang karunungan,

sa halip pahalagahan mo ito,

dahil iingatan ka nito.

⁷Pinakamahalaga sa lahat

ang karunungan at pang-unawa.

Sikapin mong magkaroon nito

kahit na maubos pa ang lahat

ng kayamanan mo.

⁸Tanggapin moʼt pahalagahan

ang karunungan,

dahil magbibigay ito

sa iyo ng karangalan.

⁹Magiging parang koronang bulaklak ito

na magbibigay sa iyo ng kagandahan.”

¹⁰Anak, pakinggan mo at tanggapin

ang mga sinasabi ko sa iyo

upang humaba ang iyong buhay.

¹¹Tinuruan na kita ng karunungan,

kung paano mamuhay sa katuwiran.

¹²Kapag ikaw ay naglalakad,

walang haharang sa iyong mga hakbang.

Kapag ikaw ay tumatakbo,

hindi ka matatalisod.

¹³Huwag mong kalilimutan

ang pagtutuwid ko sa iyong pag-uugali;

ingatan mo ito sa puso mo

sapagkat mabubuhay ka

sa pamamagitan nito.

¹⁴Huwag mong susundan

ang daan ng mga masasamâ.

Huwag mong gagayahin

ang ginagawa nila.

¹⁵Iwasan mo ito

at huwag itong dadaan.

Talikuran mo ito

at magpatuloy sa matuwid na daan.

¹⁶Sapagkat ang taong masama

ay hindi makatulog

kapag hindi nakakagawa ng masama

o walang naipapahamak.

¹⁷Ang pagkain nila ay paggawa ng kasamaan

at ang inumin nila ay paggawa

ng karahasan.

¹⁸Ang pamumuhay ng taong matuwid

ay parang sikat ng araw

na lalong nagliliwanag

habang tumatagal.

¹⁹Ngunit ang pamumuhay ng taong masama

ay parang kadiliman;

hindi niya alam kung ano ang dahilan

ng kanyang pagbagsak.

²⁰Anak, pakinggan mong mabuti

ang itinuturo ko sa iyo.

²¹Huwag mo itong kalilimutan

kundi ingatan sa puso mo.

²²Sapagkat magbibigay ito

ng malusog na katawan

at buhay sa sinumang

makakasumpong nito.

²³Higit sa lahat, ingatan mo

ang iyong isipan,

sapagkat kung ano ang iyong iniisip

iyon din ang magiging buhay mo.

²⁴Huwag kang magsalita

ng kasinungalingan at walang kabuluhan.

²⁵Ituon mo ang iyong paningin

sa mga bagay na mabuti.

²⁶Pag-isipan mong mabuti

ang iyong mga gagawin

upang magtagumpay ka.

²⁷Mamuhay ka sa katuwiran

at layuan mo ang kasamaan.