Salmo 1

Unang aklat

Salmo 1

¹Pinagpala ang taong hindi namumuhay

ayon sa payo ng masasama

o sumusunod sa maling halimbawa

ng mga makasalanan,

at hindi nakikisama

sa mga taong mapangutya.

²Sa halip ay nagagalak siyang sumunod

sa mga aral mula sa Panginoon ,

at kanyang pinagbubulay-bulayan

ang mga ito araw-gabi.

³Siyaʼy katulad ng isang punongkahoy

na itinanim sa tabi ng sapa,

namumunga sa takdang panahon

at hindi nalalanta ang mga dahon.

Magtatagumpay siya

sa anumang gagawin niya.

⁴Ngunit iba ang mga taong masama;

silaʼy tulad ng ipa

na tinatangay ng hangin.

⁵Sa araw ng paghatol,

silaʼy parurusahan

at ihihiwalay sa matutuwid.

⁶Sapagkat pinapatnubayan ng Panginoon

ang matutuwid,

ngunit ang buhay ng taong masama

ay hahantong sa kapahamakan.