Kawikaan 7

Babala Laban sa Babaeng Nangangalunya

¹Anak, sundin mo ang mga sinasabi ko sa iyo.

Itanim mo ito sa iyong isipan at

²sundin ang mga iniuutos ko,

upang humaba ang buhay mo.

Ingatan mong mabuti

ang mga itinuturo ko

katulad ng pag-iingat mo

sa iyong mga mata.

³Itanim mo sa iyong isipan

upang hindi mo makalimutan.

⁴Ituring mong kapatid na babae

ang karunungan

at ang pang-unawa gaya ng isang

malapít na kaibigan.

⁵Sapagkat ilalayo ka nila

sa masamang babaeng

nakakaakit ang pananalita.

⁶Sa bintana ng aking bahay

dumungaw ako sa kurtina.

⁷Nakita ko ang mga kabataang lalaki

na wala pang muwang sa buhay.

Isa sa kanila

ay salat sa karunungan.

⁸Lumalakad siya patungo sa kanto

kung saan naroroon ang bahay

ng isang masamang babae.

⁹Takip-silim na noon

at malapit nang dumilim.

¹⁰Sinalubong siya

ng isang babaeng ang suot

ay katulad ng suot

ng isang babaeng bayaran.

Nakapagplano na siya

ng gagawin sa lalaking iyon.

¹¹Maingay siya at hindi mahiyain.

Hindi siya nananatili sa bahay.

¹²Madalas siyang makita

sa mga lansangan, sa mga liwasan,

at sa mga kantong tambayan.

¹³Paglapit ng lalaki

ay agad niya itong hinalikan

at walang hiya-hiyang sinabi:

¹⁴“Katatapos ko lang tuparin

ang panata ko sa Diyos

at may natira pang pagkain

doon sa bahay

mula sa aking handog pangkapayapaan.

¹⁵Kaya akoʼy lumabas

upang sa iyoʼy makipagkita.

Hinanap kita at sa wakas

ay natagpuan din kita.

¹⁶Sinapinan ko na ang aking higaan

ng makulay na telang lino

mula pa sa Ehipto.

¹⁷Nilagyan ko iyon ng pabangong

mira, aloe, at sinamon.

¹⁸Kaya halika na, doon tayo

magpakaligaya hanggang umaga,

¹⁹dahil wala rito ang aking asawa.

Naglakbay siya sa malayo.

²⁰Marami siyang dalang pera

at dalawang linggo pa

bago siya bumalik.”

²¹Kaya naakit niya ang lalaki

sa pamamagitan ng kanyang matatamis

at nakakaakit na pananalita.

²²Sumunod agad ang lalaki

na tulad ng bakang hinihila papunta sa katayan,

o tulad ng isang usa na patungo sa bitag,

²³at dooʼy papanain siyang

tatagos sa kanyang puso.

Para din siyang isang ibong nagmamadali

papunta sa bitag ng kamatayan,

ngunit hindi niya ito nalalaman.

²⁴Kaya mga anak, pakinggan ninyong mabuti

ang aking mga sinasabi.

²⁵Huwag kayong paaakit sa ganyang uri ng babae

at huwag ninyong hayaan na kayoʼy kanyang iligaw.

²⁶Marami na ang mga lalaking napahamak

dahil sa kanya.

²⁷Kapag pumunta kayo sa bahay niya,

para na rin kayong pumunta

sa mundo ng mga patay.