Salmo 11

Salmo 11

¹Sa Panginoon ako kumakanlong.

Ngunit sinasabi ninyo sa akin,

“Tumakas ka papuntang kabundukan,

lumipad kang tulad ng ibon.

²Inihanda na ng mga masasama

ang kanilang mga pana,

upang panain nang palihim

ang mga matutuwid.

³Ano ang magagawa ng mga matutuwid

kung ang batas na pundasyon ng bayan

ay wala nang halaga?”

⁴Ang Panginoon ay nasa kanyang Templo;

at nasa langit ang kanyang trono.

Tinitingnan niya at sinisiyasat

ang lahat ng tao.

⁵Sinisiyasat niya ang matutuwid

at masasamâ.

Ngunit siyaʼy napopoot sa mga malulupit.

⁶Pauulanan niya ng lumalagablab

na baga at asupre ang masasamâ;

at ipapadala niya ang mainit na hangin

na papaso sa kanila.

⁷Dahil ang Panginoon ay matuwid

at siyaʼy nalulugod sa mga gawang mabuti.

Kaya ang mga namumuhay nang tama

ay makakalapit sa kanya.